Read Buka Helaga (Hiri Motu) 1993 SALAMO 88 Bible Online

SALAMO 88 - Buka Helaga (Hiri Motu) 1993 bible

SALAMO 88

¹Lohiabada, lau oi hamauria noho Diravana e, dina lalonai oi dekenai lau boiboi noho, lau do oi durua totona. Hanuaboi lalonai danu oi dekenai lau tai henia noho.

²Egu guriguri mani do oi kamonai. Oiemu durua lau noia neganai, mani lau dekenai do oi kamonai henia.

³Badina be egu lauma be mai ena hekwarahi bada, bona egu mauri, be mase gabuna dekenai kahirakahira do ia vareai lao.

⁴Kahirakahira do idia mase taudia, be lau danu idia haboua tamona, mase gabuna dekenai do ai diho hebou totona, bona egu goada be ia ore vadaeni.

⁵Mase taudia edia huanai lau idia rakatania vadaeni. Lau be idia alaia vadaeni tauna bamona, mase ena guri dekenai lau noho. Lau be, oi ese oi laloaboio momokani vadaeni tauna bamona, lau be, oi ese do oi durua lou lasi tauna bamona.

⁶Oi ese mase guria gabuna dobu herea dekenai, lau oi atoa vadaeni, dibura masemase bona dobu masemase gabuna dekenai.

⁷Oiemu badu be metau herea lauegu latanai. Oiemu hurehure ibounai ese lau idia koua momokani.

⁸Oi ese egu turana taudia oi hamaoroa, vadaeni idia ese lau idia rakatania. Oi ese lau oi hadikaia dainai, idia dekenai lau be gari gauna bamona. Lau be hegeregere dibura dekenai lau noho, bona lau heau mauri diba lasi.

⁹Egu lalohisihisi dainai, egu matana ese gau idia itaia namonamo lasi. Lohiabada e, dina ibounai oi dekenai lau boiboi noho. Egu imana be oi dekenai lau abia isi noho.

¹⁰Hoa karadia, be mase taudia edia vairanai oi karaia noho, a? O sedira mase taudia edia laulaudia, ese oi hanamoa totona idia toreisi noho, a?

¹¹Mase guria gabuna dekenai, be oiemu lalokau idia gwauraia noho, a? O dobu masemase gabuna dekenai, oiemu gwauhamata hamomokania karadia idia gwauraia noho, a?

¹²Dibura sibona ia noho gabuna dekenai, oiemu hoa karadia idia diba, a? Idia laloaboio vadaeni mase taudia idia noho gabuna, unuseni be oiemu kara namodia do idia laloa, a?

¹³To Lohiabada e, lau ese oiemu durua totona lau tai henia noho. Daba neganai egu noinoi be oi dekenai lau gwauraia noho.

¹⁴Lohiabada e, badina dahaka lau oi negea noho? Badina dahaka oiemu vairana be lau dekena amo oi hunia noho?

¹⁵Lau be mero negana dekena amo, mai hisihisi danu lau noho, bona kahirakahira lau mase. Oiemu matakani ese lau ia hagaria, vadaeni lau be dika, bona durua do lau abia dalana be lasi.

¹⁶Oiemu badu ese lau ia koua momokani vadaeni, bona oiemu gari karadia ese, lau idia hadikaia ore.

¹⁷Abata ranu bamona, idia ese lau idia koua hagegea dina ena hora ibounai lalonai. Idia ese lau idia koua momokani vadaeni.

¹⁸Oi ese egu turana bona egu lalokau taudia danu, be lau dekena amo oi atodia siri, bona dibura sibona be egu turana tamona bamona.