Read Buka Helaga (Hiri Motu) 1993 LEVITIKO 18 Bible Online

LEVITIKO 18 - Buka Helaga (Hiri Motu) 1993 bible

LEVITIKO 18

¹Lohiabada ese Mose dekenai ia hereva, ia gwau,

²“Israela taudia do oi hamaoroa: Lau inai Lohiabada, umui emui Dirava.

³Umui be guna Aigupito tano dekenai umui noho, to Aigupito taudia edia kara bamona do umui karaia lasi. Bona umui do lau hakaua vareai Kanana tano ena taudia edia kara bamona do umui karaia lasi. Edia taravatu danu do umui badinaia lasi.

⁴To lauegu taravatu do umui kamonai henia, bona lauegu oda do umui badinaia. Lau inai Lohiabada, umui emui Dirava.

⁵Unai dainai, lauegu taravatu bona lauegu oda do umui badinaia, unai bamona ia karaia tauna be do ia mauri. Lau inai Lohiabada.

⁶“Oiemu varavara ta dekenai oi do sihari henia lasi. Lau inai Lohiabada.

⁷Oiemu sinana, oiemu tamana ena adavana, dekenai do oi sihari henia lasi. Ia be oiemu sinana, unai bamona hemarai kara do oi karaia lasi.

⁸Oiemu tamana ena adavana ma ta dekenai oi sihari henia lasi, badina ia be oiemu tamana ena.

⁹Oiemu taihuna dekenai oi sihari henia lasi. Oiemu tamana ena natuna kekeni ta, o oiemu sinana ena natuna kekeni ta do oi abia lasi. Ia be oiemu ruma dekenai, o idau ruma ta dekenai ia vara kekeni ta, to do oi abia lasi.

¹⁰Oiemu tubuna kekeni dekenai oi sihari henia lasi, oiemu natuna tau, o oiemu natuna hahine edia kekeni ta do oi abia lasi. Badina edia hemarai be oiemu hemarai danu.

¹¹Oiemu tamana ena adavana ta ena natuna kekeni ta do oi sihari henia lasi, bona oiemu sinana ena adavana ta ena natuna kekeni ta danu do oi abia lasi.

¹²Oiemu tamana ena taihuna dekenai oi sihari henia lasi.

¹³Oiemu sinana ena tadikaka hahine dekenai oi sihari henia lasi.

¹⁴Oiemu tamana o sinana edia tadikaka edia adavana dekenai oi sihari henia lasi, ia danu be oiemu varavara.

¹⁵Oiemu ravana hahine danu do umui sihari lasi, badina ia be oiemu natuna ta ena adavana.

¹⁶Oiemu tadikaka ena adavana do oi sihari henia lasi.

¹⁷“Sedira hahine ta dekenai oi headava, bona hahine be mai ena natuna kekeni o tubuna kekeni, tau ta ena. Vadaeni oi ese unai natuna kekeni o tubuna kekeni do oi adavaia lasi. Unai be hemarai karana.

¹⁸Oiemu adavana ena tadikaka hahine danu umui sihari lasi, bema oiemu adavana ia mauri noho neganai.

¹⁹“Hahine ta, hua gorere ia davaria neganai, do oi sihari henia lasi, badina ia be mai miro danu.

²⁰Oiemu badibadina dekenai tauna ena adavana danu do umui sihari lasi. Unai be miro karana ta.

²¹Oiemu natuna ta dirava ta ena ladana Moleka dekenai do oi henia lasi, idia gabua boubou gauna totona. Unai bamona kara ese lau Dirava, Lohiabada, egu ladana ia hadikaia.

²²“Umui emui tau ta ese ma tau ta do ia sihari henia lasi, tau bona hahine idia karaia bamona. Inai bamona kara be dika momokani, bona inai kara dekenai, lau Dirava lau badu momokani.

²³Ubua gauna ta dekenai do umui sihari henia lasi. Hahine danu be unai bamona do ia karaia lasi. Unai kara be dika momokani.

²⁴“Inai miro karadia ibounai be do umui karaia lasi, badina be umui emui vairana dekenai do lau lulua besedia be unai kara ibounai idia karaia dainai idia miro.

²⁵Idia edia kara ese edia tano idia hamiroa. Unai dainai dika davana be unai tano dekenai lau henia noho. Vadaeni unai tano ese, ia dekenai noho taudia ia luludia, bona idia rakatania noho.

²⁶To umui ese lauegu taravatu bona lauegu oda do umui badinaia, bona unai kara mirodia do umui karaia lasi, umui Israela taudia, bona umui emui huanai idia noho idau taudia danu.

²⁷Badina be inai tano dekenai idia noho guna taudia ese unai miro karadia idia karaia, ia mai bona tano ia miro vadaeni.

²⁸Bema umui ese unai tano unai bamona do umui hamiroa neganai, unai tano ese umui danu do ia lulua, guna idia noho taudia ia lulua bamona.

²⁹Badina umui diba, unai bamona miro karadia ta, bema umui ta ese ia karaia neganai, ia be do umui gwauraia ia be Dirava ena bese tauna lasi.

³⁰Unai dainai, lauegu taravatu do umui kamonai henia, bona unai miro karadia, inai tano dekenai idia noho guna taudia edia kara, be do umui karaia lasi. Vadaeni unai kara dekena amo do umui miro lasi. Lau inai Lohiabada, emui Dirava.”