Read Buka Helaga (Hiri Motu) 1993 ISAIA 22 Bible Online

ISAIA 22 - Buka Helaga (Hiri Motu) 1993 bible

ISAIA 22

¹Peroveta hereva Mata Hanai ena Koura totona be inai: Dahaka umui dekenai ia vara noho? Badina dahaka umui ibounai, mai moale danu, emui ruma edia guhi dekenai umui daekau lao vadaeni,

²bona Ierusalema hanua ena kahana ibounai ese, regena bada idia karaia noho? Emui mase taudia be tuari kaia dekena amo idia mase lasi. Tuari lalonai idia mase lasi.

³Emui lohia taudia ibounai be nega tamona idia heau hebou. Umui ese emui peva dekena amo diba ta umui do pidia lasi neganai, umui idia tuari henia taudia ese umui idia abia mauri. Umui heau daudau, to unai tuari taudia ese, umui idia abia mauri hebou.

⁴Unai dainai lau gwau, “Lau dekenai do umui noho lasi. Lau ura egu bese, idia mase vadaeni taudia totona do lau tai bada. Egu tai dekena amo, egu lalona do umui hanamoa toho lasi.”

⁵Badina be Lohiabada, Siahu Ibounai Lohiabada, be mai ena dina, inai dina dekenai, Lohiabada ese Mata Hanai ena Koura dekenai, dika, gari, bona daradara ia siaia vadaeni. Iseda hanua ena magu, be idia botaia diho vadaeni, bona taunimanima ese, durua totona ororo dekenai idia boiboi henia vadaeni.

⁶Elama tuari taudia be hosi idia guia, idia heau mai, mai edia diba bona peva danu. Bona Kiri hanua taudia ese, edia kesi idia abia hegaegae.

⁷Iuda ena koura namo herea, be kariota momo ese idia hahonua, bona hosi guia tuari taudia, be Ierusalema ena magu iduara dekenai idia gini.

⁸Iuda ena magu ibounai be idia hamakohia vadaeni. Unai bamona ia vara neganai, umui Ierusalema taudia ese tuari gaudia be edia haboua ruma dekena amo umui abidia.

⁹Umui ese Davida ena hanua ena magu umui itaia, gabu momo idia dika.

¹⁰Bona umui ese Ierusalema ena ruma ibounai umui itaia, bona haida umui veria diho, edia nadi umui abia, hanua ena magu do umui hanamoa totona.

¹¹Umui ese danu, ranu haboua gabuna, be magu ruaosi edia huanai umui karaia, Gohu Gunana ena ranu do umui haboua totona. To umui ese ia karaia Diravana umui laloa lasi. Umui ese idaunegai inai kara ia palania Diravana umui kamonai henia lasi.

¹²Unai dina dekenai, Siahu Ibounai Lohiabada ese umui ia boiboi henia, do umui taitai, bona mai lalohisihisi danu, emui kwaradia huina do umui kakasia, bona puse dabua do umui karaia totona.

¹³To umui ese moale bada umui karaia. Boromakau bona mamoe umui alaia, vamu umui ania, bona uaina umui inua, umui gwau, “Do ita aniani bona inuinu, badina be kerukeru do ita mase.”

¹⁴Siahu Ibounai Lohiabada ese lau dekenai ia hereva henia, ia gwau, “Inai emui kara dika, be do lau gwauatao lasi, ela bona do umui mase. Lau, Siahu Ibounai Lohiabada, be inai bamona lau hereva vadaeni.”

¹⁵Siahu Ibounai Lohiabada ese lau ia hamaoroa, ia gwau, “Oi toreisi, king ena ruma ia naria tauna Sebina dekenai do oi lao, do oi hamaoroa, oi gwau:

¹⁶Oiemu guria gabuna be dahaka dainai oi geia noho inai ororo nadi ena lalonai? Daika ese oi dekenai gwaumaoro ia henia, oi sibona emu guria gabuna iniseni do oi geia?

¹⁷“Sedira oi be tau badana ta. To Lohiabada ese oi do ia abia isi, bona mai dagedage danu oi do ia negea daudau herea.

¹⁸Ia ese oi do ia dogoatao, bolo bamona, bona tano badana ta dekenai oi do ia negea lao. Unuseni do oi mase, bona unuseni danu oiemu kariota namodia do idia hekure kava. Oiemu biaguna, oiemu king, ese oi totona do ia hemarai momokani.

¹⁹Lau ese oiemu dagi be oi dekena amo do lau kokia, bona oiemu gaukara gabuna dekena amo oi do lau hadokoa.”

²⁰Lohiabada ese Sebina ia hamaoroa, ia gwau, “Unai dina dekenai, lau ese egu hesiai tauna Eliakimi Hilekaia do lau boiria,

²¹bona oiemu dagi ena dabua do lau kokia, Eliakimi dekenai do lau henia. Oiemu gaba gauna danu be Eliakimi dekenai do lau henia. Oiemu siahu danu be ia dekenai do lau henia. Vadaeni ia be Ierusalema noho taudia bona Iuda iduhu taudia edia tamana do ia lao.

²²Lau ese Davida ena ruma ena ki be Eliakimi ena pagana ena latanai do lau atoa. Vadaeni ia ese do ia kehoa, bona ta ese do ia koua diba lasi. Bona ia ese do ia koua, bona ta ese do ia kehoa diba lasi.

²³Lau ese Eliakimi do lau ha-aukaia, ikoko bamona, bona gabu aukana ta dekenai do lau kokoa. Vadaeni ia be iena bese taudia edia matauraia tauna badana do ia lao.

²⁴“To iena tamana ena iduhu taudia bona iena varavara taudia ibounai ese Eliakimi do idia hametaua. Idia ese ia dekenai do idia taua dae, uro bona kapusi be ikoko dekenai idia taua dae hegeregerena.

²⁵Unai bamona ia vara neganai, ikoko, lau ese lau kokoa auka gauna be do ia makohia, bona do ia moru, bona iena latanai idia noho gaudia danu do idia moru. Lau, Siahu Ibounai Lohiabada ese lau hereva vadaeni inai.”