Read Buka Helaga (Hiri Motu) 1993 LEVITIKO 27 Bible Online

LEVITIKO 27 - Buka Helaga (Hiri Motu) 1993 bible

LEVITIKO 27

¹Lohiabada ese Mose ma ia hereva henia, ia gwau,

²“Israela taudia do oi hamaoroa, bema tau ta ese ia gwauhamata, sibona o taunimanima ta Lohiabada dekenai do ia henia neganai, hoia lou davadia be inai:

³Tau ta, ena mauri lagani 20 ela bona 60 be siliva moni 50, Helaga Gabuna ena sikele hegeregerena.

⁴Hahine be siliva moni 30.

⁵Mero ta, ena mauri lagani be 5 ela bona 20, be siliva moni 20. Kekeni ta be siliva moni 10.

⁶Mero maragina ta, ela bona mauri lagani 5, be siliva moni 5. Kekeni maragina ta, ela bona mauri lagani 5, be siliva moni 3.

⁷Tau buruka ta, ena mauri lagani be 60 mai kahana, be siliva moni 15. Hahine buruka ta, ena mauri lagani be 60 mai kahana, be siliva moni 10.

⁸“Bema gwauhamata ia gwauraia tauna be ogogami dainai davana korikori ia henia diba lasi, ia ese gwauhamata ia henia dekenai tauna do ia mailaia, hahelagaia tauna ena vairana dekenai do idia gini hebou. Vadaeni hahelagaia tauna ese davana do ia hamaragia, unai gwauhamata tauna ese ia henia diba hegeregerena.

⁹“Bema tau ta ia gwauhamata, mauri gauna ta lau Lohiabada dekenai do ia henia, ia ese do lau abia dae diba gauna do ia mailaia. Bona unai bamona boubou be lau dekenai do ia helaga.

¹⁰Unai mauri gauna totona ia gwauhamata tauna ese mauri gauna ma ta unai gunana ena gabu dekenai ia henia diba lasi. Namona ta be dikana ena gabu ia abia diba lasi. Dikana ta be namona ena gabu ia abia diba lasi. To bema ta ma ia henia neganai, ruaosi be helaga, Lohiabada ena.

¹¹“To bema gwauhamata be mauri gauna mirona ta totona, Lohiabada ese boubou totona do ia abia dae lasi gauna, gwauhamata tauna ese unai mauri gauna be hahelagaia tauna ena vairana dekenai do ia abia lao.

¹²Hahelagaia tauna ese unai mauri gauna ena davana do ia gwauraia, mauri gauna ena namo o dika hegeregerena, bona davana korikori be unai.

¹³“Bema unai tau ia ura unai mauri gauna do ia hoia lou neganai, ia be atoa kau moni danu do ia henia. Atoa kau moni be, bema davana korikori be karoa 5 neganai, karoa ta be atoa kau moni ena bada, vadaeni davana be karoa 6.

¹⁴“Bema tau ta ese iena ruma be Lohiabada dekenai ia henia, helaga gauna, hahelagaia tauna ese unai ruma ena davana do ia gwauraia, ruma ena namo o dika hegeregerena, bona ena davana korikori be unai.

¹⁵“Bema ruma ia henia tauna ia ura hoia lou neganai, ia ese davana korikori do ia henia, mai atoa kau moni danu. Atoa kau moni be, bema davana korikori be karoa 5, karoa ta be atoa kau moni ena bada, vadaeni davana be karoa 6.

¹⁶“Bema tau ta ese iena tano ena kahana ta Lohiabada dekenai ia hahelagaia neganai, unai tano ena davana be, idia hadoa neganai uhe hida tano lalonai do idia atoa hegeregerena. Bali ena metau 20 kilogaram ena davana be siliva moni 10.

¹⁷“Bema unai tano be Iubili Lagani dekenai ia hahelagaia, tano ena davana be bada.

¹⁸To bema Iubili Lagani murinai unai tano Lohiabada dekenai ia hahelagaia, hahelagaia tauna ese davana do ia hamaragia, lagani hida do idia noho ela bona Iubili Lagani hegeregerena.

