Read Buka Helaga (Hiri Motu) 1993 AONEGA HEREVADIA 28 Bible Online

AONEGA HEREVADIA 28 - Buka Helaga (Hiri Motu) 1993 bible

AONEGA HEREVADIA 28

¹Kara dika taudia be ta ese, ia luludia lasi neganai idia heau kava noho, to kara maoromaoro taudia be idia gari lasi noho, laiona bamona.

²Basileia ta ena taunimanima bema idia kara dika neganai, unai basileia ena king be momo, to aonega bona laloa kehoa tauna ese ia gunalaia neganai, basileia be nega daudau do ia gini goada noho.

³Bema ogogami tauna ta ese, ogogami tauna ma ta ia dagedage henia, unai dagedage tauna be medu dikana, aniani ia hadikaia meduna, bamona.

⁴Bema taravatu oi rakatania, oi ese kara dika taudia oi hanamoa noho, to taravatu oi badinaia neganai, oi ese kara dika taudia oi heatu henidia noho.

⁵Kara dika taudia be kota maoromaoro ena anina idia diba lasi, to Lohiabada idia tahua noho taudia ese, kota maoromaoro idia diba momokani.

⁶Ogogami tauna be iena kara maoromaoro dekenai ia noho be namo, to kohu momo tauna be iena kara koikoi dekenai ia noho be dika.

⁷Taravatu ia badinaia noho merona be aonega merona, to heatu kava taudia danu ia turana karaia merona, ese iena tamana ia hahemaraia noho.

⁸Bema atoa kau moni dekena amo, oiemu kohu do oi habadaia neganai, unai oi haboua vadaeni kohu be, ogogami taudia ia bogahisihisi henia tauna ta ese do ia abia.

⁹Bema Dirava ena taravatu ita kamonai henia lasi, ia ese iseda guriguri do ia kamonai henia lasi.

¹⁰Kara maoromaoro taudia, bema tau ta ese kara dika ena dala dekenai ia hakaudia kerere, unai tau be sibona ena guri lalonai do ia moru diho, to kerere lasi taudia ese davana namona do idia davaria.

¹¹Kohu momo taudia ese, idia laloa idia be aonega taudia, to ogogami tauna mai ena laloa kehoa ese, unai taudia edia kara momokani ia diba.

¹²Kara maoromaoro taudia idia kwalimu noho neganai, taunimanima idia moale bada noho, to kara dika taudia idia toreisi noho neganai, taunimanima be idia hunia noho.

¹³Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.

¹⁴Nega ibounai Lohiabada do oi gari henia, vadaeni do oi moale, to bema oiemu kudouna oi ha-aukaia neganai, dika momokani do oi davaria.

¹⁵King dikana ese ogogami taudia ia biagua, be laiona ia boiboi noho, o bea ia dagedage noho bamona.

¹⁶King mai ena laloa kehoa lasi ese, taunimanima ia hisihisi henidia bada noho. To ia ura lasi koikoi dekena amo, kohu do ia abia tauna, be nega daudau, dina momo, do ia mauri noho.

¹⁷Tau ta ese ma tau ta ia alaia mase neganai, unai ala-ala tauna be heau tauna do ia lao, ela bona ia mase. Tau ta ese ia do ia durua lasi.

¹⁸Kara maoromaoro dalana dekenai ia raka noho tauna, be do ia mauri, to kara kerere tauna, be guri lalonai do ia moru diho haragaharaga.

¹⁹Iena tano dekenai ia gaukara auka tauna ese, aniani momo do ia ania, to anina lasi karadia ia karaia noho tauna, be do ia ogogami momokani.

²⁰Kara maoromaoro tauna ese, gau namodia momo do ia davaria, to bema kohu momo oi tahua haraga haraga, oi ese matakani do oi davaria.

²¹Taunimanima ibounai maka tamona do oi kara henidia lasi, be kara dika, bona kota biagudia haida ese, beredi tamona ena davana totona kerere do idia karaia.

²²Ena moni sibona ia laloa tauna ese, ia ura kohu momo do ia davaria haraga, to ia diba lasi ogogami ese do ia davaria.

²³Tau ta ia sisiba henia tauna ese, gabeai lalo namo bada do ia abia, to iena uduna dekenai ia hanamoa koikoi tauna ese, lalo namo maragi sibona do ia abia.

²⁴Iena tamana o sinana ena gau ia henaoa noho, bona ia gwau, “Inai be kerere lasi”, be ala-ala tauna ena turana.

²⁵Hekokoroku tauna ese heai ia havaraia noho, to Lohiabada ia abidadama henia noho tauna ese, kohu momo do ia davaria.

²⁶Sibona ena lalona dekenai ia abidadama henia tauna be kavakava, to aonega ena dala dekenai ia raka tauna, be do ia mauri.

²⁷Ogogami taudia dekenai durua do oi henia, bona do oi ogogami lasi, to bema ogogami taudia dekenai, oiemu matana oi koua neganai, taunimanima ese hereva dika mai badu danu, oiemu latanai do idia gwauraia.

²⁸Kara dika taudia ese, basileia naria siahu idia abia neganai, taunimanima be do idia hunia, to unai kara dika taudia idia mase neganai, kara maoromaoro taudia be, ma momo do idia noho.