Read Buka Helaga (Hiri Motu) 1993 SALAMO 97 Bible Online

SALAMO 97 - Buka Helaga (Hiri Motu) 1993 bible

SALAMO 97

¹Lohiabada be King! Tanobada, do oi moale! Bona umui davara ena motumotu ibounai do umui moale bada!

²Ori bona dibura ese, Lohiabada ena noho gabuna idia hunia noho. Lohiabada ese taunimanima, be mai maoromaoro bona momokani danu ia biagudia noho.

³Lahi be Lohiabada ena vairana dekenai ia daekau lao noho, bona ia dekenai idia tuari henia taudia, idia hagegea noho taudia, be unai lahi ese ia gabudia ore noho.

⁴Lohiabada ena kevaru ese tanobada ia hadiaria noho. Tanobada taudia idia itaia neganai idia heudeheude noho.

⁵Ororo be kandolo bamona idia veve noho, Lohiabada ena vairana dekenai, badina ia be tanobada ena kahana ibounai ena Lohia Badana.

⁶Guba ese Lohiabada ena kara maoromaoro ia gwauraia hedinarai noho. Bese idauidau ibounai ese iena hairaina idia itaia noho.

⁷Kaivakuku idia tomadiho henia taudia ibounai be do idia hemarai, badina dirava ibounai, be Lohiabada ena vairana dekenai do idia tomadiho.

⁸Lohiabada e, Siona dekenai noho taudia bona Iuda hanua taudia, be oiemu kota hereva maoromaorodia dainai idia moale bada noho.

⁹Badina Lohiabada e, oi be Ataiai Momokani Diravana, tanobada kahana ibounai edia latanai. Oi ese dirava ibounai oi hereaia noho momokani.

¹⁰Lohiabada ese kara dika idia ura henia lasi taudia, ia lalokau henidia noho. Ia ese iena bese taudia, ia idia abidadama henia taudia, edia mauri ia gimaia noho, bona kara dika taudia edia siahu dekena amo, ia ese iena taudia ia hamauria noho.

¹¹Kara maoromaoro taudia dekenai, Dirava ese diari ia henia noho, bona taunimanima namodia dekenai, ia ese iena moale ia henia noho.

¹²Kara maoromaoro taudia ibounai e, Lohiabada ese ia karaia vadaeni karadia dainai do umui moale! Dirava helagana ena kara do umui laloatao, bona do umui tanikiu henia.