Read Buka Helaga (Hiri Motu) 1993 ISAIA 52 Bible Online

ISAIA 52 - Buka Helaga (Hiri Motu) 1993 bible

ISAIA 52

¹Ierusalema e, do oi noga, do oi goada lou, Dirava ena hanua helagana e, oiemu dabua mai hairaidia do oi karaia lou! Badina be Dirava idia diba lasi taudia be oiemu magu iduara do idia raka vareai lou lasi.

²Ierusalema e, oiemu guia dekena amo oi sibona do oi ruhaia. Tano kahu dekena amo do oi toreisi, bona oiemu terona dekenai do oi helai! Siona ena guia taudia e, umui idia guia seini do umui negea oho!

³Lohiabada ese iena bese taudia dekenai ia hereva henia noho, ia gwau, “Tuari taudia ese umui idia guia neganai, davana moni idia henia lasi. Inai bamona danu, umui idia ruhaia neganai, umui ese hoia lou moni do umui henia lasi.

⁴Aigupito dekenai gunaguna umui lao neganai, umui be umui sibona emui ura dainai umui lao. To Asuria taudia ese tuari dekena amo umui idia guia, umui idia abia lao kava, davana idia henia lasi.

⁵Bona hari be inai kara ia vara lou Babulonia dekenai, umui be guia taudia, bona emui davana idia henia lasi. Umui idia biagua taudia ese nega ibounai idia hekokoroku noho, bona nega ibounai egu ladana idia hereva dika henia.

⁶Unai dainai umui, egu bese taudia dekenai, egu ladana do lau hedinaraia, bona egu ladana ena siahu do umui diba. Bona unai dina dekenai, do umui diba, umui dekenai ia hereva noho Diravana be lau. Lau ese inai kara do vara lasi neganai, lau gwauraia guna inai.”

⁷Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho. Siona dekenai idia gwau, “Oiemu Dirava be ia King noho.”

⁸Kamonai! Hanua idia gimaia noho taudia ese, edia boiboi idia habadaia noho! Mai moale bada danu idia boiboi noho! Edia matana dekenai idia itaia diba, Lohiabada ese Siona dekenai ia giroa mai noho!

⁹Ierusalema ena hadikaia gabudia e, do umui boiboi mai moale bada danu. Lohiabada ese iena hanua badana Ierusalema do ia hamauria, bona iena bese taudia do ia hagoadaia.

¹⁰Lohiabada ese iena siahu helagana do ia gaukaralaia. Ia ese iena bese do ia hamauria, bona tanobada taudia ibounai ese, iena hamauria kara do idia itaia.

¹¹Dubu Helaga ena kohu umui huaia noho taudia e, Babulonia dekena amo do umui raka siri momokani! Miro gauna ta do umui dogoatao lasi. Do umui helaga noho, bona unai gabu do umui rakatania.

¹²To inai neganai do umui raka mai haraga lasi, bona do umui heau mai lasi. Badina be Lohiabada, emui Dirava, ese umui do ia hakaua, bona kahana kahana ibounai dekena amo, ia ese umui do ia naria noho.

¹³Lohiabada ia hereva, ia gwau, “Lauegu Hesiai Tauna be, iena gaukara lalonai do ia kwalimu. Ia ese mataurai bona hanamoa do ia davaria.

¹⁴Taunimanima momo ese ia idia itaia neganai, idia hoa bada, mai gari danu. Iena toana be dika, tau ta ena toana bamona lasi.

¹⁵To gabeai, bese idauidau momo, be ia dekenai do idia hoa, bona king taudia ese ia idia itaia neganai, hereva ta do idia gwauraia lasi, badina be tau ta ese ia diba guna lasi gaudia do idia itaia, bona nega ta idia kamonaia lasi gauna, be do idia diba.”