Read Buka Helaga (Hiri Motu) 1993 AONEGA HEREVADIA 30 Bible Online

AONEGA HEREVADIA 30 - Buka Helaga (Hiri Motu) 1993 bible

AONEGA HEREVADIA 30

¹Aguru Iake, ena peroveta hereva be inai: “Dirava e, lau hesiku noho, lau hesiku noho, Dirava e, egu goada ia ore vadaeni.

²“Momokani, lau be kavakava maragi lasi. Lau be taunimanima bamona lasi. Egu lalona be taunimanima edia lalona bamona lasi.

³Aonega be lau davaria lasi, Helaga ena Dirava danu lau diba lasi.

⁴Daika be guba dekenai ia daekau lao vadaeni, bona ma ia diho mai? Daika ese lai be iena imana lalonai ia dogoatao vadaeni? Daika ese davara be iena dabua dekena amo, ia kumia vadaeni? Daika ese tanobada ena hetoa gabudia ia atoa vadaeni? Iena ladana be daika, bona iena natuna edia ladadia be daika? Momokani oi diba, ani?

⁵“Dirava ena hereva ibounai be goeva momokani, bona Dirava ese ia dekenai idia heau mauri taudia, ia naria bona gimaia noho.

⁶Dirava ena hereva edia latanai, be hereva ta do oi atoa kau lasi, ia ese oi do ia gwau henia, bona oiemu koikoi do ia hedinaraia garina.

⁷“Lohiabada e, gau rua oi dekenai lau noia, lau do mase lasi neganai, mani idia ruaosi lau dekenai do oi henia:

⁸Koikoi kara bona koikoi hereva, be lau dekena amo do oi abia siri, bona ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia.

⁹Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’ O sedira bema lau ogogami neganai do lau henaoa, bona egu Dirava ena ladana do lau hahemaraia garina.

¹⁰“Hesiai tauna be iena biaguna dekenai do oi samania koikoi lasi, ia ese iena hereva dekena amo oi do ia hadikaia, bona kerere do oi davaria garina.

¹¹“Tau haida ese edia tamadia idia hereva dika henia noho, bona idia ese edia sinadia idia hanamoa lasi.

¹²Ma tau haida ese, sibodia idia gwauraia idia be goeva momokani, to gau be, edia miro ia bada momokani.

¹³Ma haida be edia matadia dekena amo, edia hekokoroku idia hedinaraia noho. Edia matadia huina idia abia isi noho, mai hekokoroku danu.

¹⁴Ma haida edia isedia be tuari kaia, edia aukidia dekenai be kaia idia noho. Idia ese ogogami taudia, be tanobada dekena amo idia ania ore noho, bona gau lasi taudia be, taunimanima edia huanai dekena amo idia anidia ore danu.

¹⁵“Doma ta be mai ena natuna hahine rua. Idia boiboi noho, idia gwau, ‘Ai dekenai henia, ai dekenai henia!’ “Gau 4 edia bogadia idia kunu diba lasi: Idia be nega ta, ‘Vadaeni’ idia gwauraia diba lasi.

¹⁶Gaudia be inai: Mase taudia edia gabu. Hahine ta, madi mai ena natuna lasi. Tano kaukau, medu ia diho lasi dainai, bona lahi, nega ta ‘Vadaeni’ ia gwauraia lasi.

¹⁷“Iena tamana ena ladana dekenai ia hevaseha tauna, o iena sinana ia kamonai henia lasi tauna, be galo manu ese iena matana do ia gwadaia, bona ugava manu ese unai tau do idia ania ore.

¹⁸“Gau 4 be mai edia hoa lau dekenai, edia dala be lau diba lasi. Gaudia be inai: Ugava ena roho dalana guba dekenai.

¹⁹Gaigai ena heau dalana nadi badana ena latanai. Lagatoi ena dala, davara badana dekenai. Bona uhau tauna ena dala, kekeni ia ura henia neganai.

²⁰“Heudahanai hahine ena dala be inai: Ia aniani, vadaeni iena uduna ia dahua. Unai murinai ia gwau, ‘Kerere ta lau karaia lasi.’

²¹“Gau 4 dekenai tanobada taudia idia haheauka diba lasi,

²²gaudia be inai: Hesiai mai guia danu tauna, king ena dagi ia abia neganai. Kavakava tauna, iena ura henia aniani ibounai ia ania neganai.

²³Badu hahinena ta, ia headava neganai, bona hesiai kekeni, iena biaguna hahine ena gabu ia abia neganai.

²⁴“Gau 4 be tanobada dekenai idia maragi momokani, to idia be aonega herea:

²⁵Dimairi be goada lasi, to edia aniani be tano lalonai idia haboua noho.

²⁶Mada danu be goada lasi, to edia ruma be tano lalonai idia karaia noho.

²⁷Kwadi be mai edia king lasi, to idia raka hebou noho, tuari orea bamona.

²⁸Vaboha be oiemu imana dekenai oi dogoatao diba, to ia be king edia ruma lalonai ia noho.

²⁹“Gau 4 edia raka ena toana be namo herea,

³⁰gaudia be inai: Laiona, uda gaudia edia huanai ia sibona be namo herea, bona goada gauna ta dekena amo do ia heau lasi.

³¹Bona kokoroku tau, bona nanigosi tau, bona king ta, iena tuari orea ia gunalaia noho neganai.

³²“Bema oi sibona mai kavakava danu oi hekokoroku, bona kara dika karaia dalana oi laloa neganai, oiemu imana dekena amo oiemu uduna do oi koua!

³³Badina be rata do oi giroagiroa neganai, bata do oi davaria, bona udu baubauna do oi gigia neganai, rara do ia diho. Bona badu do oi hatoreisia neganai, heai do ia vara.”