Read Buka Helaga (Hiri Motu) 1993 SALAMO 73 Bible Online

SALAMO 73 - Buka Helaga (Hiri Motu) 1993 bible

SALAMO 73

¹Momokani, Dirava ena kara be namo, Israela taudia dekenai. Edia lalona idia goevagoeva taudia dekenai, Dirava ena kara be namo.

²To egu aena be kahirakahira ia dedi. Lauegu kamonai be ia manoka lao, bona egu abidadama be kahirakahira ia ore.

³Badina be lau itaia, tau dikadia ese moni bona kohu momo idia abia, bona hekokoroku taudia idia kwalimu, vadaeni lau mama henidia.

⁴Idia be mai edia hisihisi lasi, bona edia tauanina be goada, bona mai edia dika ta lasi.

⁵Idia be hisihisi lasi, haida bamona lasi, bona gorere idia davaria lasi, taunimanima haida idia davaria bamona.

⁶Unai dainai hekokoroku idia atoa, ageva idia atoa bamona, bona dagedage idia karaia noho, dabua idia karaia bamona.

⁷Edia kudouna bona edia laloa dekena amo, dika idia havaraia noho, edia ura dikadia dainai.

⁸Idia ese tau haida idia kirikirilaia mai hevaseha danu, badu herevadia danu idia gwauraia noho. Idia be hekokoroku, bona dala idia tahua noho, tau haida do idia hadikaia totona.

⁹Idia ese guba dekenai ia noho Dirava idia hereva dika henia. Mai hekokoroku danu, idia ese taunimanima idia oda henidia.

¹⁰Unai dainai Dirava ena taudia haida ese, idia dekenai idia kamonai henia, bona edia hereva kerere idia abidadama henia.

¹¹Unai tau dikadia be inai bamona idia hereva, idia gwau, “Dirava be edena bamona do ia diba? Siahu Ibounai Diravana dekenai be aonega ia noho, a?”

¹²Tau dikadia edia kara be unai bamona. Idia be mai edia kohu momo, bona nega ibounai kohu ma haida idia abia noho.

¹³Lau ese lau kara kava, a? Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a?

¹⁴Badina be dina ibounai lau hisihisi noho, bona daba ibounai, matakani lau davaria noho.

¹⁵Bema lau ese, tau dikadia edia hereva bamona hereva lau gwauraia neganai, lau ese oiemu taudia edia mauri do lau hadikaia, bona edia laloa do lau hakererea.

¹⁶Lau ese unai tau dikadia edia kara bona kwalimu, dekenai lau laloa momo, to ia auka dainai, lau be hegeregere lasi laloa maoro do lau davaria,

¹⁷ela bona Dirava ena Dubu Helaga dekenai lau vareai lao. Unai neganai tau dikadia edia dokona lau diba.

¹⁸Momokani oi ese dedidedi gabudia dekenai idia do oi atoa, bona mase gabuna dekenai idia do oi hamorua.

¹⁹Oi ese do oi hamasedia haraga, bona inai mase be do ia dika momokani.

²⁰Idia be hegeregere tau ta ia nihi, bona dabai ia noga neganai nihi be ia ore kava. Lohiabada e, do oi toreisi neganai, unai taudia be do idia boio momokani.

²¹Lohiabada e, lauegu laloa be dika momokani neganai, bona lalohisihisi ena mamina lau abia momokani neganai,

²²lauegu laloa be kavakava, boroma edia laloa bamona oiemu vairana dekenai, bona oiemu dala ena diba lau davaria diba lasi.

²³To lau be nega ibounai oi kahirakahira lau noho, bona oi ese egu imana oi dogoatao noho.

²⁴Oi ese oiemu sisiba dekena amo lau oi hakaua noho. Dokona neganai oi ese lau do oi abia dae, guba ena hairai dekenai.

²⁵Guba dekenai dahaka do lau davaria? Oi sibona, ani? Unai dainai tanobada dekenai, gau ta lau ura henia lasi, oi sibona.

²⁶Egu tauanina bona egu lalona be sedira do idia manoka, to Dirava be lauegu goada. Bema Dirava be lau dekenai ia noho neganai, lau be hegeregere momokani ela bona hanaihanai.

²⁷Dirava e, oi idia rakatania taudia, be momokani do idia mase ore. Bona oi dekenai idia abidadama, to edia abidadama idia rakatania taudia, be oi ese do oi hamasedia.

²⁸To lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani. Hari lau ura oiemu kara ibounai do lau gwauraia hedinarai.