Read Buka Helaga (Hiri Motu) 1993 SALAMO 84 Bible Online

SALAMO 84 - Buka Helaga (Hiri Motu) 1993 bible

SALAMO 84

¹Siahu Ibounai Dirava e, lau ese oiemu Dubu Helaga lau ura henia bada!

²Lau ura bada unuseni do lau noho. Egu lalona ibounai ese, Lohiabada ena Dubu Helaga ia ura henia noho. Egu tauanina bona egu kudouna dekena amo, Mauri Diravana dekenai ane lau abia noho, mai moale ena boiboi danu.

³Siahu Ibounai Dirava e, oi be lauegu King bona lauegu Dirava. Manu maragidia ese edia ruma, be oiemu boubou patana ena badinai idia karaia. Unuseni edia natudia idia naria noho.

⁴Oiemu Dubu Helaga lalonai idia noho taudia, be mai moale bada danu. Idia ese oi hanamoa totona, ane idia abia noho nega ibounai,

⁵Edia goada oi dekena amo idia abia taudia, be mai edia moale danu. Idia ura bada idia raka lao Siona Ororo dekenai, bona mai moale danu idia lao.

⁶Baka Koura gabuna idia raka hanaia neganai, ranu lohilohi gabudia idia davaria. Medu be daba neganai ia diho, bona unai ranu gabudia be ranu ese ia hahonua.

⁷Unai taudia idia raka noho neganai, edia goada be ia bada lao noho, ela bona idia ta ta ese Dirava, be Siona Ororo dekenai do idia itaia.

⁸Siahu Ibounai Dirava e, lauegu guriguri do oi kamonai. Iakobo ena Dirava e, lau dekenai do oi kamonai.

⁹Dirava e, aiemai king do oi hanamoa. Oi sibona ese oi abia hidi king, be do oi laloa namo henia.

¹⁰Lohiabada e, bema dina tamona sibona Dubu Helaga lalonai lau noho, unai dina ese, dina 1000 idau gabu dekenai ia hereaia noho. Momokani, lauegu Dirava ena Ruma ena iduara badinai, do lau gini be namo herea, to kara kerere taudia edia ruma lalonai lau noho be dika.

¹¹Badina be Lohiabada ese ita ia gimaia noho. Ia be iseda King, mai ena hairaina danu. Ia ese bogahisihisi bona mataurai, be ai dekenai ia henia noho. Bema tau ta ese kara maoromaoro ia karaia neganai, Lohiabada ese gau namona ta unai tau dekena amo do ia koua lasi.

¹²Siahu Ibounai Diravana e, oi dekenai idia abidadama taudia ibounai, be do idia moale bada noho.