Read Buka Helaga (Hiri Motu) 1993 SALAMO 99 Bible Online

SALAMO 99 - Buka Helaga (Hiri Motu) 1993 bible

SALAMO 99

¹Lohiabada be King! Tanobada ena bese idauidau idia heudeheude noho. Lohiabada be iena terona dekenai ia helai noho, kerubi edia huanai. Tanobada ia mareremarere noho.

²Lohiabada be Siona lalonai, bona iena siahu be bada herea, ma Lohiabada ese bese idauidau ia biagua noho.

³Taunimanima ibounai ese, Lohiabada ena ladana badana bona mai garina, be do idia hanamoa. Lohiabada be helaga!

⁴Siahu Bada ena King e, oi ese kota maoromaorona oi ura henia noho. Oi ese taunimanima edia ahuna korikori, be idia dekenai oi henia noho. Oi ese kota maoromaoro Israela dekenai oi haginia vadaeni. Oi ese kara maoromaoro bona kara namona oi karaia noho.

⁵Lohiabada, iseda Dirava do umui hanamoa. Iena terona ena vairana dekenai do umui tomadiho henia. Lohiabada be helaga!

⁶Mose bona Arona ruaosi be iena hahelagaia taudia. Samuela danu be Lohiabada ena ladana ia gwauraia tauna ta. Idia ese Lohiabada dekenai idia boiboi, bona ia ese idia dekenai ia haere.

⁷Ori badana dekena amo ia ese idia dekenai ia hereva. Idia ese iena oda idia badinaia, bona ia henidia taravatu danu idia badinaia.

⁸Lohiabada e, aiemai Dirava, oi ese idia dekenai oi haere. Oiemu bese taudia dekenai, oi be dika gwauatao Diravana, to oi be edia dika davana henia Diravana danu.

⁹Lohiabada, iseda Dirava do umui hanamoa. Iena ororo helagana dekenai do umui tomadiho, badina be Lohiabada, iseda Dirava, be helaga.