Read Buka Helaga (Hiri Motu) 1993 ISAIA 32 Bible Online

ISAIA 32 - Buka Helaga (Hiri Motu) 1993 bible

ISAIA 32

¹Kamonai! Dina ta be king ta ese kara maoromaoro momokani dekena amo iena taunimanima do ia gunalaia. Lohia taudia danu ese taunimanima do idia kota henia mai maoromaoro danu.

²Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.

³Unai neganai idia itaia diba taudia be edia matana do idia koua lasi, bona idia kamonai diba taudia ese do idia kamonai.

⁴Unai neganai ia haragaharaga kava tauna ese laloa namona bona diba maorona do ia davaria. Bona hereva namonamo diba lasi tauna be do ia hereva namonamo diba.

⁵Kavakava tauna be lohia tauna do idia gwauraia lou lasi, bona kara koikoi tauna be kara momokani tauna do idia gwauraia lou lasi.

⁶Kavakava tauna be ia hereva kava, hereva kava noho, bona kara dika karaia totona ia laloa momo noho. Dirava kamonai henia lasi karadia ia karaia noho, bona ia ese Lohiabada ia herevalaia kerere noho. Ia ese hitolo taudia dekenai aniani ia henia lasi. Bona ranu mase taudia dekenai ranu ia henia lasi.

⁷Kara koikoi tauna ena kara be dika momokani. Ia ese koikoi hereva dekena amo, ogogami taudia ia hadikaia laloa ia karaia noho. Ogogami taudia be kara maoromaoro neganai danu, ia ese idia ia hadikaia noho.

⁸To kara maoromaoro tauna ese mai laloa maoromaoro danu, palani namodia ia karaia noho. Bona iena kara namodia dainai, ia gini goada noho.

⁹Umui helai kava, mai hekwarahi sisina lasi Ierusalema hahine taudia e, umui toreisi, bona lau dekenai do umui kamonai. Mai emui laloa momo lasi hahine matamata taudia e, lauegu hereva do umui kamonai!

¹⁰Harihari umui noho, mai emui hekwarahi ta lasi, to lagani ta do ia ore neganai, mai heudeheude do umui gari bada! Badina be vain ese edia huahua do idia atoa lasi. Vain huahua do umui haboua lasi.

¹¹Umui emui noho be namo dainai, haida umui durua lasi hahine taudia e, mai gari danu do umui heudeheude! Emui dabua do umui kokia, bona momoru dabuadia do umui atoa.

¹²Mai lalohisihisi danu, emui ratana do umui botaia, tano namodia bona vain umadia idia dika vadaeni dainai.

¹³Bona lauegu bese taudia edia tano dekenai be au ginigini bona ava ginigini sibona idia tubu noho. Oibe, guna be edia ruma ibounai lalonai, hanua taudia be mai edia moale, edia hanua danu be moale bada gabuna, to hari be lasi. Idia dainai madi do umui taitai.

¹⁴King ena rumai danu, be taunimanima do idia noho lasi, bona hanua badana dekena amo, taunimanima ibounai do idia raka siri momokani. Ruma ibounai, bona idia naridia kohoro be do idia dika momokani, ela bona hanaihanai. Uda doniki bona mamoe be unuseni edia aniani do idia tahua.

¹⁵To Dirava ese iena Lauma ita dekenai ma do ia siaia lou. Unai tano dikana be ma do ia namo lou, bona ena uma ese aniani ma do idia havaraia.

¹⁶Unai gabu ena kahana ibounai lalonai, kara maoromaoro bona kota maoromaoro do idia karaia.

¹⁷Taunimanima ibounai ese kara maoromaoro sibona idia karaia dainai, idia ese, mai maino bona mauri namona do idia noho hanaihanai.

¹⁸Dirava ena taudia be do idia laloa hekwarahi lasi, bona mai hadikaia gauna ta lasi do idia noho.

¹⁹Momokani medu, aisi nadidia bamona gaudia be uda gabudia dekenai do ia moru, bona hanua badana be do idia hadikaia ore.

²⁰To umui ibounai be do umui moale bada, emui ranu be do ia hegeregere momokani dainai. Bona ranu ia hegeregere dainai, uma ena anina do idia tubu namonamo, bona doniki bona boromakau be mai edia aniani.