Read Buka Helaga (Hiri Motu) 1993 LEVITIKO 12 Bible Online

LEVITIKO 12 - Buka Helaga (Hiri Motu) 1993 bible

LEVITIKO 12

¹Lohiabada ese Mose ia hamaoroa, ia gwau,

²“Israela taudia do oi hamaoroa inai bamona: Hahine ta ia rogorogo, bona mero ta ia abia neganai, ia be dina 7 do ia miro, hua ta ta rara ia karaia neganai bamona.

³“Dina namba 8 dekenai, mero ena usina ia koua kopina be do idia utua.

⁴Bona do ia goeva totona hahine be dina 33 ma do ia naria, iena rara ia diho noho dainai. Inai dina 33 lalonai hahine ese helaga gaudia do ia dogoatao lasi, bona Palai Dubu do ia raka vareai lasi, vadaeni do ia goeva.

⁵“Bema hahine ese kekeni ta ia havaraia neganai, ia be pura rua do ia miro, hua ta ta rara ia karaia neganai bamona. Bona do ia goeva totona hahine be dina 66 ma do ia naria, iena rara ia diho noho dainai.

⁶“Iena mero o kekeni dainai do ia goeva totona ia naria dinadia idia ore neganai, hahine be hahelagaia tauna dekenai do ia lao. Hahine ese Lohiabada ena Palai Dubu ena iduara dekenai mamoe natuna, lagani tamona gauna, iena gabua ore boubouna, bona pune ta o manu ta ladana kerea ta, iena kara dika boubouna, do ia mailaia. Unai gau ruaosi be hahelagaia tauna ese do ia abia.

⁷“Vadaeni hahelagaia tauna ese unai boubou gaudia be Lohiabada ena vairanai do ia atoa, unai hahine ena kara dika davana karaia totona, bona iena rara diho ena miro hagoevaia totona. Natuna matamata idia havaraia hahine edia taravatu be unai, mero ia abia, o kekeni ia abia hahine ibounai.

⁸“Bema hahine ena moni be hegeregere lasi mamoe do ia hoia, ia ese kerea manu rua o pune natuna rua do ia abia, ta gabua ore boubouna, ma ta kara dika boubouna. Vadaeni hahelagaia tauna ese hahine ena kara dika davana do ia karaia, bona ia be do ia goeva momokani.”