Read Buka Helaga (Hiri Motu) 1993 SALAMO 77 Bible Online

SALAMO 77 - Buka Helaga (Hiri Motu) 1993 bible

SALAMO 77

¹Dirava dekenai lau tai, ia ese lau do ia durua totona. Dirava dekenai lau tai, mai boiboi danu, bona ia ese lau dekenai ia kamonai.

²Egu hekwarahi neganai lau ese Lohiabada dekenai lau guriguri. Hanuaboi ena hora ibounai, lau ese egu imana lau abia isi, lau guriguri noho, egu lauma ese laga-ani ia ura lasi.

³Dirava e, oi lau laloa neganai lalohisihisi dainai lau hahodi haraga lasi. Egu hisihisi lau laloa noho neganai, egu lauma be goada ia davaria lasi.

⁴Dirava e, oi ese egu mahuta dalana oi koua. Egu laloa hekwarahi be bada dainai lau hereva diba lasi.

⁵Dina gunadia lau laloa, bona lagani, idia ore gaudia, be lau laloatao.

⁶Hanuaboi neganai egu lalona lau tahua. Lau laloa namonamo, bona egu lauma lau tahua.

⁷Lau sibona dekenai lau nanadaia, lau gwau, “Lohiabada ese nega ibounai ita do ia negea noho, a? Ia ese nega ta ma, be ita dekenai do ia laloa namo lou, a?

⁸Iena noho hanaihanai lalokauna, be ita dekena amo ia hadokoa, a? Iena gwauhamata be ia gini noho lasi, a?

⁹Dirava ese iena bogahisihisi ia laloaboio vadaeni, a? Iena badu ese iena lalokau ena gabu ia abia vadaeni, a?”

¹⁰Unai neganai lau gwau, “Egu lalohisihisi ena anina korikori be inai: Dirava ena siahu be ia ore vadaeni, a?”

¹¹To Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou.

¹²Oiemu gaukara ibounai do lau laloa noho, bona oiemu siahu karadia danu do lau laloa.

¹³Dirava e, oiemu kara ibounai be helaga. Edena dirava ena goada be oiemu goada hegeregerena?

¹⁴Hoa karadia ia karaia diba Diravana be oi. Oi ese oiemu siahu, be bese idauidau edia huanai oi hedinaraia vadaeni.

¹⁵Oiemu siahu dekena amo oiemu bese taudia oi hamauria. Idia be Iakobo bona Iosepa edia bese taudia.

¹⁶Dirava e, ranu gabudia ese oi idia itaia neganai idia gari, bona davara dobu gabudia idia heudeheude.

¹⁷Ori ese medu idia siaia diho. Guba danu ia boiboi, bona oiemu kevaru be kahana ibounai dekena amo ia diari.

¹⁸Oi ese guba ena boiboi oi havaraia haraga koehirihiri lalonai, bona kevaru ese tanobada ia hadiaria. Tanobada ia mareremarere bona ia heudeheude.

¹⁹Oi ese davara ena hurehure edia huana dekenai oi raka. Oi ese davara dobu oi raka hanaia, to oiemu aena gabudia, be tau ta ese ia itaia lasi.

²⁰Oi ese mamoe naria tauna bamona oiemu bese taudia oi hakaua. Mose bona Arona edia imadia dekena amo, oi ese oiemu bese taudia oi hakaua.