Read Buka Helaga (Hiri Motu) 1993 LEVITIKO 15 Bible Online

LEVITIKO 15 - Buka Helaga (Hiri Motu) 1993 bible

LEVITIKO 15

¹Lohiabada ese Mose bona Arona dekenai ia hereva, ia gwau,

²“Israela taudia do umui hamaoroa, inai taravatu do idia badinaia: Bema tau ta ena usina dekena amo hura bamona ia bubua diho neganai, inai gauna ese unai tau ia hamiroa.

³Sedira unai hura bamona ia bubua noho, o hura ese usina ia koua, to unai tau ia miro noho.

⁴“Iena mahuta patana o geda be idia miro, bona ia ese idia edia latanai ia helai gaudia ibounai danu idia miro.

⁵Unai tau ena mahuta patana o geda ia dogoatao tauna ese iena dabua do ia huria, bona ranu dekenai do ia digu, bona do ia miro noho ela bona dina do ia diho.

⁶“Gorere tauna ena helai gaudia dekenai do ia helai tauna danu ese iena dabua do ia huria, bona do ia digu, bona do ia miro noho ela bona dina do ia diho.

⁷Gorere tauna ena kopina do ia dogoatao tauna danu ese iena dabua do ia huria, bona do ia digu, bona do ia miro noho ela bona dina do ia diho.

⁸“Gorere tauna ese bema goeva tauna dekenai do ia kanudi, unai goeva tauna ese iena dabua do ia huria, bona do ia digu, bona do ia miro noho ela bona dina do ia diho.

⁹Hosi ena doruna dekenai helai gauna ena latanai bema gorere tauna ia helai neganai, unai helai gauna be ia miro.

¹⁰“Gorere tauna ena henunai ia noho gauna ta, bema tau ta ese do ia dogoatao, ia be do ia miro noho ela bona dina do ia diho. Oibe, bona unai gauna ia abia loaloa tauna ese iena dabua do ia huria, bona sibona do ia digu, bona do ia miro noho ela bona dina do ia diho.

¹¹“Gorere tauna bema iena imana be ranu dekenai ia huria lasi, to ia ese tau ta do ia dogoatao neganai, unai tau ese iena dabua do ia huria, bona do ia digu, bona do ia miro noho ela bona dina do ia diho.

¹²Gorere tauna ese do ia dogoatao urona be do idia hamakohia, bona do ia dogoatao disi be ranu dekenai do idia huria.

¹³“Tau ena usina gorere ia ore neganai, ia be dina ibounai 7 do ia naria ela bona ia goeva. Ia ese iena dabua do ia huria, bona ia sibona do ia digu, vadaeni unai murinai do ia goeva.

¹⁴“Dina namba 8 dekenai ia ese kerea manu rua o pune natuna rua do ia abia, Lohiabada ena vairanai do ia mailaia, Palai Dubu ena iduara dekenai, bona hahelagaia tauna dekenai do ia henia.

¹⁵Vadaeni hahelagaia tauna ese manu ta be kara dika boubouna totona do ia alaia mase, bona manu ta be gabua ore boubouna totona do ia alaia mase. Unai dala dekenai, hahelagaia tauna ese unai tau ena kara dika davana do ia karaia, Lohiabada ena vairana dekenai, ena hura bubua dainai.

¹⁶“Bema tau ta dekena amo vesi ia bubua neganai, ia be ranu dekenai do ia digu, iena tauanina ibounai do ia huria, bona do ia miro noho ela bona dina do ia diho.

¹⁷Vesi be dabua dekenai o kopina dabua dekenai bema ia bubua neganai, unai dabua o kopina ibounai do idia huria, bona idia be miro noho ela bona dina do ia diho.

¹⁸“Bema tau ta ese hahine ta danu do idia mahuta hebou, vadaeni vesi do ia bubua, idia ruaosi do idia digu, bona do idia miro noho ela bona dina do ia diho.

¹⁹“Bema hahine ta rara ia karaia, iena hua rara, ia be dina 7 lalonai do ia miro. Bona bema taunimanima ta ese unai hahine dekenai ia kamokau neganai, unai taunimanima be do ia miro noho ela bona dina ia diho.

²⁰Unai hahine ena rara neganai, ia helai o ia hekure latanai gaudia be idia miro noho.

²¹Hahine ena mahuta patana o geda ia dogoatao tauna ese iena dabua do ia huria, bona sibona do ia digu, bona do ia miro noho ela bona dina ia diho.

²²Hahine ena helai gauna ia dogoatao tauna ese iena dabua do ia huria, bona ranu dekenai do ia digu, bona do ia miro noho ela bona dina ia diho.

²³“Hahine ena mahuta dabua gauna ta o iena helai gauna ta be tau ta ese ia dogoatao neganai, unai tau be do ia miro ela bona dina ia diho.

²⁴Tau ta bema unai rara ia karaia noho hahine danu idia sihari neganai, bona hahine ena rara be tau dekenai ia kamokau, unai tau be do ia miro ela bona dina 7 idia ore. Bona edia latanai ia mahuta pata o geda danu be idia miro.

²⁵“Bema hahine ta ena rara kara dinadia be momo, bona ena rara kara negana korikori lasi, o bema ena nega korikori dekenai, to daudau herea, unai hahine be do ia miro noho, ela bona unai rara kara do ia doko. Ia be do ia miro noho, iena hua rara ena nega dekenai ia miro noho hegeregerena.

²⁶“Unai dainai iena mahuta pata bona geda ibounai be miro, iena hua rara nega korikori negana hegeregere, bona do ia helai latanai gaudia do idia miro, iena hua rara nega korikori negana hegeregere.

²⁷“Unai gaudia do ia dogoatao tauna danu be do ia miro, bona iena dabua do ia huria, bona do ia digu, bona do ia miro noho ela bona dina do ia diho.

²⁸To bema hahine ena rara kara do ia doko neganai, ia ese dina 7 do ia naria, vadaeni do ia goeva.

²⁹“Dina namba 8 dekenai, hahine ese kerea manu rua o pune natuna rua do ia abia, hahelagaia tauna dekenai do ia mailaia, Palai Dubu ena iduara dekenai.

³⁰Hahelagaia tauna ese manu ta be kara dika boubouna totona do ia alaia mase, bona manu ta be gabua ore boubouna totona do ia alaia mase. Unai dala dekenai hahelagaia tauna ese unai hahine ena kara dika davana do ia karaia, Lohiabada ena vairana dekenai, iena rara kara dainai.”

³¹Inai dala dekenai Lohiabada ese Mose ia hamaoroa, ia ese Israela taudia do ia sisiba henidia edia miro do idia naria namonamo, vadaeni Lohiabada ena Palai Dubu do idia hamiroa lasi. Palai Dubu be edia kamepa ena huanai ia noho, bona bema idia hamiroa neganai, do idia mase.

³²Inai taravatu be tau ta ena usina dekena amo hura bamona ia bubua noho, bona tau ta ena vesi bema ia bubua neganai hagoevaia dalana.

³³Ma inai taravatu be hahine ta ena rara kara totona, bona tau ta totona, bema hahine mai mirona danu do idia mahuta hebou neganai.