Read Buka Helaga (Hiri Motu) 1993 ISAIA 2 Bible Online

ISAIA 2 - Buka Helaga (Hiri Motu) 1993 bible

ISAIA 2

¹Dirava ese inai bamona hereva Isaia Amoso dekenai ia henia, Iuda bona Ierusalema totona:

²Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao.

³Bona edia taunimanima do idia gwau, “Umui mai, Lohiabada ena ororo dekenai do ita daekau, Israela ena Dirava ena Dubu Helaga dekenai do ita lao. Ia ese iena kara ita dekenai do ia hadibaia, bona ita ese unai Dirava ena dala dekenai do ita raka. Badina be Lohiabada ena hadibaia hereva, be Ierusalema dekena amo ia mai noho. Siona dekena amo Lohiabada ese, iena bese taudia dekenai ia hereva henia noho.”

⁴Lohiabada ese, bese badadia edia heai, bona edia hepapahuahu do ia hamaoromaoroa. Idia ese edia tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa. Bese ta ese bese ta dekenai do ia tuari henia lou lasi, bona tuari dalana be do idia hadibaia lou lasi.

⁵Iakobo ena besena e, umui mai, Lohiabada ese ita dekenai ia henia diari lalonai do ita raka.

⁶Dirava e, oi ese oiemu orea taudia oi negea vadaeni. Iakobo ena bese taudia oi rakatania vadaeni, badina meamea taudia, be dina daekau kahana dekena amo idia mai, bona puripuri taudia, be Pilistia tano dekena amo idia mai, inai aiemai tano idia hahonua noho. Idau bese taudia edia kara dikadia ai karaia noho.

⁷Israela ena tano be siliva bona golo dekenai ia honu noho, bona Israela taudia edia davana bada kohudia be idia ore lasi. Edia tano be hosi dekenai ia honu noho, bona edia kariota be idia ore lasi.

⁸Edia tano be kaivakuku dekenai ia honu noho, edia imadia dekenai idia karaia vadaeni gaudia. Edia ima kwakikwakidia dekenai idia karaia gaudia, idia tomadiho henia noho.

⁹Lohiabada e, unai taunimanima do oi atodia diho. Idia do oi hamanaua, vadaeni do idia hemarai, bona edia dika do oi gwauatao lasi.

¹⁰Nadi matuna bona kohua, bona tano ena guri lalonai do idia hunia. Dirava ena badu dekena amo do idia heau gwauraia. Iena King siahuna, bona iena hairaina ena diaridiari dekena amo do idia heau.

¹¹Lohiabada do ia mai neganai, ia ese taunimanima edia hekokoroku do ia haorea, bona sibona edia ladana idia abia isi taudia do ia hamanaua. Unai dina dekenai, Lohiabada ena ladana sibona do idia hanamoa.

¹²Badina be Siahu Ibounai Lohiabada ese, dina ta ia abia hidi vadaeni, unai dina dekenai, hekokoroku taudia ibounai do ia hamaragia momokani, bona unai dina dekenai danu, taunimanima ese idia hanamoa gaudia ibounai, Lohiabada ese do ia hadikaia.

¹³Ia ese Lebanona ena sida audia ibounai, latadia momokani, bona Basana ena ouki audia, ibounai danu do ia hadikaia.

¹⁴Ororo badadia ibounai danu, be Lohiabada ese do ia hadikaia ore.

¹⁵Kohoro latadia ibounai, bona hanua edia magu aukadia ibounai, be unai dina dekenai do ia hadikaia.

¹⁶Lohiabada ese danu hoihoi gaudia mailaia sisima, bona sisima badadia ibounai do ia hadikaia ore.

¹⁷Unai dina dekenai taunimanima edia hekokoroku do ia ore, bona sibodia edia ladana idia abia isi taudia, be do idia manau. Bona unai dina dekenai danu, Lohiabada ena ladana sibona, be taunimanima do idia hanamoa,

¹⁸bona kaivakuku be do idia boio ore momokani.

¹⁹Unai neganai taunimanima be, nadi kohua edia lalonai do idia heau vareai, bona tano guridia lalonai do idia hunia. Lohiabada ena badu dekena amo do idia heau gwauraia. Iena King siahuna, bona iena hairaina ena diaridiari, dekena amo do idia heau. Unai bamona taunimanima do idia karaia, Lohiabada ese tanobada hagaria totona do ia toreisi neganai.

²⁰Unai dina dekenai taunimanima ese edia kaivakuku, siliva gaudia bona golo gaudia, do idia tomadiho henia totona idia karaia gaudia, be bita bona mariboi dekenai do idia negea lao.

²¹Ma taunimanima be nadi kohua edia lalonai do idia heau vareai, bona ororo dekenai idia noho nadi badadia, edia huanai danu do idia hunia. Lohiabada ena badu dekena amo do idia heau gwauraia. Iena King siahuna, bona iena hairaina ena diaridiari, dekena amo do idia heau. Unai bamona taunimanima do idia karaia, Lohiabada ese tanobada hagaria totona do ia toreisi neganai.

²²Taunimanima do umui abidadama henia lou lasi. Edia namo be dahaka? Idia be manokamanoka sibona.