Read Buka Helaga (Hiri Motu) 1993 ISAIA 33 Bible Online

ISAIA 33 - Buka Helaga (Hiri Motu) 1993 bible

ISAIA 33

¹Ita dekenai idia tuari noho taudia, be do idia dika momokani! Idia ese kohu idia henaoa, bona idia ese taunimanima idia hadikaia, to tau ta ese idia dekena amo ia henaoa lasi, bona ia ese idia ia hadikaia lasi. To unai ita dekenai idia tuari taudia edia kara dika ena nega, be do ia doko. Bona unai neganai, haida ese idia edia kohu do idia henaoa, bona haida ese idia do idia hadikaia.

²Lohiabada e, ai dekenai do oi bogahisihisi henia. Ai ese oi ai naria noho, mai abidadama danu. Dina ta ta ibounai, mani emu kara ai do oi hagoadaia, bona nega dikadia neganai ai do oi hamauria.

³Bema oi ese ai durua totona oi tuari neganai, idau bese taudia be inai tuari ena regena dekena amo idia heau noho.

⁴Idia edia kohu be haida ese idia abia lao.

⁵Lohiabada be Dirava badana momokani! Ia ese gau ibounai ia biagua noho. Ia ese Ierusalema do ia hanamoa, kota maoromaoro bona kara momokani dekena amo do ia hahonua.

⁶Lohiabada ese Iuda do ia hagoadaia. Ia ese nega ibounai iena bese taudia ia naria noho, bona aonega bona diba ia henidia. Idia edia kohu badana momokani, be edia gari, Lohiabada dekenai.

⁷Kamonai! Boga auka taudia, be ariara dekenai, durua totona idia noinoi noho. Bona edia tanobada ena ladanai, maino idia karaia gwauraia taudia, be idia taitai bada noho.

⁸Laolao daladia be mai edia gari dainai, tau ta ese idia dekenai ia loaloa lasi. Bese edia huanai, gwauhamata be idia makohia. Laloa tamona hereva danu, be idia utua noho. Tau ta be do idia matauraia lou lasi.

⁹Tano be ia noho kava, tau ta ese ia noholaia lasi. Lebanona ena uda namodia, be idia kakoro vadaeni. Sarona ena tano namona, be tano kaukau gabuna ia lao vadaeni. Basana bona Karamele Ororo dekenai audia ibounai dekena amo, edia rauraudia idia moru noho.

¹⁰Lohiabada be bese idauidau dekenai ia gwau, “Harihari do lau toreisi. Lauegu goada bona lauegu siahu do lau hedinaraia.

¹¹Umui ese mai edia anina lasi palani umui karaia noho. Emui kara ibounai be anina lasi. Umui sibona emui hahodi be lahi do ia lao, bona ia ese umui do ia gabua ore.

¹²Umui be ahu ena pauda bamona do umui lao, au ginigini idia gabua murinai kahuna bamona do umui lao.

¹³Daudau dekenai taudia bona kahirakahira umui noho taudia e, lauegu sivarai do umui kamonai, bona lauegu siahu do umui hamomokania.”

¹⁴Siona dekenai idia noho kara dika taudia be gari dainai idia heudeheude noho. Idia gwau, “Dirava ese iseda kerere davana ia henia noho be nega ibounai ia gabua noho lahina bamona. Ita be edena bamona lahi unai bamona ena siahu dekena amo ita heau mauri diba?”

¹⁵Do umui mauri diba, bema emui hereva bona emui kara be maoromaoro neganai. Emui goada do umui gaukaralaia kava lasi. Ogogami taudia do umui koia lasi, edia moni abia kava totona. Bona lalona veria moni do umui abia dae lasi. Ala-ala bona kara dika idia karaia gwauraia taudia danu do umui haboua lasi.

¹⁶Unai neganai do umui noho namonamo, mai mauri danu, bona mauri namona do umui abia, kohoro goadana ta dekenai umui noho hegeregerena. Umui emui aniani bona emui ranu danu be do idia hegeregere momokani.

¹⁷Oiemu matana ese King mai ena hairaina danu do idia itaia. Ia biagua tanona danu do oi itaia, tano ena lata bona lababa be bada herea momokani.

¹⁸Oiemu lalona ese gari gaudia gunadia do ia laloa lou. Unai idau bese tuari biaguna, oiemu takisi idia gogoa taudia, bona hunia dekenai oiemu mauri idia hadikaia gwauraia taudia do oi laloa.

¹⁹To oi ese unai idau bese taudia do oi itaia lou lasi. Unai hekokoroku taudia, edia gado oi diba lasi taudia, do oi itaia lou lasi.

²⁰Siona do oi itaia, unai hanua, iseda aria mai guriguri danu ita karaia gabuna do oi itaia. Ierusalema danu do oi itaia! Maino bona mauri namona gabuna be unai hanua badana do ia lao. Ia be idia kokia lasi palai ruma bamona, iena ikoko be do idia kokia lasi, bona iena varo be do idia makohia lasi momokani.

²¹Lohiabada ese iena hairaina ita dekenai do ia hedinaraia. Ita be sinavai badadia badinai do ita noho, to idau bese tuari taudia edia lagatoi bona vanagi badadia be unai sinavai dekenai do idia heau lasi.

²²Badina Lohiabada be iseda Kota Biaguna, ia sibona be iseda King. Ia ese ita do ia biagua, bona ita do ia hamauria.

²³Io, unai idau bese taudia edia lagatoi bona vanagi edia palai be makuku, edia au tubua be idia gini goada lasi. Unai idau bese tuari taudia edia kohu ibounai do ita dogoatao, bona kohu be momo dainai, iseda bese ena aena dika taudia danu ese unai kohu haida do idia abia diba.

²⁴Siona dekenai idia noho taudia ta ese do ia gwau lasi, “Lau be gorere,” bona Lohiabada ese edia kara dika ibounai do ia gwauatao.