Read Buka Helaga (Hiri Motu) 1993 AONEGA HEREVADIA 10 Bible Online

AONEGA HEREVADIA 10 - Buka Helaga (Hiri Motu) 1993 bible

AONEGA HEREVADIA 10

¹Solomona ena aonega herevadia be inai: Aonega merona ese iena tamana ia hamoalea noho, to kavakava merona ese, iena sinana ena lalona ia hisihisi henia noho.

²Koikoi karadia dekena amo idia abia moni o kohu, ese namo ia havaraia diba lasi, to kara maoromaoro ese, mase dekena amo oi do ia hamauria diba.

³Lohiabada ese kara maoromaoro taudia dekenai hitolo ia siaia lasi, to kara dika taudia idia ura dikadika gauna, be ia henidia lasi.

⁴Bema oi lahedo neganai oi be do oi ogogami, to bema oi gaukara auka neganai, oi be kohu momo do oi abia.

⁵Aniani ia mage neganai, ia haboua merona be aonega merona, to aniani haboua neganai ia mahuta noho merona, ese hemarai ia havaraia noho.

⁶Kara maoromaoro tauna ese hanamoa do ia davaria, to kara dika tauna ena dagedage karadia ese, iena hereva gwauraia dalana idia koua noho.

⁷Kara maoromaoro tauna ta ia mase murinai, taunimanima ese ia idia laloatao neganai, moale bona hanamoa idia davaria noho, to kara dika tauna ena ladana, be taunimanima do idia laloaboio.

⁸Aonega tauna ese sisiba ia abia dae noho, to hereva momo kavakava tauna, ese dika do ia davaria.

⁹Laloa maoromaoro bona momokani taudia, edia noho be namo, mai gari lasi danu, to kara gagevagageva taudia ese, edia kerere idia hunia diba lasi.

¹⁰Hereva momokani ia koua noho tauna ese, kerere ia havaraia noho, to sisiba hereva ia gwauraia, ia gari lasi tauna, ese maino ia havaraia noho.

¹¹Kara maoromaoro tauna ena uduna dekena amo, mauri hereva idia mai noho, to kara dika tauna ena dagedage karadia ese, iena hereva gwauraia dalana idia koua noho.

¹²Badu ese heai ia havaraia noho, to lalokau ese kerere ibounai ia koua noho.

¹³Laloa kehoa tauna ese aonega hereva ia gwauraia noho, to kavakava tauna be do idia dadabaia be namo.

¹⁴Aonega taudia ese edia diba idia habadaia noho, to kavakava tauna ena hereva momo, ese kerere ia mailaia noho.

¹⁵Kohu momo tauna ena moni bona kohu, ese ia idia gimaia noho, to ogogami ese ogogami tauna ia hadikaia ore noho.

¹⁶Kara maoromaoro taudia ese, edia gaukara davana be mauri abia totona idia henia, to kara dika taudia edia gaukara davana ese, edia dika ia habadaia noho.

¹⁷Hadibaia hereva ia kamonai henia noho tauna, be mauri dala dekenai ia raka noho, to sisiba hereva ia negea tauna be ia raka kerere noho.

¹⁸Iena badu ia hunia noho tauna, be hereva koikoi tauna, bona samania kava hereva ia gwauraia noho tauna be kavakava.

¹⁹Hereva momo ese kara kerere idia havaraia noho, to iena uduna ena hereva ia koua noho tauna, be mai ena aonega.

²⁰Kara maoromaoro tauna ena hereva, be siliva namo herea bamona, to kara dika tauna ena laloa gaudia be anina lasi.

²¹Kara maoromaoro tauna ena hereva, ese taunimanima do idia hanamodia, to kavakava taudia be mai edia lalodia lasi dainai, idia mase noho.

²²Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.

²³Kavakava tauna ese, kara dika be iena gadara gauna ia halaoa noho, to laloa kehoa tauna ese, aonega karadia ia moalelaia noho.

²⁴Kara dika tauna ese ia gari henia gauna, be ia dekenai do ia vara, to kara maoromaoro tauna ena ura gauna, be do ia abia.

²⁵Lai guba do ia toa murinai, kara dika tauna ia boio, to kara maoromaoro tauna do ia gini goada noho hanaihanai.

²⁶Oiemu gaukara karaia totona, lahedo tauna do oi abia lasi, badina ia ese oi do ia hisihisi henia, vinega ese isena ia hahisia bamona, bona kwalahu ese matana ia hahisia bamona.

²⁷Lohiabada do oi gari henia, bona ia ese oiemu mauri lagani do ia halataia, to kara dika taudia edia mauri lagani, be do idia kwadogi.

²⁸Kara maoromaoro tauna ese ia diba, do ia abia gauna be moale momokani, to kara dika tauna ese, do ia naria noho gauna be anina lasi.

²⁹Lohiabada ese laloa maoromaoro bona momokani taudia ia gimaia noho, to ia ese kara dika taudia ia hadikaia ore noho.

³⁰Kara maoromaoro taudia be do idia noho namo, mai maino danu hanaihanai, to kara dika taudia, be tano dekenai do idia noho lasi.

³¹Kara maoromaoro tauna ena uduna dekena amo, aonega ia gwauraia noho, to hereva gagevagageva ia gwauraia tauna, ena malana do idia utua oho.

³²Kara maoromaoro taudia, be taunimanima durua hereva idia gwauraia noho diba, to kara dika taudia ese, taunimanima hadikaia hereva sibona idia gwauraia noho.