Read Buka Helaga (Hiri Motu) 1993 AONEGA HEREVADIA 18 Bible Online

AONEGA HEREVADIA 18 - Buka Helaga (Hiri Motu) 1993 bible

AONEGA HEREVADIA 18

¹Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.

²Kavakava tauna ese laloa kehoa ia moalelaia lasi, to ia ura ia sibona ena laloa do ia gwauraia, mai hekokoroku danu.

³Kara dika ese hemarai ia havaraia noho, bona bema hemarai karadia oi karaia neganai, taunimanima ese oi do idia negea.

⁴Aonega tauna ena hereva be momokani, bona laloa namodia dekenai idia honu, ranu dobudia idia honu neganai idia lohilohi, bona idia heau goada noho bamona.

⁵Kara dika tauna do oi gwauraia namo be dika, bona kerere lasi tauna do oi gwauraia kerere, unai danu be dika.

⁶Kavakava tauna ena hereva ese heai idia havaraia noho. Iena hereva dainai taunimanima do idia toreisi, bona botaia auna ena hisihisi do ia davaria.

⁷Kavakava tauna ena uduna ese ia do ia hadikaia, bona iena bibina ena hereva, be iena lauma ena tarapu gauna.

⁸Anina lasi kiki, tau ta ena ladana hadikaia totona, be ita ura bada, ani? Ia be mamina namo aniani bamona, bona ita ania haraga noho, ani?

⁹Gaukara dekenai ia lahedo tauna, be gau namodia ia hadikaia noho tauna hegeregerena.

¹⁰Lohiabada be kohoro goadana hegeregerena. Kara maoromaoro taudia be unuseni do idia heau vareai, bona do idia mauri noho.

¹¹Kohu momo tauna ena kohu bona moni, be hanua aukana hegeregerena ia dekenai, bona ia laloa idia be magu badana bamona, idia ese ia idia gimaia noho.

¹²Bema oi be manau neganai, taunimanima ese oi do idia hanamoa, to hekokoroku taudia edia dokona dekenai, dika momokani do idia davaria.

¹³Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.

¹⁴Tau ta do ia gorere neganai, do ia haheauka diba, to iena lauma ena goada ia ore neganai, tau be edena bamona do ia haheauka diba?

¹⁵Lalona kehoa tauna ese, nega ibounai diba ia davaria noho. Aonega tauna ese, danu nega ibounai diba ia tahua noho.

¹⁶Oi ura lohia tauna badana ta danu do oi hedavari? Harihari gauna ta do oi henia, vadaeni unai tau do oi davaria haraga.

¹⁷Kota lalonai hereva ia gwauraia tauna ginigunana, ena hereva ena mamina be momokani, vadaeni idia laloa inai hereva be ia uini. To gabeai tau ta ma ese ia tahua neganai, unai hereva ena mamina be idau, vadaeni idia diba lasi daika ia uini.

¹⁸Bema goada taudia rua ese idia kota neganai, laki gadara dekena amo unai kota idia hamaoromaoroa diba.

¹⁹Oiemu tadikakana do oi durua, vadaeni ia ese oi do ia gimaia, hanua ena magu aukana bamona. To bema oiemu tadikakana oi habadua neganai, emui turana kara do umui hamatamaia lou dalana be auka.

²⁰Mai aonega danu sisiba oi henia neganai, oiemu lalona ese goada ia abia noho, bona unai sisiba ena anina ia vara neganai, oi be do oi moale.

²¹Oiemu hereva ese mauri ia henia diba, bona mase ia mailaia diba. Oiemu hereva ese idia havaraia gaudia, be oi dekenai lalohisihisi o moale do idia henia.

²²Hahine do ia adavaia tauna ese, gau namona ia davaria inai. Lohiabada ese unai tau do ia hanamoa.

²³Ogogami tauna ese mai manau danu ia noinoi noho, to kohu momo tauna ese, mai hereva aukadia danu ia haere henia noho.

²⁴Turana haida be turana koikoi taudia sibona, to turana ta ia noho, iena turana kara, ese tadikaka ta ena lalokau ia hereaia noho.