Read Buka Helaga (Hiri Motu) 1993 SALAMO 67 Bible Online

SALAMO 67 - Buka Helaga (Hiri Motu) 1993 bible

SALAMO 67

¹Dirava e, ai dekenai do oi bogahisihisi, bona oi ese ai do oi hanamoa. Mani ai dekenai do oi laloa, bona ai do oi durua.

²Unai dekena amo tanobada taudia ibounai ese, oiemu dala do idia diba, bona oiemu hamauria kara, be bese ibounai taudia danu do idia diba.

³Dirava e, lau ura bese ibounai ese oi do idia hanamoa. Lau ura bese idauidau ese oiemu ladana do idia abia isi.

⁴Bese idauidau taudia ibounai ese, mai moale danu ane idia abia be namo. Badina be oi ese tanobada taudia oi kota henia noho, mai maoromaoro bona momokani danu, bona bese ibounai be oi ese oi hakaua noho.

⁵Dirava e, lau ura bese ibounai ese oi do idia hanamoa, bona oiemu ladana idia abia isi.

⁶Tano ena anina idia vara namonamo, badina be, Dirava, iseda Dirava ese ita ia hanamoa vadaeni.

⁷Momokani, Dirava ese ita ia hanamoa vadaeni. Tanobada taudia ibounai ese, Dirava do idia matauraia be namo.