Read Buka Helaga (Hiri Motu) 1993 AONEGA HEREVADIA 5 Bible Online

AONEGA HEREVADIA 5 - Buka Helaga (Hiri Motu) 1993 bible

AONEGA HEREVADIA 5

¹Egu natuna tau e, egu aonega bona laloa kehoa dekenai, do oi kamonai bona laloa namonamo.

²Unai neganai kara maorodia do oi karaia, bona oiemu hereva ese, oiemu diba namona do idia hedinaraia.

³Sedira tau ma ta ena adavana ena bibina, be gaiho momokani, hani bamona, bona iena hereva ena digarana ese, dehoro ena digarana idia hereaia,

⁴to gabeai, unai hahine ena mamina oi dekenai, be dika, mamina dika muramura bamona, mai matana momokani, isena ruaosi idia segea tuari kaia bamona.

⁵Unai hahine ese mase taudia edia gabu dekenai, oi do ia hakaua lao. Mase dekenai ia lao dalana dekenai ia raka noho.

⁶Mauri dalana be unai hahine ese ia laloa lasi, to ia raka kava, raka kava noho, bona iena dala ia diba lasi.

⁷Egu natuna tau e, lau dekenai do oi kamonai. Egu hereva gaudia do oi rakatania lasi.

⁸Unai bamona hahine dekena amo do oi raka siri. Iena ruma ena iduara kahirakahira do oi lao lasi,

⁹oi ese oiemu goada, be idau taudia dekenai do oi henia garina, bona oiemu mauri lagani, be bogahisihisi lasi taudia ese do idia hakwadogia garina.

¹⁰Io, idau taudia ese oiemu kohu dainai do idia goada, bona oiemu hekwarahi ena anina ese, idau tauna ena ruma do ia hanamoa garina,

¹¹ela bona oiemu mauri ena dokona dekenai do oi taitai, oiemu hidiona bona oiemu tauanina, be do idia ore lao neganai.

¹²Unai neganai do oi gwau, “Badina dahaka matakani lau negea, bona edena bamona sisiba hereva lau ura henia lasi?

¹³Lau ese egu hadibaia taudia edia hereva lau kamonai lasi, bona lau dekenai sisiba ia henia tauna, ena hereva lau abia dae lasi.

¹⁴Unai dainai harihari taunimanima ibounai edia vairana dekenai, dika bona hemarai lau davaria inai.”

¹⁵Oiemu adavana korikori dekenai do oi kara momokani, bona ia sibona do oi ura henia.

¹⁶Bema idau hahine dekena amo natudia do oi havaraia, unai natudia ese oiemu noho do idia hanamoa lasi.

¹⁷Oiemu natuna ese oi sibona do idia durua be namo, idau taudia lasi.

¹⁸Unai dainai oiemu adavana korikori danu do umui moale, bona oiemu eregabe dinadia neganai, oi adavaia hahine do oi moalelaia.

¹⁹Ia be dia hahine, bona dia ena natuna namo herea bamona oi dekenai. Do oi ura henia momokani, vadaeni iena ratana ese oi do idia hamoalea nega ibounai. Iena lalokau dekenai do oi moale bada noho hanaihanai.

²⁰Egu natuna e, anina be dahaka idau hahine dekenai do oi ura henia? Badina be dahaka tau ma ta ena adavana do oi rosia?

²¹Badina be tau ta ta edia kara be Lohiabada ese ia itaia noho. Lohiabada ese taunimanima ta ta ibounai, edia dala ibounai ia tahua noho.

²²Kara dika tauna ena kara dika be tarapu, bona unai tarapu, sibona ia karaia kara dikadia, ese unai tau do idia abia, do idia hadikaia.

²³Matakani ena sisiba momokani ia kamonai henia lasi, unai dainai unai tau ia mase noho. Iena kavakava bada herea dainai, unai tau ia boio vadaeni.