Read Buka Helaga (Hiri Motu) 1993 ISAIA 18 Bible Online

ISAIA 18 - Buka Helaga (Hiri Motu) 1993 bible

ISAIA 18

¹Manu momo edia hanidia regedia idia karaia noho tano, unai bamona tano ia noho, Etiopia sinavai unai kahana dekenai.

²Etiopia tano ese, iena hereva gwauraia taudia, be vanagi haragadia dekenai ia siaidia noho, Naila Sinavai dekena amo. Hereva gwauraia taudia mai haraga danu e, emui tano dekenai do umui giroa lou, emui tano mai ena sinavai momo. Emui tano be mai ena tau latadia. Idia be goada taudia, bona mai edia kopina manadamanada. Tanobada taudia ibounai ese, Etiopia taudia idia gari henia noho, badina idia be goada bona siahu besena.

³Tanobada dekenai noho taudia ibounai e, tanobada ena latanai umui noho taudia e, toa ta ororo edia latanai idia abia isi neganai, do umui itaia! Kibi do idia hiriria neganai, do umui kamonai!

⁴Badina be Lohiabada ese lau ia hamaoroa noho, ia gwau, “Egu noho gabuna dekena amo, umui do lau itaia noho, mai egu regena ta lasi, dina ia diari bada noho, ena siahu lalonai bamona, o siahu bada neganai, uma anina idia utua noho neganai, ori namona ta ia hedinarai bamona.”

⁵To vain huahua idia do haboua lasi, vain ena palauapalaua idia moru vadaeni, bona vain huahua idia mage hamatamaia sibona neganai, Asuria tuari taudia ese, Etiopia taudia do idia hadikaia haraga, kaia ese vain rigidia ia utua hegeregerena.

⁶Etiopia taudia edia tauanidia be madi, ataiai manudia bona uda boroma ese do idia ania ore. Siahu neganai, manu ese do idia anidia, bona keru neganai, uda boroma ese do idia anidia.

⁷Unai neganai Etiopia taudia haida ese, harihari gaudia do idia mailaia, Siahu Ibounai Lohiabada dekenai do idia henia. Io, unai tano mai ena sinavai momo, ena taudia, tau latadia, goada taudia, mai edia kopina manadamanada, inai bese, tanobada taudia ibounai ese idia gari henia noho. Inai bese ese Siona Ororo, Siahu Ibounai Lohiabada ena ladana ia noho gabuna dekenai do idia mai.