Read Buka Helaga (Hiri Motu) 1993 ISAIA 17 Bible Online

ISAIA 17 - Buka Helaga (Hiri Motu) 1993 bible

ISAIA 17

¹Lohiabada ia gwau, “Damaseko be do ia dika, hanua badana do ia noho lasi. Nadi haboua gabuna, bona nadi kavakava gabuna do ia lao.

²Suria ena hanuadia dekenai, taunimanima do idia noho lasi. Mamoe be unai gabudia dekenai do idia aniani, bona unuseni do idia hekure diho. Tau ta ese do ia luludia siri lasi.

³Eparaima ena hanua goadana mai ena maguna, be do ia boio ore, bona Damaseko ena basileia danu do ia ore. Suria taudia, do mauri noho taudia danu do idia boio, Israela taudia edia hairai idia boio vadaeni hegeregerena.” Siahu Ibounai Lohiabada ese unai bamona ia gwauraia noho.

⁴Lohiabada ia gwau, “Unai dina dekenai, Iakobo ena hairai do ia maragi lao. Israela ena tauanina do ia maragi lao.

⁵Israela be anina lasi gabuna do idia halaoa, uiti tano, iena anina idia utua bona haboua ore bamona, o uiti anina momoru gaudia, Repaima Koura dekenai idia gogoa bamona.

⁶Israela taudia tamona tamona sibona do idia mauri noho, olive auna idia kwadia neganai bamona, huahua rua o toi sibona, be ataiai rigidia dekenai idia do noho, o henunai rigidia dekenai, olive huahua 4 o 5 sibona idia noho bamona. Lau Lohiabada, Israela ena Dirava lau hereva vadaeni.”

⁷Unai dina dekenai, taunimanima ese, idia ia karaia Diravana do idia laloa, bona durua totona Israela ena Helaga Diravana do idia noia.

⁸Edia boubou patadia, edia imadia dekenai idia karaia gaudia do idia laloa lasi. Bona ima kwakikwakidia dekenai idia karaia gaudia, Asera hahine dirava ena kaivakuku, bona ena bonana namo boubou patadia do idia laloa lasi momokani.

⁹Unai dina ia ginidae neganai, Israela taudia edia hanua goadadia bona aukadia be edia taunimanima ese do idia rakatania kava. Unai hanua be gunaguna Hivi taudia bona Amoro taudia edia, to Israela taudia ese idia luludia neganai idia rakatanidia kava. Unai neganai, bona hari danu Israela taudia ese unai hanua idia rakatania neganai, tano be ia dika lao momokani.

¹⁰Badina be umui ese, umui ia hamauria Dirava, be umui laloaboio vadaeni, bona emui Nadi Badana, emui kohoro, umui laloatao lasi. To umui ese uma gabudia helagadia umui hadoa, idau bese taudia edia dirava, do umui tomadiho henia totona.

¹¹Sedira umui ese unai uma umui hadoa dinadia dekenai, be do idia tubu namonamo, to dokona neganai, anina do idia vara lasi. Kerere bona hanamoa diba lasi hisihisi sibona do ia vara.

¹²Itaia, tuari orea badadia, bese idauidau momo idia mai noho, mai edia regena bada danu. Regena be davara ena hurehure momo bamona. Kamonai, basileia idauidau edia regena, be ranu badadia idia marere momo, edia regena bamona.

¹³Momokani basileia idauidau, be hurehure badadia bamona, idia heau mai haraga noho, to Dirava ese idia do ia gwau henia. Vadaeni idia be do idia giroa lou lao, lai ese momoru be ororo dekena amo, ia hodaia lao ore bamona.

¹⁴Adorahi neganai Israela taudia, be mai gari bada danu idia naria, to daba rere neganai, unai tuari orea taudia ibounai be idia boio ore. Idia edia dika ena davana be unai, badina iseda kohu idia henaoa kava taudia ibounai, edia davana be unai.