Read Buka Helaga (Hiri Motu) 1993 ISAIA 9 Bible Online

ISAIA 9 - Buka Helaga (Hiri Motu) 1993 bible

ISAIA 9

¹Inai nega dika dekena amo, idia be dala ta lasi do idia heau mauri totona. Nega gunana dekenai Dirava ese Sebuluno bona Napatali iduhu edia tano, be tano mai hemaraina ia halaoa. To gabeai ia ese inai gabu do ia hanamoa, davara badana kone ena dina daekau kahana, ela bona Ioridane Sinavai unai kahana, bona Galilea tano danu, be Dirava ese do ia hanamoa, idau bese taudia idia noho gabuna be unai.

²Dibura dekenai idia raka noho taudia ese, diari badana idia itaia vadaeni. Idia be dibura masemase tano dekenai idia noho, to hari be diari ese, idia ia hadiaria noho.

³Lohiabada e, oi ese edia bese oi habadaia momokani. Oi ese edia moale danu oi habadaia vadaeni. Oiemu vairana dekenai idia moale noho, edia uiti idia utua bona haboua ena moale bamona, bona tuari dekenai abia kohu, idia haria noho ena moale bamona.

⁴Badina be oi ese, edia maduna metauna oi kokia. Edia pagana dekenai ia noho metau ena hisihisi, be oi haorea vadaeni. Bese ta ese oiemu bese taudia ia hisihisi henidia, to oi ese unai bese oi halusia vadaeni, gunaguna oi ese Midiana tuari taudia oi halusia bamona.

⁵Tuari taudia ibounai edia tamaka, bona edia dabua mai edia rarana ibounai, be lahi dekenai do idia gabua ore.

⁶Badina be ita totona natuna ta ia vara! Dirava ese ita dekenai, natuna mero do ia henia! Bona ia be iseda gunalaia tauna do ia lao, bona iena ladana do idia gwauraia, “Sisiba Henia Tauna Namo Herea,” “Siahu Bada Dirava,” “Hanaihanai Noho Tamana,” “Maino ena Lohia.”

⁷Iena King siahuna, be do ia bada daekau lao, bona iena basileia be nega ibounai, mai maino danu do ia noho. Ia ese Davida ena king siahuna do ia abia, bona ia ese Davida ena basileia, do ia haginia bona naria noho, mai kota maoromaorona, bona kara momokani danu, hari ela bona hanaihanai. Inai kara be Siahu Ibounai Lohiabada ese do ia karaia momokani.

⁸Lohiabada ese hereva ta ia siaia Israela ena basileia hadikaia totona, Iakobo ena bese taudia edia latanai.

⁹Israela taudia ibounai, Samaria dekenai idia noho taudia ibounai, be inai hereva do idia diba. Idia be harihari, mai heagi bona hekokoroku danu idia hereva, idia gwau,

¹⁰“Biriki dekena amo idia haginia vadaeni ruma idia moru vadaeni, to ai ese nadi namodia dekena amo do ai haginidia lou. Fig audia be idia utua diho vadaeni, to edia gabu dekenai ai ese sida audia do ai hadoa.”

¹¹Lohiabada ese Israela dekenai ia badu henia dainai, ia ese idia tuari henia totona, idau bese taudia ia hatoreisia.

¹²Dina ia daekau kahana dekena amo Suria taudia, bona dina diho kahana dekena amo Pilistia taudia ese edia ududia idia kehoa, bona idia ese Israela idia ania ore vadaeni. Lohiabada ese inai bamona ia karaia vadaeni, to inai kara ese iena badu ia haorea lasi, ia ese iena imana do ia abia isi noho.

¹³To Israela taudia ese edia lalodia idia giroa lasi. Siahu Ibounai Lohiabada ese idia ia matakani henia vadaeni, to ia dekenai idia giroa lou lasi.

¹⁴Unai dainai Lohiabada ese Israela ena gunalaia taudia bona ena taunimanima edia kerere davana do ia henia. Dina tamona lalonai, Lohiabada ese Israela ena kwarana bona iuna, au raurau bona rigi danu do ia utua oho.

¹⁵Kwarana be tau badadia, mai edia ladadia bada, iuna be hereva koikoi idia gwauraia peroveta taudia.

¹⁶Badina be Israela bese idia gunalaia taudia ese Israela taudia idia hakaua kerere, bona edia dala idia hadikaia momokani.

¹⁷Israela taudia ibounai ese Dirava idia rakatania, bona idia ese Dirava idia gari henia lasi. Idia ibounai edia hereva bona edia kara be dika momokani. Unai dainai Lohiabada ese idia do ia hadikaia. Ia ese eregabe taudia do ia durua lasi, vadaeni mase dekena amo do idia heau mauri lasi. Ia ese danu vabu taudia bona tamana lasi maragidia do ia bogahisihisi henia lasi. Lohiabada ese unai bamona do ia karaia, to unai kara ese iena badu do ia haorea lasi. Ia ese iena imana do ia abia isi noho.

¹⁸Inai taunimanima sibodia edia kara dika ese idia ia hadikaia noho, lahi ese ava ginigini bona au ginigini ia gabua ore bamona. Inai lahi ese ia hanaia lao noho, bona uda audia ia gabua ore noho. Lahi ena kwalahu bada ia daekau lao noho danu.

¹⁹Siahu Ibounai Lohiabada ia badu maragi lasi dainai, ia ese Israela taudia ibounai edia kerere davana do ia henia momokani. Do ia hadikadia, lahi ese uda ibounai ia gabua ore bamona. Tau ta lasi ese iena tadikakana do ia bogahisihisi henia.

²⁰Tano ena kahana ibounai dekenai aniani do idia tahua. Kahana ta dekenai aniani sisina do idia dadia, to do idia hitolo noho. Ma kahana ta dekenai aniani do idia ania, to do idia boga kunu lasi. Ta ta ese sibodia edia natudia edia kopina do idia ania.

²¹Manase ese Eparaima do ia ania, bona Eparaima ese Manase do ia ania. Bona idia ruaosi ese Iuda do idia hadikaia. Inai kara ibounai do idia vara, to Lohiabada ena badu be do ia ore lasi. Ia ese iena imana do ia abia isi noho.