Read Buka Helaga (Hiri Motu) 1993 AONEGA HEREVADIA 2 Bible Online

AONEGA HEREVADIA 2 - Buka Helaga (Hiri Motu) 1993 bible

AONEGA HEREVADIA 2

¹Egu natuna e, lau, aonega, egu hadibaia hereva do oi tahua, bona egu oda do oi laloaboio lasi.

²Aonega herevadia do oi kamonai, bona oiemu kudouna ese laloa kehoa do ia ura henia.

³Bema oi ese aonega totona oi noinoi, bona bema laloa kehoa totona oi boiboi goada,

⁴bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona,

⁵unai neganai Lohiabada gari henia kara do oi diba, bona Dirava do oi diba.

⁶Badina be Lohiabada ese aonega, be oi dekenai ia henia noho, bona iena uduna dekena amo, diba bona laloa kehoa idia mai noho.

⁷Dirava ese kara maoromaoro mai laloa momokani taudia, ia durua bona ia gimaia noho.

⁸Dirava ese, mai maoromaoro danu taunimanima idia durua taudia, be ia gimaia noho, bona iena helaga momokani taudia edia dala, be ia naria namonamo noho.

⁹Bema oi ese lau, aonega, dekenai oi kamonai henia neganai, oi be kara maoromaoro, kota maorona, bona davana korikori henia dalana do oi diba. Dala namodia ibounai karaia dalana danu do oi diba.

¹⁰Oi ese aonega do oi davaria, bona inai diba ese oiemu laumana do ia hamoalea.

¹¹Oiemu laloa kehoa bona oiemu diba maoro ese, oiemu mauri do idia naria namonamo,

¹²vadaeni kara dikadia dekena amo, oi do idia hamauria, ma edia hereva dekena amo kerere idia havaraia taudia, dekena amo danu oi do idia hamauria.

¹³Inai dika taudia ese, kara maoromaoro daladia idia rakatania, bona dibura daladia lalonai idia raka noho.

¹⁴Idia be kara dika karadia dekenai idia moale noho, bona kara dika ena dala gagevagageva, be idia ura henia bada noho.

¹⁵Edia kara ibounai be gagevagageva bona kerere.

¹⁶Aonega ese danu, heudahanai hahine dekena amo oi do ia hamauria, bona ariara hahine ena koikoi hereva dekena amo danu.

¹⁷Unai hahine ese iena adavana ia rakatania, bona Dirava ena vairana dekenai, ia gwauraia gwauhamata ia laloaboio.

¹⁸Bema iena ruma dekenai oi lao neganai, oi be mase dalana dekenai oi raka noho. Unai dala be mase taudia edia gabu, dekenai ia lao noho.

¹⁹Unai hahine dekenai idia lao taudia, be ta ese do ia giroa mai lasi mauri dalana dekenai.

²⁰Unai dainai taunimanima namodia, edia dala dekenai do oi raka, bona kara maoromaoro taudia edia dala do oi badinaia.

²¹Badina be kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani.

²²To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.