Read Buka Helaga (Hiri Motu) 1993 ISAIA 58 Bible Online

ISAIA 58 - Buka Helaga (Hiri Motu) 1993 bible

ISAIA 58

¹Lohiabada ia gwau, “Oiemu gadona do oi abia isi, mai goada danu do oi boiboi. Lauegu bese Israela taudia do oi hamaoroa, idia be mai edia kara dika!

²Dina ibounai idia ese lau dekenai idia tomadiho henia, bona idia gwau idia ura bada egu dala do idia diba. Bona idia gwau egu taravatu idia ura dikadika idia kamonai henia. Idia gwau idia ura taravatu maoromaoro, be idia dekenai do lau henia. Bona idia gwau lau dekenai do idia tomadiho, mai edia moale bada danu.”

³To taunimanima ese Lohiabada idia nanadaia, idia gwau, “Badina dahaka ai be aniani ania lasi taravatu ai karaia vadaeni, to oi ese ai oi itaia lasi? Badina dahaka aniani ai ania lasi, mai emai manau danu, to oi be oi diba lasi?” Lohiabada ia haere, ia gwau, “Kamonai! Umui ese aniani ania lasi taravatu umui karaia neganai, umui sibona emui ura umui tahua noho, bona umui ese emui gaukara taudia umui hisihisi henidia noho.

⁴Bona aniani ania lasi taravatu umui karaia neganai, umui heai bona umui heatu noho, mai emui dagedage danu. Umui laloa inai bamona aniani ania lasi taravatu umui karaia neganai, lau ese emui guriguri do lau kamonai, a?

⁵Aniani ania lasi taravatu umui karaia noho neganai, umui sibona umui hahisia bamona, bona emui kwarana umui atoa diho, rei manokana bamona, ma puse dabua, mai kahu danu edia latanai umui hekure diho. Inai bamona kara umui gwauraia, be aniani ania lasi taravatu, a? Umui laloa inai kara umui karaia neganai lau moale, a?

⁶“Lasi! Aniani ania lasi taravatu, lau ese lau ura henia gauna, be inai bamona: Dagedage ena seini ibounai do umui kokia, bona kota maoromaoro lasi kara ese ia guia taudia do umui ruhaia.

⁷Hitolo taudia dekenai emui aniani do umui henia, bona ogogami taudia, edia ruma be lasi taudia, be emui ruma dekenai do umui hakaua vareai. Bona mai edia dabua lasi taudia dekenai dabua do umui henia. Bona bema emui varavara taudia be durua idia ura neganai, idia dekena amo do umui hunia lasi.

⁸“Bema unai bamona umui karaia neganai, umui do lau ura henia, bona egu lalokau ese umui do ia hadiaria, daba ena dina bamona. Emui bero be do idia namo haraga, bona lau ese umui dekenai do lau noho nega ibounai, umui do lau hamauria totona. Ma egu hairaina ese umui do ia naria kahana kahana ibounai dekenai.

⁹Umui guriguri neganai lau ese umui do lau haere henia. Lau dekenai umui boiboi neganai, lau be do lau kamonai henia. “Bema umui ese manoka taudia umui dagedage henia lasi, bona samania koikoi, ma ladana hadikaia hereva umui hadokoa,

¹⁰bona bema hitolo taudia dekenai aniani umui henia, bona gau lasi taudia umui durua neganai, umui ia hagegea noho dibura be diari dekenai do lau halaoa, hua ena diari bamona.

¹¹Ma lau ese nega ibounai umui do lau hakaua, bona emui ura gaudia, be umui dekenai do lau henia momokani. Lau ese goada bona mauri namona, be umui dekenai do lau henia. Umui be uma mai ena ranu momo bamona do umui lao. Umui be noho hanaihanai ranu lohilohi bamona.

¹²Emui bese taudia ese, emui hanua gunadia, idia hadikaia gaudia, do idia haginia lou, edia badina nadidia gunadia edia latanai. Taunimanima ese umui do idia herevalaia, do idia gwau, ‘Inai taudia ese magu gunadia idia haginia lou, bona idia ese, haida idia hadikaia guna rumadia idia haginia lou.’ ”

¹³Lohiabada ia gwau, “Sabati Dinana do umui hahelagaia momokani, bona umui sibona emui ura karadia, be unai Dina dekenai do umui karaia lasi. Unai Dina dekenai do umui laolao lasi, do umui gaukara lasi, bona do umui hereva kava lasi.

¹⁴Bema unai bamona umui karaia neganai, moale do umui davaria. Inai bamona moale, be egu gaukara idia karaia taudia ibounai ese idia abia noho. Bona lau ese mataurai umui dekenai do lau henia, tanobada besedia ibounai edia mataurai. Bona umui ese emui sene tauna Iakobo dekenai lau henia tano, be do umui moalelaia. Lau, Lohiabada, lau hereva vadaeni.”