Read Buka Helaga (Hiri Motu) 1993 AONEGA HEREVADIA 17 Bible Online

AONEGA HEREVADIA 17 - Buka Helaga (Hiri Motu) 1993 bible

AONEGA HEREVADIA 17

¹Beredi kaukau mai maino danu do oi ania be namo, to aria badana mai heai bona hepapahuahu danu be dika.

²Hesiai tauna mai ena aonega danu ese, ruma biaguna ena natuna, hemarai karadia ia karaia noho, do ia biagua. Unai hesiai tauna ese, iena biaguna ena ahuna do ia abia, tadikaka ta bamona.

³Golo bona siliva be lahi ese, ia tohoa bona ia hagoevaia, bona tau ta ena kudouna be Lohiabada ese, ia tohoa bona ia hagoevaia noho.

⁴Kara dika taudia ese, ma dika taudia haida edia laloa idia ura henia noho, bona koikoi taudia ese, hereva kerere gaudia idia kamonai henia noho.

⁵Bema ogogami taudia oi kirikirilaia neganai, oi ese idia ia karaia Dirava danu oi kirikirilaia noho. Bema haida edia hisihisi dekenai oi kiri neganai, Dirava ese oi do ia matakani henia.

⁶Tau buruka ese iena tubuna ia heagilaia noho. Memero danu ese edia tamadia dekenai idia heagi noho.

⁷Hereva koikoi be hegeregere lasi king ena uduna dekena amo, ma hereva goeva danu be hegeregere lasi, kavakava tauna dekena amo.

⁸Bema tau ta ese ma tau ta dekenai, lalona veria moni ia henia, kara dikana ta do ia karaia totona, unai moni ia henia tauna ia laloa, unai moni ese meamea bamona, iena ura gaudia ibounai do ia karaia.

⁹Dika ia gwauatao tauna ese lalokau ia havaraia noho, to unai dika ia gwauraia loaloa tauna ese, turana dala ia hadikaia noho.

¹⁰Sisiba hereva tamona ese, laloa kehoa tauna dekenai aonega bada ia henia noho, to kavakava tauna be nega 100 idia botaia neganai, aonega sisina sibona do ia davaria.

¹¹Kara dika tauna ese dagedage ia tahua noho. Unai dainai unai tau koua totona, bogahisihisi diba lasi tauna ta do idia siaia lao.

¹²Bema oi ese bea hahine, iena natuna idia dadia vadaeni gauna do oi hedavari, unai be sisina dika. To kavakava tauna ese, kavakava kara ia karaia noho neganai, bema oi davaria, unai be dika momokani.

¹³Bema oi ese dika do oi karaia, namo ena davana totona, unai neganai dika ese, oiemu ruma do ia rakatania lasi momokani.

¹⁴Heai hamatamaia kara, be ranu bada gabuna ena magu makohia kara bamona. Unai dainai heai do ia vara lasi neganai, do oi raka siri.

¹⁵Kara dika tauna ia gwauraia maoro tauna, bona kara maoromaoro tauna ia gwauraia dika tauna, unai tau ruaosi be Lohiabada ese ia badu henidia momokani.

¹⁶Kavakava tauna ese, moni dekena amo diba do ia tahua be anina lasi. Namo ta do ia davaria lasi, badina be ia ese aonega ia ura henia lasi.

¹⁷Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.

¹⁸Laloa kehoa lasi tauna sibona ese do ia gwauhamata, tau ta ena abiatorehai davana do ia henia.

¹⁹Kara dika ia ura henia noho tauna ese, heai danu ia ura henia noho. Bema nega ibounai mai hekokoroku danu hereva oi gwauraia neganai, oi ese dika bada oi tahua noho.

²⁰Iena lalona ia gagevagageva tauna, be iena gaukara ena anina ia vara noho lasi. Iena malana ese koikoi ia gwauraia tauna, ese kerere do ia davaria.

²¹Kavakava merona ese iena tamana ena lalona ia hisihisi henia noho. Laloa kehoa lasi merona ena tamana be ia moale lasi.

²²Iena kudouna ia moale tauna ese namo ia havaraia noho, muramura namona bamona, to laloa metau tauna ese turia dika gorere ia havaraia noho.

²³Kota biaguna dikana ese, lalona veria moni ia abia hunia dekenai, ia ese kota maoromaorona do ia karaia lasi totona.

²⁴Laloa kehoa tauna ese aonega karadia edia dala ia tahua noho, to kavakava tauna be dala idauidau momo ia laloa noho, ia davaria diba lasi gaudia ia tahua noho.

²⁵Kavakava merona ese, iena tamana ena lalona ia hisihisi henia noho, bona ia ese ia havaraia hahine, ena lalona ia hadikaia noho.

²⁶Kara maoromaoro tauna idia panisia kara be namo lasi. Bema tau namona idia dadabaia, kota maoromaorona idia hadikaia unai.

²⁷Aonega tauna ese hereva momo ia gwauraia noho lasi, bona ia badu haraga lasi tauna, be mai ena lalona kehoa.

²⁸Kavakava tauna bema ia hereva lasi neganai, taunimanima do idia laloa ia be aonega tauna. Bema iena uduna ia hakapua neganai, do idia gwau ia be mai lalona tauna.