Read Buka Helaga (Hiri Motu) 1993 LEVITIKO 24 Bible Online

LEVITIKO 24 - Buka Helaga (Hiri Motu) 1993 bible

LEVITIKO 24

¹Lohiabada ese Mose ia hamaoroa, ia gwau,

²“Israela taudia do oi oda henia, olive au huahua ena dehoro, goevagoeva momokani, lamepa ena oela gauna, oi dekenai do idia henia, Palai Dubu ena lamepa be do idia gabua hanaihanai totona.

³Palai Dubu lalonai, Maua Helaga ena koua dabua ena murimurinai, Arona ese inai lamepa do ia gabua. Adorahi ibounai neganai ia ese lamepa do ia gabua hamatamaia, bona hanuaboi ibounai do ia gabua noho ela bona dabai, Lohiabada ena vairana dekenai. Inai taravatu be Israela taudia edia latanai do ia noho ela bona hanaihanai.

⁴Arona ese lamepa do ia naridia, lamepa dogoatao gauna dekenai, golo namo herea dekena amo karaia gauna, ena latanai unai lamepa ibounai do ia gabua hanaihanai, Lohiabada ena vairanai.

⁵“Paraoa namo herea, iena metau 12 kilogaram do oi abia, beredi ibounai 12 do oi gabua.

⁶Inai beredi be Lohiabada ena vairanai do oi atodia, laini rua dekenai, golo namo herea patana ena latanai, laini ta be beredi 6, ma laini ta be beredi 6.

⁷Inai laini ruaosi edia badinai muramura mai bonana pauda namona momokani do oi atoa. Inai bonana namona muramura be Lohiabada dekenai henia aniani boubouna ena toana, beredi ena gabu ia abia, bona Lohiabada dekenai inai pauda do oi gabua ore.

⁸“Inai beredi be Sabati Dina ibounai Lohiabada ena vairanai do idia atoa ela bona hanaihanai. Inai be Israela taudia edia harihari gauna, edia gwauhamata ela bona hanaihanai.

⁹Bona inai beredi be Arona bona iena natuna taudia edia, inai beredi be gabu helagana ta dekenai do idia ania. Lohiabada ena lahi dekenai gabua bouboudia ibounai edia huanai, inai boubou sibona be helaga herea. Noho hanaihanai taravatuna be inai.”

¹⁰Tau ta, iena sinana be Israela hahine ladana Selomiti Dibiri, Dano iduhu hahine, bona iena tamana be Aigupito tauna, be kamepa lalonai Israela korikori tauna ta danu idia heai.

¹¹Idia heatu noho neganai, unai Israela hahine, Selomiti, ena natuna ese Dirava ena ladana ia hereva dika henia. Unai dainai tau haida ese Mose dekenai idia hakaua lao.

¹²Vadaeni unai tau idia kwatua, bona gabu ta dekenai idia koua, ela bona Lohiabada ese iena ura idia dekenai do ia hedinaraia.

¹³Vadaeni Lohiabada ese Mose ia hamaoroa, ia gwau,

¹⁴“Unai lau ia hereva dika henia tauna, be kamepa ena murimurinai do umui abia lao. Iena hereva dika idia kamonai taudia ibounai ese unai tau ena kwarana latanai edia imadia do idia atoa. Unai murimuri kamepa taudia ibounai ese nadi dekena amo do idia hodoa mase.

¹⁵“Israela taudia dekenai do oi hadibaia danu, Dirava do ia hereva dika henia tauna ese iena kerere davana do ia davaria.

¹⁶Lohiabada ena ladana do ia hereva dika henia tauna be do ia mase. Israela tauna ta o Israela dekenai ia noho idau bese tauna ta bema Lohiabada ena ladana ia hereva dika henia neganai, Israela taudia ese nadi dekenai do idia hodoa mase.

¹⁷“Tau ta ia alaia tauna be do umui alaia mase.

¹⁸Bema tau ta ena mauri gauna be tau ma ta ese ia alaia mase, unai mauri gauna ena davana be iena biaguna dekenai do ia henia. Mauri gauna ena davana be mauri gauna.

¹⁹“Bema tau ta ese ma tau ta ia haberoa, ia haberoa hegeregerena dekena amo, danu do idia haberoa.

²⁰Bero ena davana be bero, matana ena davana be matana, isena ena davana be isena. Ia ese tau ta ia hadikaia hegeregerena, umui ese ia danu do umui hadikaia.

²¹“Ubua gauna ia alaia mase tauna ese davana, ubua gauna hegeregerena ta do ia henia, to taunimanima do ia alaia mase tauna be do umui alaia mase.

²²“Israela dekenai idia noho idau bese taudia bona Israela taudia korikori dekenai inai taravatu be tamona. Lau Lohiabada be umui emui Dirava.”

²³Mose ese Israela taudia dekenai unai hereva ia hamaorodia murinai, idia ese unai tau idia abia, kamepa ena murimurinai idia hakaua lao. Unuseni nadi dekena amo idia hodoa mase. Inai dala dekenai Israela taudia ese Lohiabada ena oda Mose dekenai idia badinaia.