Read Buka Helaga (Hiri Motu) 1993 ISAIA 38 Bible Online

ISAIA 38 - Buka Helaga (Hiri Motu) 1993 bible

ISAIA 38

¹Unai neganai king Hesekaia ese gorere ia davaria, bona kahirakahira ia mase. Vadaeni peroveta tauna Isaia Amoso be Hesekaia dekenai ia lao, ia hereva henia, ia gwau, “Lohiabada ese oi ia hamaoroa noho, ia gwau, ‘Oiemu gau ibounai do oi atoa hegaegae, badina oi be do oi mase, oiemu gorere do ia namo lou lasi.’ ”

²Hesekaia ese iena vairana be haba dekenai ia henia, bona Lohiabada dekenai ia noinoi, ia gwau,

³“Lohiabada e, mani emu kara lauegu kara do oi laloatao, lau ese mai egu abidadama bona mai egu kudouna ibounai oiemu hesiai gaukara lau karaia, bona oiemu vairana dekenai lau kara maoromaoro.” Bona Hesekaia be ia tai bada herea.

⁴Vadaeni Lohiabada ese Isaia ia oda henia,

⁵Hesekaia dekenai do ia giroa lou, bona inai bamona do ia hamaoroa: “Lau, Lohiabada, oiemu sene tauna Davida ena Dirava, ese oiemu guriguri lau kamonai, bona oiemu matana ena ranu lau itaia vadaeni. Lau ese oiemu mauri be lagani 15 dekenai do lau halataia.

⁶Oi bona inai hanua Ierusalema be Asuria ena king ena siahu dekena amo do lau hamauria, bona Ierusalema do lau gimaia bona naria noho.”

⁷Isaia ese ia haere, ia gwau, “Lohiabada ese oi dekenai toa ta do ia henia, oi do ia hanamoa hereva do ia hamomokania totona, gauna be inai:

⁸King Ahasa ese ia haginia vadaeni vadavada ena latanai, dina ena laulau be vadavada ibounai 10 murina dekenai do ia lao.” Vadaeni unai dina ena laulau, be momokani vadavada ibounai 10 murina dekenai ia lao, Lohiabada ese unai kara ia karaia.

⁹Hesekaia ena gorere ia ore neganai, ia ese inai ane ia abia, Lohiabada do ia hanamoa totona, ia gwau:

¹⁰Lau laloa, lau be do buruka lasi neganai, lau be mase taudia edia gabu do lau vareai lao. Lau laloa egu mauri dinadia, be idia ore vadaeni.

¹¹Lau laloa Lohiabada do lau itaia lou lasi, inai mauri taudia edia gabu dekenai, bona tanobada dekenai noho taunimanima ta danu, be do lau itaia lou lasi.

¹²Ma lau laloa egu mauri be Lohiabada ese ia utua, bona ia ore vadaeni, palai ruma idia veria diho bamona, o dabua ena kahana ta idia utua oho bamona. Lau laloa Dirava ese egu mauri ia haorea noho gwauraia.

¹³Hanuaboi lalonai ela bona dabai, mai egu hisihisi dainai lau tai mai boiboi danu, to laiona bamona, ia ese egu turiana ibounai ia hamakohia.

¹⁴Egu gadona be ia manoka, regena sisina sibona, pune manu ena tai bamona. Guba lau itaia noho gwauraia, to ia daudau dainai, egu matana be idia hisihisi bada noho. Lohiabada e, inai egu laloa hekwarahi ibounai dekena amo lau do oi hamauria.

¹⁵To dahaka do lau gwau? Badina Lohiabada ese inai kara ia karaia vadaeni. Lau be lau mahuta diba lasi, egu laloa ena mamina ia dika dainai.

¹⁶Lohiabada e, lau ura oi do lau hanamoa, bona oi hamoalea totona do lau mauri. Mani emu kara lau do oi hanamoa, bona lau do oi hamauria.

¹⁷Momokani, oi ese lau do oi hanamoa totona, hisihisi bada lau dekenai ia vara. To oi Lohiabada ese emu lalokau dainai, lau oi hamauria vadaeni, mase ena guri dekena amo, badina be oi ese egu kara dika ibounai oi gwauatao vadaeni.

¹⁸Mase gabuna dekenai idia noho taudia ese, oi idia hanamoa diba lasi. Guri lalonai idia diho vadaeni taudia ese, oiemu momokani idia abidadama henia diba lasi.

¹⁹Mauri noho taudia ese, oi idia hanamoa noho, lau ese harihari oi lau hanamoa noho hegeregerena. Tamana taudia ese edia natudia dekenai, oiemu momokani bona maoromaoro idia hadibaia noho.

²⁰Lohiabada e, oi ese egu gorere oi hanamoa vadaeni. Unai dainai ai ese oiemu ladana do ai hanamoa, mai gita bona mai ane abia danu. Ai ese oiemu Dubu Helaga lalonai, oi dekenai hanamoa anedia do ai abia noho, aiemai mauri dinadia ibounai lalonai.

²¹Isaia ese king Hesekaia ena hesiai taudia ia hamaoroa, fig au huahua ena muramura be iena toto dekenai do idia atoa, vadaeni iena gorere do ia namo lou.

²²Unai neganai king Hesekaia ese Isaia ia nanadaia, ia gwau, “Lohiabada ese lau do ia hanamoa momokani, bona iena Dubu Helaga do lau raka vareai diba, ena toana be dahaka?”