Read Buka Helaga (Hiri Motu) 1993 ISAIA 26 Bible Online

ISAIA 26 - Buka Helaga (Hiri Motu) 1993 bible

ISAIA 26

¹Unai dina dekenai, inai ane be Iuda tano dekenai do idia abia: Ita be mai iseda hanua aukana. Dirava sibona be iseda magu aukana. Ia ese ita ia hamauria vadaeni, bona kwalimu ita dekenai ia henia noho.

²Hanua magu ena iduara do umui kehoa, vadaeni kara maoromaoro besena, Dirava idia abidadama bese taudia do idia raka vareai.

³Tau ta, bema oi Lohiabada dekenai ia laloa noho nega ibounai, oi ese maino namo herea ia dekenai do oi henia, badina be ia ese oi dekenai ia abidadama henia noho.

⁴Lohiabada do oi abidadama henia hanaihanai, badina Iehova, Lohiabada, be iseda noho hanaihanai nadi goadana momokani.

⁵Lohiabada ese hekokoroku taudia ia hamorua noho, ia ese edia hanua goadana ia hadikaia ore noho. Unai hanua be tano ena kahu dekenai ia moru momokani.

⁶Dagedage taudia idia hahisia taudia edia aedia ese, unai hanua idia moia diho noho, ogogami taudia edia aedia ese, bona mai edia gau lasi taudia danu edia aedia ese.

⁷Lohiabada e, kara maoromaoro taudia edia dala do oi hamanadaia, vadaeni idia raka noho dalana be palaka momokani.

⁸Lohiabada e, oiemu ura dalana dekenai ai raka noho, bona ai ese oi ai naria noho, oi ese ai do oi hamaoromaoroa totona. Badina aiemai ura momokani be, oiemu ladana be mataurai, bona hanamoa do ia abia.

⁹Hanuaboi lalonai egu kudouna ese oi ia tahua noho. Egu laumana ese oi ia tahua noho momokani, badina bema oi ese tanobada taudia oi kota henia neganai, idia ese kota maoromaoro ena anina do idia diba.

¹⁰Sedira kara dika taudia dekenai do oi bogahisihisi henia, to idia ese kara maoromaoro karaia dalana do idia diba lasi. Momokani inai tano be mai ena kara maoromaoro, to inai tano danu lalonai, taunimanima idia kara dika noho. Idia ese Lohiabada ena hairaina idia do itaia lasi.

¹¹Lohiabada e, oiemu imana oi abia isi noho, to idia itaia lasi, idia diba lasi davana do oi henia momokani. Oiemu lalokau be bada oiemu bese taudia dekenai. Bema unai dika taudia ese inai lalokau idia itaia neganai, idia be do idia hemarai. Oi abia hegaegae lahi dekena amo, oi idia dagedage henia taudia mani do oi gabudia ore.

¹²Lohiabada e, oi ese ai durua totona maino oi henia noho, bona ai karaia namonamo gaudia ibounai, be oi ese oi havaraia noho.

¹³Lohiabada e, aiemai Dirava, lohia idauidau ese ai idia biagua vadaeni, to oi sibona be ai ese ai tomadiho henia noho.

¹⁴Unai lohia gunadia idia mase vadaeni, bona do idia mauri lou lasi. Edia laumadia be do idia toreisi lasi, badina oi ese idia oi panisia vadaeni, bona oi ese idia oi hadikaia ore vadaeni. Tau ta ese idia do ia laloatao lou lasi.

¹⁵Lohiabada e, oi ese aiemai bese oi habadaia vadaeni. Oi ese aiemai tano kahana bona kahana oi habadaia vadaeni, bona inai kara dainai, taunimanima ese oiemu ladana idia hanamoa noho.

¹⁶Lohiabada e, oi ese oiemu bese taudia oi matakani henidia, to edia lalohisihisi bada lalonai, oi dekenai idia guriguri.

¹⁷Lohiabada e, unai neganai ai be rogorogo hahine, kahirakahira natuna ia havaraia bamona. Iena hisihisi dainai, iena tauanina ia giroagiroa, bona ia tai mai boiboi danu. Ai be unai bamona oiemu vairana dekenai.

¹⁸Ai be ai rogorogo, ai ese mai hisihisi bada ai giroagiroa, to gau ta lasi ai havaraia, lai sibona. Tanobada dekenai tau ta ai hamauria lasi, bona ai idia hadikaia gwauraia bese idauidau taudia, be aiemai vairana dekenai, idia do siahu noho.

¹⁹To aiemai mase taudia be do idia mauri lou, edia tauanidia be do idia toreisi lou. Guria gabudia dekenai idia mahuta noho taudia, be do idia noga, bona mai moale danu ane do idia abia. Badina be hanuaboi ena paripari ese, tano ia hagoadaia lou bamona, Lohiabada ese mase vadaeni taudia do ia hamauria lou.

²⁰Egu bese taudia e, emui ruma dekenai do umui raka vareai, bona emui iduara do umui koua. Nega sisina lalonai do umui hunia, ia lao bona Dirava ena badu do ia ore.

²¹Badina be, umui kamonai, Lohiabada be iena gabu dekena amo ia mai noho, tanobada taudia edia dika davana do ia henia totona. Tanobada dekenai, hunia dekenai taunimanima idia alaia taudia, edia kara be Dirava ese do ia hedinaraia, bona tano ese, alaia mase taudia do ia hunia lou lasi.