Read Buka Helaga (Hiri Motu) 1993 ISAIA 48 Bible Online

ISAIA 48 - Buka Helaga (Hiri Motu) 1993 bible

ISAIA 48

¹Iakobo iduhu taudia e, do umui kamonai! Emui ladana be Israela, bona Iuda ese umui ia havaraia. Umui be Lohiabada ena ladana dekenai gwauhamata umui karaia noho, bona Israela ena Dirava umui gwauraia hedinarai noho, to hereva momokani dekenai lasi, bona kara maoromaoro dekenai lasi.

²Umui gwau umui be hanua helagana ena noho taudia, bona umui gwau, umui ese Israela ena Dirava umui abidadama henia noho. Iena ladana be Siahu Ibounai Lohiabada.

³Lohiabada ese Israela ia hamaoroa inai: “Kara gunadia be idaunegai lau gwauraia hedinarai do idia vara, bona unai karadia be karaharaga lau havaraia.

⁴Lau diba umui Israela taudia, emui lalona be auka. Emui aiona be auri, bona emui baguna be auri laboralabora bamona.

⁵Unai dainai nega gunana dekena amo, umui dekenai do idia vara gaudia lau gwauraia hedinarai. Kara idia do vara lasi neganai, umui dekenai lau hadibaia, umui ese inai bamona do umui hereva garina, do umui gwau, ‘Iseda kaivakuku ese inai karadia ia karaia,’ bona, ‘Iseda dirava laulauna, au gauna, bona iseda auri laulauna, koroa gaudia ese idia karaia.’

⁶Umui dekenai lau hamaoroa guna gaudia be hari idia vara vadaeni, bona hari umui diba vadaeni, unai egu hereva gunana be maoro, ani? “Hari ia lao, lau ese gau matamatadia umui dekenai do lau hamaoroa, hunia gaudia, do umui diba lasi gaudia.

⁷Harihari sibona lau ese inai karadia lau havaraia vadaeni. Inai bamona karadia be guna idia vara lasi. Unai dainai inai bamona umui hereva diba lasi, ‘Inai kara ita diba vadaeni.’

⁸Lau diba umui be kara dika herea taudia, bona emui vara dina dekena amo, egu hereva negea taudia umui idia gwauraia noho. Unai dainai inai lau karaia gaudia, be nega ta umui kamonai lasi, bona nega ta idia umui diba lasi, bona emui nega gunadia dekena amo, inai gaudia dekenai emui taiana umui kehoa lasi.

⁹“Taunimanima ese egu ladana do idia hanamoa totona, lau ese egu badu lau koua noho. Egu ladana dainai, lau ese umui do lau hadikaia ore lasi.

¹⁰Umui itaia, lau ese lahi dekena amo umui lau hagoevaia vadaeni, to siliva lau davaria lasi. Hisihisi ena amu lalonai umui lau tohoa vadaeni.

¹¹Lau sibona dainai inai bamona lau karaia noho, lau sibona dainai, badina lau ura lasi idau taudia ese egu ladana idia hadikaia, bona lau ura lasi egu hairaina be ta dekenai do lau henia.”

¹²Lohiabada ma ia gwau, “Iakobo ena bese taudia e, lau dekenai do umui kamonai. Israela besena e, lau ese lau boiria taudia, lau dekenai do umui kamonai. Lau be Dirava, lau be ginigunana momokani, bona lau be dokona momokani danu.

¹³Egu imana ese tanobada ena badina nadidia idia atoa, bona egu imana idibana ese guba ia karaia. Lau ese tanobada bona guba gaudia lau boiria neganai, idia be idia gini hebou noho.

¹⁴“Umui ibounai e, lau dekenai do umui haboua, umui kamonai! Edena kaivakuku ese inai bamona ia gwauraia guna diba? Lau ese tau ta lau abia hidi vadaeni, ia ese Babulonia do ia tuari henia, bona ia ese egu ura do ia karaia.

¹⁵Lau Lohiabada ese unai tau dekenai lau hereva henia. Lau sibona ese lau boiria. Lau ese do lau hakaua mai, bona iena tuari dekenai, lau ese kwalimu do lau henia.

¹⁶“Lau dekenai umui raka kahirakahira mai, egu hereva do umui kamonai. Matamaia negana dekena amo, egu hereva lau gwauraia hedinarai vadaeni, lau hunia lasi. Bona lau gwauraia do idia vara gaudia ibounai, be momokani idia vara, ani?” Harihari Lohiabada Dirava ese lau Isaia dekenai iena Lauma ia henia, bona ia ese lau ia siaia.

¹⁷Lohiabada, umui ia hamauria noho Dirava, Israela ena Helaga Dirava, be inai bamona ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.

¹⁸Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.

¹⁹Oibe, bema lau dekenai umui kamonai henia, emui natudia bona tubudia be do idia momo herea, kone ena miri bamona. Idia edia ladadia be do idia boio lasi, bona egu vairana dekena amo, haida ese idia do idia kokia ore diba lasi.”

²⁰Babulonia dekena amo do umui raka siri, Babulonia do umui rakatania. Mai moale danu do umui boiboi, gabu ibounai dekenai hereva do umui gwauraia hedinarai, umui gwau, “Lohiabada ese iena hesiai tauna, Israela, ia hamauria vadaeni!”

²¹Lohiabada ese tano kaukau dekenai ia hakaudia hanaia neganai, iena bese idia ranu mase lasi. Nadi badana dekena amo ranu ia henidia. Nadi ia botaia kehoa, vadaeni ranu ia heau diho.

²²Lohiabada ia gwau, “Kara dika taudia dekenai maino ia noho lasi.”