¹⁹“Bema unai tano ia hahelagaia vadaeni tauna ese ia ura tano do ia hoia lou, tano ena davana do ia henia, mai atoa kau moni danu. Atoa kau moni be, bema davana korikori be karoa 5, karoa ta be atoa kau moni ena bada, vadaeni davana be karoa 6.

²⁰“Bema tano ia hahelagaia vadaeni tauna ese unai tano be tau ta dekenai ia hoia lao, to Lohiabada dekena amo ia hoia lou guna lasi, unai tau ese unai tano do ia hoia lou diba lasi,

²¹bona Iubili Lagani do ia ginidae neganai, unai tano be Lohiabada ena tano helagana korikori do ia lao. Hahelagaia taudia ese do idia abia, edia tano.

²²“Bema tau ta ese iena tano ta, iena sene taudia dekena amo ia abia lasi, to moni dekena amo ia hoia gauna ia hahelagaia Lohiabada ena,

²³hahelagaia tauna ese do ia duahia lagani hida do ia noho ela bona Iubili Lagani, bona unai lagani edia momo hegeregerena, tano ena davana do ia gwauraia. Bona unai dina dekenai unai tau ese unai tano ena davana Lohiabada dekenai do ia henia. Unai moni be helaga, Lohiabada ena.

²⁴“To Iubili Lagani dekenai unai tano be iena biaguna korikori, iena sene taudia dekena amo ia abia tauna, ese do ia abia lou.

²⁵“Davana ibounai be Helaga Gabuna ena dala maorona, bona ena sikele dekena amo do idia duahia namonamo.

²⁶“Mauri gaudia edia vara guna natudia be Lohiabada ena. Unai dainai tau ta ese unai bamona ta Lohiabada dekenai ia hahelagaia diba lasi. Boromakau natuna vara guna, bona mamoe natuna vara guna ibounai be Lohiabada ena.

²⁷“To mauri gauna mirona ena natuna vara guna be biaguna ese moni dekena amo ia hoia lou diba, Helaga Gabuna ese ia gwauraia davana dekenai, mai atoa kau moni danu. Atoa kau moni be, bema davana korikori be karoa 5, karoa ta be atoa kau moni ena bada, vadaeni davana be karoa 6. To bema biaguna ese ia hoia lou lasi, hahelagaia tauna ese do ia hoia lao diba, ena davana korikori dekenai.

²⁸“Bema tau ta ese taunimanima ta, o mauri gauna ta, o tano ta be Lohiabada dekenai ia henia ore momokani, ia ese ia hoia lao, o hoia lou diba lasi. Unai bamona taudia bona gaudia be helaga momokani, Lohiabada ena.

²⁹“Taunimanima ta, bema ia dika rohoroho, bona iena kerere davana be mase, bona bema kota ese Lohiabada dekenai ia henia ore neganai, unai tau o hahine be idia hoia lou diba lasi. Ia be do umui alaia mase.

³⁰“Tano ena anina ibounai, uiti, bali, koni, o au huahua ibounai, be edia karoa 10 dekena amo, karoa ta do umui hahelagaia, Lohiabada ena.

³¹Bema tau ta ia ura unai karoa helagana ta ia hoia lou, ia ese davana korikori mai atoa kau moni danu do ia henia. Atoa kau moni be, bema davana korikori be karoa 5, karoa ta be atoa kau moni ena bada, vadaeni davana be karoa 6.

³²“Boromakau orea bona mamoe orea danu edia karoa namba 10 do umui atoa siri, Lohiabada ena. Edia biaguna ese 10, 10 dekena amo do ia duahia, bona namba 10 gaudia be helaga, Lohiabada ena.

³³“Biaguna ese do ia itaia lasi, edena be namona, o edena be dikana, bona dikadia do ia abia hidi lasi, namodia edia gabu do idia abia totona. Bema biaguna ese mauri gauna ta unai bamona ia senisia gwauraia neganai, gau ruaosi, namona bona dikana danu, be do idia helaga, Lohiabada ena. Bona biaguna ese do ia hoia lou diba lasi.”

³⁴Inai taravatu be Lohiabada ese Mose dekenai ia henia, Sinai Ororo dekenai, Israela taudia totona.