Read Buka Helaga (Hiri Motu) 1993 LEVITIKO 21 Bible Online

LEVITIKO 21 - Buka Helaga (Hiri Motu) 1993 bible

LEVITIKO 21

¹Bona Lohiabada ese Mose ia hamaoroa, ia gwau, “Hahelagaia taudia, Arona ena natuna tau taudia do oi oda henia, idia ta ese iena hanua mase tauna hahelagaia totona gaukara ia karaia neganai, unai mase tauna do ia dogoatao lasi. Ia ese sibona do ia hamiroa lasi, mase tauna ena miro dekenai garina.

²To iena varavara korikori taudia ta ia mase neganai, hegeregere iena sinana, tamana, natuna tau, natuna hahine, tadikakana,

³o iena taihuna, ia naria noho, badina ia do headava lasi kekeni, unai varavara korikori taudia sibona ia dogoatao diba.

⁴Hahelagaia tauna danu ese iena adavana ena varavara taudia idia mase neganai, edia tauanina dekenai do ia kamokau lasi, do ia miro garina.

⁵“Hahelagaia tauna ese iena kwarana huina o iena aukina huina do ia utua lasi, bona iena kopina be do ia utua o ivaia lasi.

⁶“Ia ese Dirava ena vairana dekenai do ia helaga, bona Dirava ena ladana do ia hahemaraia lasi. Ia ese gabua ore bouboudia bona Dirava ena paraoa bouboudia ia karaia noho dainai, ia be do ia helaga.

⁷“Hahelagaia tauna ese ariara hahine, o lebulebu hahine, o iena tau ese ia negea hahine ta do ia adavaia lasi. Badina ia be helaga Dirava ena vairana dekenai.

⁸“Hahelagaia taudia be helaga dainai, idia do umui matauraia, badina be idia ese lau Dirava egu paraoa bouboudia idia karaia noho. Lau inai Lohiabada, lau be helaga, bona egu bese taudia lau hahelagaia noho.

⁹“Bema hahelagaia tauna ena natuna kekeni ese sibona be lebulebu o ariara hahine ia halaoa neganai, ia ese iena tamana ia hahemaraia vadaeni. Ia be lahi dekenai do umui gabua mase.

¹⁰“Hahelagaia Tauna Badana be iena kwarana dekenai dehoro helagana idia bubua vadaeni, bona idia hahelagaia vadaeni, dabua helagadia do ia karaia totona, vadaeni ia ese iena huina do ia duaria noho namonamo, bona ia ese iena dabua do ia darea lasi, mase taudia totona idia taitai neganai.

¹¹Ia ese mase tauna kahirakahira do ia lao lasi, iena tamana o sinana danu, idia kahirakahira do ia lao lasi, do ia miro garina.

¹²Ia ese Helaga Gabuna do ia rakatania lasi, Dirava ena Palai Dubu do ia matauraia lasi garina. Badina be Dirava ena dehoro helagana be iena latanai idia bubua vadaeni, ia be helaga. Lau Lohiabada inai.

¹³“Ia ese sihari do ia diba lasi, rami hebou kekeni sibona do ia adavaia.

¹⁴Ia ese vabu, o negea hahine, o lebulebu hahine ta do ia adavaia lasi, to sihari ia do diba lasi kekeni, iena bese dekena amo, sibona do ia adavaia.

¹⁵Unai dekena amo iena natuna be do idia hemarai lasi edia bese taudia edia huanai. Badina be lau Lohiabada ese lau hahelagaia vadaeni, Hahelagaia Tauna Badana.”

¹⁶Lohiabada ese Mose ma ia hereva henia, ia gwau,

¹⁷“Arona do oi hamaoroa, ‘Oiemu natuna o tubuna ta, bema iena tauanina be mai ena dika ta, o gorere ta, ia ese Dirava ena paraoa boubouna be lau Lohiabada dekenai do ia henia lasi. Inai be noho hanaihanai taravatuna.’

¹⁸“Badina be tau ta mai ena tauanina dika ta be egu boubou do ia karaia lasi, iena matana ia kepulu, o bema iena aena ia dika, o bema iena udubaubauna ia makohia, o bema iena ima kwakikwakina o ae kwakikwakina be momo, 5 sibona lasi,

¹⁹o bema iena aena o imana ia makohia,

²⁰o bema iena doruna ia gageva, o kwadogi herea tauna, o matana ta ia dika tauna, o iena kopina dekenai toto idia noho tauna, o iena abona idia dika tauna.

²¹“Arona ena natuna o tubuna tauna ta, bema iena tauanina be mai ena dika ta, ia ese lau kahirakahira do ia raka mai lasi, Lohiabada ena gabua ore bouboudia karaia totona. Iena tauanina be mai ena dika dainai, Dirava ena paraoa do ia henia lasi.

²²Unai tau ese Dirava dekenai henia paraoa ia ania diba, helaga gauna, bona helaga herea gauna danu.

²³To iena tauanina be mai ena dika ta dainai, ia ese Helaga Herea Gabuna ena koua dabua helagana kahirakahira, o boubou patana kahirakahira do ia raka mai lasi. Ia ese inai lauegu helaga gaudia do ia hamiroa lasi, badina lau Lohiabada ese unai gaudia lau hahelagaia vadaeni.”

²⁴Inai hereva ibounai be Mose ese Arona bona iena natuna tau danu, bona Israela taudia ibounai dekenai ia hamaoroa.