Read Buka Helaga (Hiri Motu) 1993 HADIBAIA TAUNA 10 Bible Online

HADIBAIA TAUNA 10 - Buka Helaga (Hiri Motu) 1993 bible

HADIBAIA TAUNA 10

¹Bema muramura mai ena bonana namo lalonai, lao idia mase neganai, unai muramura ena bonana do ia dika. Unai bamona danu, kavakava sisina ese aonega, bona taunimanima matauraia kara ia hadikaia noho.

²Aonega tauna ena kudouna ena laloa ese kara maoromaoro dekenai ia hakaua noho. To kavakava tauna ena kudouna ena laloa ese kara kerere dekenai ia hakaua noho.

³Ia be dala dekenai ia raka noho neganai, kavakava tauna ese iena kavakava ia hedinaraia noho. Ibounai ese iena kavakava idia itaia noho.

⁴Bema oiemu king ia badu oi dekenai, oiemu gaukara gabuna do oi rakatania lasi. Mai manau danu iena ura do oi karaia, iena badu do ia keru lao totona.

⁵Dika ta lau itaia vadaeni, ma inai dika be king taudia bona gunalaia taudia ese idia havaraia,

⁶dika be inai: King ese kavakava taudia dekenai dagi badadia idia henia, to kohu momo taudia ese dagi maragidia idia abia.

⁷Hesiai mai guia danu taudia, hosi edia latanai idia helai lau itaia, to lohia taudia be aena dekenai idia raka, hesiai mai guia danu taudia bamona.

⁸Guri ia geia tauna, be unai guri ena lalonai do ia moru, bona magu ia makohia tauna, be gaigai ese do ia koria.

⁹Bema nadi ia utua neganai, tau ta ese bero do ia davaria, bona bema au ia siria neganai, au ese iena kopina do ia hadikaia.

¹⁰Bema oiemu ira be mai matana lasi, bona bema oi segea lasi neganai, oiemu hekwarahi be do ia bada. Aonega dalana be, emu gaukara ena palani do oi karaia guna.

¹¹Gaigai ia hamanadaia tauna, bema gaigai ese ia koria neganai, unai tau ese profit moni do ia abia lasi.

¹²Aonega tauna ese iena hereva dekena amo taunimanima edia hanamoa ia abia noho. To kavakava tauna ena hereva ese ia do idia hadikaia ore.

¹³Hamatamaia neganai iena hereva be kavakava, bona dokona neganai danu, iena hereva be kava bona dika momokani.

¹⁴Bona kavakava tauna ena hereva be momo. Tau ta ia diba lasi dahaka dohore ia vara, bona ita mase murinai dahaka do ia vara, be tau ta ese ita ia hadibaia diba lasi.

¹⁵Kavakava tauna ena hekwarahi dainai ia hesiku noho, bona unai dainai iena ruma dekenai giroa lou dalana ia diba lasi.

¹⁶Bema tano ta ena king be mero sibona, bona iena lohia taudia idia inuinu kekero ela bona dabai, unai tano madi be do ia dika.

¹⁷To tano ta, bema iena king be king besena korikori tauna, bona iena lohia taudia be nega korikori dekenai idia aniani, goada abia totona, bona kekero totona lasi, unai tano be do ia namo.

¹⁸Bema tau ta ia lahedo dainai guhi ia hanamoa lasi, medu be ruma lalonai do ia vareai, bona ruma ena guhi do ia moru momokani.

¹⁹Aria ena aniani ese tau ena lalona ia hanamoa, bona uaina ese ia hamoalea noho, to moni ese gau ibounai ia havaraia noho.

²⁰Oiemu lalona dekenai king do oi gwauraia kerere lasi, bona oiemu mahuta gabuna dekenai kohu momo taudia do oi hereva dika henia lasi. Badina be ataiai manuna ta ese oiemu hereva sedira do ia huaia lao, taunimanima dekenai oiemu laloa gauna do ia gwauraia hedinarai garina.