Read Buka Helaga (Hiri Motu) 1993 AONEGA HEREVADIA 26 Bible Online

AONEGA HEREVADIA 26 - Buka Helaga (Hiri Motu) 1993 bible

AONEGA HEREVADIA 26

¹Kavakava tauna do idia matauraia be hegeregere lasi, sinou ia moru siahu neganai, o medu ia diho anina utua neganai bamona.

²Bisini manu ia roho loaloa noho, o aibisi manu ia roho lao noho hegeregerena, hereva dika mai badina lasi, be gabu ta dekenai do ia kamokau noho lasi. Vadaeni mai ena kerere lasi tauna, be hereva dika ese ia hadikaia diba lasi.

³Hosi be kwadia varona dekenai do oi kwadia, doniki be hakaua varona dekenai do oi kwadia, bona kavakava tauna ena doruna, be kwadia auna dekenai do oi kwadia.

⁴Kavakava tauna be, iena kavakava hegeregerena do oi haere henia lasi, ia danu do oi hegeregere garina.

⁵Ma kavakava tauna be, iena kavakava hegeregerena do oi haere henia, ia sibona do ia laloa ia be mai ena aonega garina.

⁶Bema kavakava tauna oi siaia, hereva do ia gwauraia totona, unai be oiemu aena oi utua oho, o poisini do oi inua bamona.

⁷Aonega hereva, kavakava tauna ena uduna dekenai, be anina lasi, aena dika tauna ena aena be anina lasi hegeregerena.

⁸Bema kavakava tauna oi matauraia neganai, unai be nadi negea varona dekenai, nadi oi kwatua kau bamona.

⁹Aonega hereva ena anina, be kavakava tauna ese ia gwauraia neganai be, kekero tauna ese, iena imana ia gwadaia ginigini ia kokia toho bamona.

¹⁰Biaguna ta, iena gaukara karaia totona, bema kavakava tauna o kekero tauna ia abia hidi, be peva tauna taunimanima ibounai ia haberoa kava noho bamona.

¹¹Kavakava tauna ese, iena kara kava ma ia karaia lou noho, iena mumuta dekenai ia giroa lou noho sisia bamona.

¹²Tau ta oi itaia, ia sibona aonega ia gwauraia noho? Kavakava tauna be sisina ia namo, to unai tau be ia namo diba lasi.

¹³Lahedo tauna be badina dahaka iena ruma ia rakatania lasi? Ia be dahaka dekenai ia gari? Laiona dekenai ia gari, a?

¹⁴Iduara ese iena hinisi ia rakatania lasi hegeregerena, lahedo tauna ese iena mahuta patana ia rakatania lasi.

¹⁵Taunimanima haida be lahedo momo dainai, sibodia edia uduna dekenai aniani idia atoa lasi.

¹⁶Lahedo tauna sibona ia laloa iena aonega ese, tau 7 edia aonega ia hereaia noho. Edia laloa kehoa bona haere namodia, be gau ta lasi, ia gwau.

¹⁷Tau haida edia heai lalonai ia vareai noho tauna, be ia raka hanaia tauna ese, sisia ena taiana ia dogoatao noho bamona.

¹⁸Tau ta ese iena badibadinai tauna ia koia, bona ia gwau ia hevaseha sibona, be kavakava tauna ese diba bona lahi, mase gaudia, ia pidia bona negea noho kava bamona.

²⁰Bema au be lasi neganai, lahi be ia bodo noho, bona bema hadikaia hereva be lasi neganai, heai be do ia doko.

²¹Gida ese guma idia hasiahua noho, au ese lahi ia habadaia noho, bona badu haraga tauna ese heai ia havaraia noho.

²²Anina lasi kiki, tau ta ena ladana hadikaia totona, be ita ura bada, ani? Ia be mamina namo aniani bamona, bona ita ania haraga noho, ani?

²³Hereva manada ia gwauraia, to iena lalona be dika tauna, be uro dikana mai ena kopina siliva manadana bamona.

²⁴Badu tauna ese hereva manada dekenai, iena badu ia hunia noho, to iena kudouna lalonai be koikoi ia noho,

²⁵vadaeni bema hereva manada ia gwauraia neganai, do oi kamonai henia lasi, badina be iena kudouna, be badu dekenai ia honu momokani.

²⁶Momokani, iena badu ia hunia noho, to gabeai iena dika, be taunimanima edia hebou lalonai do ia hedinaraia.

²⁷Guri ia geia, haida be ia lalonai do idia moru totona tauna, be ia sibona unai guri lalonai do ia moru. Bona nadi ia keia hamatamaia tauna, be ia sibona unai nadi ese do ia hadikaia ore.

²⁸Koikoi ia gwauraia tauna ese, ia koia taudia ia badu henidia noho, bona hanamoa koikoi hereva ia gwauraia noho tauna ese, dika momokani ia havaraia noho.