Read Buka Helaga (Hiri Motu) 1993 AONEGA HEREVADIA 20 Bible Online

AONEGA HEREVADIA 20 - Buka Helaga (Hiri Motu) 1993 bible

AONEGA HEREVADIA 20

¹Uaina bona kekero muramura ese, kerere bona heai idia havaraia noho. Inua kekero ese ia hakaua kerere taudia be kavakava.

²King ena badu do oi gari henia, ia boiboi noho laiona dekenai oi gari henia hegeregerena. Bema oi habadua neganai, oiemu mauri be ia ore.

³Heatu dekena amo ia raka siri tauna be do idia matauraia noho, to kavakava taudia ibounai do idia heai noho.

⁴Bema lahedo tauna ese, hadoa nega korikori dekenai iena tano ia hadoa lasi neganai, anina haboua neganai ia be do ia tahua, to gau ta do ia davaria lasi.

⁵Taunimanima edia laloa gaudia be hunia, ranu dobuna bamona, to mai ena diba bada tauna ese, unai laloa gaudia ia davaria diba.

⁶Taunimanima momo ese, sibodia edia kara momokani bona lalokau idia gwauraia noho, to kara momokani bona lalokau momokani tauna, be daika ese do ia davaria diba?

⁷Bema tamana ta be kara maoromaoro tauna, bona iena kara ibounai, be mai laloa maoromaoro danu ia karaia neganai, unai tau ena natuna taudia, be mai moale danu do idia noho.

⁸King ese kota gabuna dekenai ia helai noho, bona iena matana ese dika ibounai idia itaia noho.

⁹Daika do ia hereva diba, do ia gwau, “Egu lalona be ia maoromaoro noho, egu dika dekena amo lau be goeva vadaeni?”

¹⁰Metau tohoa sikele koikoidia, bona bada tohoa gaudia koikoidia, idia ruaosi idia gaukaralaia taudia dekenai, Lohiabada be ia badu momokani noho.

¹¹Mero maragina ese iena kara dekena amo, sibona ena mauri ia hedinaraia noho. Iena kara dekena amo do oi diba, unai mero ia goeva bona ia maoro, o lasi.

¹²Ia kamonai noho taiana, bona ia itaia noho matana, be Lohiabada ese idia ruaosi ia karaia vadaeni.

¹³Mahuta do oi ura henia lasi, do oi ogogami garina. Oiemu matana do oi kehoa, bona aniani hegeregerena do oi davaria.

¹⁴Gau ia hoia mai tauna ese, inai bamona ia gwau noho, “Inai be dika, inai be dika.” Gabeai ia raka lao, bona ia hoia gauna ia herevalaia mai hekokoroku danu.

¹⁵Bema oi herevalaia gauna ena anina oi diba momokani, inai diba ena namo ese, golo bona davana bada nadi edia namo ia hereaia noho.

¹⁶Bema tau ta ese, idau tauna ena abiatorehai totona gwauhamata ia karaia neganai, unai tau ena kouti, be gwauhamata toana totona do oi abia. Bona bema ia ese idau bese tauna totona, unai bamona gwauhamata ia karaia neganai, unai tau ena gau namona ta be do oi dogoatao momokani.

¹⁷Koikoi dekena amo ia abia aniani ena mamina be namo, ia abia tauna ena uduna lalonai, to gabeai iena uduna be miri dekenai do ia honu.

¹⁸Bema kara ta ena palani oi karaia neganai, sisiba namona do oi abia guna, bona tuari do oi karaia gwauraia neganai, sisiba namona do oi tahua guna.

¹⁹Taunimanima hadikaia totona hereva ia gwauraia tauna ese, hunia herevadia ia hunia lasi, to ia gwauraia hedinarai. Unai dainai hereva kavakava ia gwauraia noho tauna danu, do oi turana karaia lasi.

²⁰Bema oiemu tamana bona sinana oi hereva dika henia neganai, oiemu mauri be do ia doko, dibura lalonai lamepa ia bodo bamona.

²¹Bema tau ta ena tamana sinana burukadia do mauri noho neganai, ia ese edia kohu momo ia abia haraga neganai, dokona dekenai unai kara ena anina namona do ia vara lasi, badina Dirava ese unai kohu do ia hanamoa lasi.

²²Tau ta ena kara dika davana do oi henia lasi, to Lohiabada do oi abidadama henia, ia ese unai kara do ia hamaoromaoroa.

²³Metau tohoa sikele koikoidia bona bada tohoa gaudia koikoidia, idia ruaosi idia gaukaralaia taudia dekenai, Lohiabada be ia badu momokani noho.

²⁴Iseda raka be Lohiabada ese ia hakaua bona naria noho. Unai dainai edena bamona ita sibona ese, iseda mauri ena dala do ita diba?

²⁵Bema gau ta Lohiabada dekenai do oi henia, ena gwauhamata do oi karaia gwauraia neganai, do oi laloa namonamo guna. Gabeai, bema oi karaia lasi neganai, sedira oiemu lalona be do ia hisihisi.

²⁶King mai ena aonega ese, dika taudia do ia tahua bona davaria, bona ia ese edia dika ena davana, do ia henia momokani.

²⁷Lohiabada ena lamepa ese taunimanima edia laumadia ia tahua noho, bona tau ta ese iena lalona ia hunia diba lasi.

²⁸Bema mai lalokau, kota maoromaoro, bona kara momokani danu, iena basileia ia naria noho neganai, king ese iena king siahuna do ia dogoatao noho, ela bona nega daudau.

²⁹Eregabe taudia edia hairaina be edia goada. To buruka taudia edia hairaina be edia huina kurokuro.

³⁰Kwadia bona bero ese dika idia huria ore noho. Idia dadabaia vadaeni taudia edia lalodia be do idia goeva.