Read Buka Helaga (Hiri Motu) 1993 AONEGA HEREVADIA 22 Bible Online

AONEGA HEREVADIA 22 - Buka Helaga (Hiri Motu) 1993 bible

AONEGA HEREVADIA 22

¹Ladana namona tauna ese, kohu momo tauna ia hereaia noho. Bema ladana namo bona kohu momo ruaosi, edia huanai ta oi abia hidi neganai, ladana namona do oi abia hidi.

²Kohu momo tauna bona ogogami tauna, be dala ta dekenai edia mauri be tamona. Gauna be inai: Lohiabada ese idia ruaosi ia karaia.

³Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.

⁴Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.

⁵Tau dikana ena mauri dalana dekenai be hekwakwanai, bona tarapu idia noho, to iena lauma ia naria noho tauna, be unai gaudia dekena amo ia raka siri noho.

⁶Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.

⁷Kohu momo tauna ese ogogami tauna ia biagua noho, bona moni ia abiatorehai tauna ese, heniatorehai tauna ena hesiai gaukara ia karaia noho.

⁸Kara kerere ia hadoa tauna ese, ena anina, dika momokani, do ia davaria, bona ia ese taunimanima ia dagedage henia vadaeni dainai, Dirava ese ia do ia hadikaia ore.

⁹Gau bona aniani be ogogami taudia dekenai do oi henia, badina Dirava ese, unai bamona idia karaia taudia do ia hanamoa.

¹⁰Hekokoroku tauna, hereva dika ia gwauraia noho tauna, be do umui lulua siri, vadaeni heai do ia ore, heatu, bona ladana hadikaia hereva, danu do idia doko.

¹¹Bema laloa goevagoeva oi ura henia, bona oi hereva manada neganai, oi be king ena turana do oi lao.

¹²Lohiabada ese aonega hereva ia itaia noho, bona ia durua noho, to koikoi taudia edia hereva ia koua noho.

¹³Lahedo tauna be ruma dekenai ia helai noho. Ia gwau, “Bema murimurina dekenai lau lao neganai, laiona ta ese lau do ia alaia mase.”

¹⁴Heudahanai kara be tarapu dobuna bamona. Lohiabada ese ia badu henia noho taudia, be unai tarapu lalonai do idia moru momokani.

¹⁵Natuna maragidia ibounai ese kavakava idia karaia noho, to emu natuna oi kwadia neganai, inai kavakava kara do ia rakatania momokani.

¹⁶Bema ogogami taudia oi dagedage henia, oi sibona kohu momo do oi abia totona, o bema kohu momo taudia dekenai, harihari gaudia oi henia neganai, oi sibona be do oi ogogami.

¹⁷Oiemu taiana do oi kehoa, aonega taudia edia hereva do oi kamonai. Edia hadibaia hereva oiemu kudouna dekenai do oi abia dae.

¹⁸Badina bema emu kudouna lalonai inai hereva oi dogoatao, bona idia oi gwauraia diba neganai, lalo namo do oi davaria.

¹⁹Lau ura oi ese Lohiabada do oi abidadama henia. Unai dainai hari dina, inai hereva oi dekenai lau hadibaia noho.

²⁰Sisiba bona aonega hereva ibounai 30, be oi dekenai lau torea vadaeni,

²¹bona idia ese kara maoromaoro bona kara momokani, oi dekenai do idia hadibaia. Vadaeni oi ia siaia tauna dekenai oi giroa lou neganai, haere maorodia do oi henia.

²²Ogogami taudia dekena amo do oi henaoa lasi, badina idia be ogogami, bona gau lasi taudia be kota lalonai, do oi hadikadia ore lasi.

²³Badina be Lohiabada ese edia kota hereva do ia durua, bona edia kohu ia henaoa tauna do ia alaia mase.

²⁴Badu haraga tauna danu do oi turana karaia lasi, bona dagedage tauna danu do oi noho lasi,

²⁵edia dala dekenai do oi manada garina, bona idia be tarapu oi dekenai garina.

²⁶Tau ta ena abiatorehai henia lou gwauhamata, be do oi karaia lasi,

²⁷badina be bema unai moni oi henia lasi neganai, oiemu mahuta patana do idia abia lao.

²⁸Tano ena hetoana gunana, oiemu sene taudia idia atoa gauna, be do oi kokia lao lasi.

²⁹Iena gaukara ia karaia namonamo tauna oi itaia noho, a? Ia ese taunimanima momo ia hereaia noho, bona ia ese king taudia edia vairana dekenai do ia gini.