Read Buka Helaga (Hiri Motu) 1993 AONEGA HEREVADIA 16 Bible Online

AONEGA HEREVADIA 16 - Buka Helaga (Hiri Motu) 1993 bible

AONEGA HEREVADIA 16

¹Ita taunimanima ese palani ita karaia noho, to Dirava sibona ese iseda palani, ena anina ia havaraia noho.

²Sedira do oi laloa oiemu kara ibounai be maoro, to Lohiabada ese oiemu laloa ibounai ia tahua noho.

³Oi ura karaia gaudia ibounai totona, Lohiabada do oi noia, ia ese do ia hanamoa gwauraia, unai neganai oiemu palani ibounai edia anina do idia vara momokani.

⁴Lohiabada ese gau ibounai ia karaia vadaeni, ta ta mai edia dokona. Kara dika taudia danu be ia ese ia karaia, edia dokona be, dika do idia davaria.

⁵Hekokoroku taudia ibounai, be Lohiabada ese ia badu henidia momokani. Ia ese edia kerere davana dekena amo, heau mauri dalana ta do ia henidia lasi, lasi momokani.

⁶Tau ta ena bogahisihisi kara bona abidadama kara dainai, Dirava ese iena kara dika do ia gwauatao, bona bema Lohiabada oi gari henia neganai, oi be kara dika dekena amo oi siri noho.

⁷Bema oiemu kara ese Lohiabada idia hamoalea noho neganai, oi idia hadikaia gwauraia taudia, be Lohiabada ese oiemu turana do ia halaoa.

⁸Bema tau ta be mai ena kohu maragina sibona, to mai ena kara maoromaoro danu, be namo. To bema tau ta be mai ena kohu bada herea, to mai kara kerere bona koikoi danu, be dika.

⁹Tau ta ese iena kudouna lalonai, iena dala ia palania noho, to Lohiabada ese unai tau ena raka dalana, dekenai ia hakaua noho.

¹⁰King ena hereva be mai siahu danu, Dirava ena siahu dekena amo. King ena kota hereva be idia kerere lasi.

¹¹Lohiabada ia ura gau edia bada, bona edia metau tohoa sikele, be do idia maoromaoro momokani. Hoihoi kara ibounai danu, ia ura be mai maoromaoro bona momokani danu.

¹²King taudia ese kara dika idia badu henia noho, badina be basileia ta be kara maoromaoro dekena amo, do ia gini goada noho.

¹³King ese hereva maoromaoro bona momokani ia ura henia noho. Ia ese hereva momokani tauna ia lalokau henia noho.

¹⁴Aonega tauna ese, iena king do ia hamoalea noho be namo, badina bema king ia badu neganai, sedira tau ta do ia mase.

¹⁵King ia moale neganai, iena taunimanima do idia mauri. King ena lalona namo, be laurabada neganai medu ia diho bamona.

¹⁶Aonega ena namo ese, golo ena namo ia hereaia noho. Laloa kehoa ena namo ese, siliva ena namo ia hereaia noho.

¹⁷Kara maoromaoro tauna ese, dika ia noho lasi dalana dekenai ia raka noho. Unai dainai oi raka lao noho dalana, be do oi naria namonamo, mauri do oi davaria totona.

¹⁸Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.

¹⁹Ogogami taudia danu, mai manau danu do oi noho be namo, to hekokoroku taudia danu, idia dadia kohu do oi haria be dika.

²⁰Oiemu hadibaia tauna ena hereva do oi kamonai henia, vadaeni do oi kwalimu. Lohiabada do oi abidadama henia, vadaeni do oi moale.

²¹Aonega tauna be taunimanima ese, laloa kehoa tauna idia gwauraia noho. Iena hereva be namo dainai, ia be hadibaia tauna namo herea.

²²Aonega be mauri davaria dalana, aonega tauna dekenai, to bema kavakava tauna oi hadibaia neganai, oiemu nega oi haorea kava.

²³Aonega tauna ena kudouna ese, iena hereva ia hamaoromaoroa noho, bona iena hereva ese, iena diba idia habadaia noho.

²⁴Hereva namodia mai bogahisihisi danu, be hani bamona, edia mamina be namo, lauma dekenai, bona tauanina dekenai danu.

²⁵Dala ta ia noho, sedira iena toana oi dekenai be maoro, to iena dokona be mase dekenai do ia lao.

²⁶Gaukara tauna be aniani ia laloa dainai, ia gaukara goada noho, badina ia ura iena hitolo do ia hanamoa.

²⁷Kara dika tauna ese, dika karaia dalana ia laloa noho, bona iena hereva be lahi, siahu bada gauna bamona.

²⁸Laloa kerere tauna ese heai ia havaraia noho, bona hadikaia hereva kava gwauraia tauna ese, turana korikori taudia edia turana dala ia hamakohia noho.

²⁹Dagedage tauna ese iena badibadinai tauna ia koia noho, bona dika ena dala dekenai ia hakaua noho.

³⁰Iena matana dekena amo, toa dikana ia karaia noho tauna, ese kerere do ia karaia dalana ia laloa noho. Ma iena bibina ia hakapua auka tauna ese, kara dika do ia havaraia noho.

³¹Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.

³²Haheauka tauna ese, tuari tauna goadana ia hereaia noho, bona ia sibona ena lalona ia biagua noho tauna, ese tuari dekenai hanua ia halusia tauna ia hereaia noho.

³³Edia dala diba totona taunimanima ese, laki gadara idia karaia noho, to Dirava sibona ese edia dala ia havaraia noho.