Read Buka Helaga (Hiri Motu) 1993 HADIBAIA TAUNA 8 Bible Online

HADIBAIA TAUNA 8 - Buka Helaga (Hiri Motu) 1993 bible

HADIBAIA TAUNA 8

¹Aonega tauna sibona ese, idia vara noho karadia edia anina ia diba. Aonega ese, tau ena vairana auka ia kokia, bona aonega ese, kiri namona be iena uduna dekenai ia atoa.

²King ena oda do oi kamonai henia, Dirava dekenai unai bamona oi gwauhamata dainai.

³King ena vairana dekena amo do oi raka siri haraga lasi. Bona bema iena gaukara ena mamina be dika oi dekenai, to do oi hereva babubadu lasi, badina king ese iena ura ibounai do ia karaia momokani.

⁴King ena hereva be mai siahu danu, bona tau ta ese king dekenai inai bamona do ia hereva diba lasi, “Dahaka oi karaia noho?”

⁵Bema king ena oda oi kamonai henia neganai, oiemu noho be do ia namo, gari ta lasi. Bona aonega tauna be do ia diba king ena oda be edena negai, bona edena bamona, do ia karaia.

⁶Badina be gaukara ibounai be mai edia nega, bona mai edia dala, to taunimanima be mai edia laloa hekwarahi metau herea,

⁷badina be ita diba lasi dahaka do ia vara, bona daika ese ita do ia hadibaia dahaka do ia vara?

⁸Mase neganai, iseda lauma ese iseda tauanina ia rakatania, bona iseda lauma ita dogoatao noho diba lasi, badina ita ese iseda mase dina ita koua diba lasi. Tuari lalonai, opesa ia itaia namonamo, vadaeni iena tuari taudia ta ese tuari do ia rakatania diba lasi. Unai bamona danu, bema tau ta ese dika ia badinaia noho, inai dika ese unai tau do ia guia momokani, vadaeni ia ese do ia rakatania diba lasi.

⁹Inai kara ibounai lau itaia, inai tanobada dekenai idia vara gaudia lau laloa neganai. Lau itaia danu, taunimanima haida ese ma haida idia biagua noho, bona idia hisihisi henidia noho.

¹⁰Inai danu lau itaia: Kara dika taudia be idia guria, inai dika taudia be guna idia ese gabu helagana dekenai idia raka vareai, bona hanua taudia ese guria gabuna dekenai, inai dika taudia idia hanamodia, edia kara dainai. Inai kara danu be anina lasi.

¹¹Kara dika ena davana be idia henia haraga lasi dainai, taunimanima ese, edia kudoudia dekenai kara dika idia ura henia bada noho.

¹²Momokani, kara dika tauna be nega 100 do ia kara dika, bona iena mauri do ia daudau noho, to lau diba momokani, Dirava idia gari henia taudia be do idia namo, idia ese Dirava idia matauraia noho dainai.

¹³To kara dika tauna be do ia namo lasi, iena mauri be do ia ore haraga, laulau bamona, badina be ia ese Dirava ia gari henia lasi.

¹⁴To kara ta tanobada dekenai be anina lasi: Nega haida kara namo taudia ese kara dika taudia edia davana dikana idia abia noho, bona kara dika taudia ese kara namo taudia edia davana namona idia abia noho. Lau laloa inai danu be anina lasi.

¹⁵Unai dainai lau laloa tau ese iena mauri do ia moalelaia be namo, badina ia be mai ena gau namona ta lasi, to aniani, inuinu, bona moale sibona. Iena hekwarahi ia karaia neganai, bema inai moale be ia dekenai ia noho, unai tau ena noho be namo sisina, Dirava ese ia henia mauri dinadia lalonai.

¹⁶Lau ese aonega lau tahua, bona inai tanobada dekenai taunimanima ese idia karaia noho gaukara lau itaia, bona unai edia gaukara dainai, dina bona hanuaboi idia mahuta lasi.

¹⁷Unai neganai egu lalona ia kehoa, ita taunimanima ese Dirava ena kara ibounai edia anina, be ita davaria diba lasi. Do ita tahua auka, mai hekwarahi danu, to tanobada dekenai idia vara noho gaudia edia anina do ita davaria diba lasi. Sedira aonega taudia do idia gwau idia diba, to idia diba momokani lasi.