Read Buka Helaga (Hiri Motu) 1993 LEVITIKO 7 Bible Online

LEVITIKO 7 - Buka Helaga (Hiri Motu) 1993 bible

LEVITIKO 7

¹Ma Mose ese Dirava ena hadibaia hereva ia gwauraia: Kerere totona bouboudia edia taravatu be inai, idia be helaga herea bouboudia:

²Inai kerere kokia totona boubou gauna be boubou patana ena mirigini kahana dekenai do idia alaia. Inai gabu dekenai danu idia gabua ore boubou gaudia idia alaia ore. Inai boubou gauna ena rara be boubou patana ena kahana 4 dekenai do idia negea.

³Unai boubou gauna ena digara ibounai be do idia kokia, bona boubou patana dekenai do idia atoa: Iuna, mai digarana ibounai, bogana ena digara ibounai,

⁴nadinadi mai edia digara, bona asena ena kahana badana.

⁵Hahelagaia tauna ese inai digara ibounai be boubou patana dekenai do ia gabua ore. Inai be kerere totona aniani boubouna, Lohiabada ena.

⁶Hahelagaia taudia edia bese natuna tau ibounai ese inai boubou vamuna idia ania diba. To gabu helagana ta dekenai do idia ania, badina be inai boubou vamuna be helaga herea momokani.

⁷Kara dika totona boubouna bona kerere totona boubouna edia taravatu be tamona: Boubou ena vamuna be unai boubou helaga ia karaia hahelagaia tauna ena, do ia ania diba.

⁸Gabua ore boubou gauna ena kopina danu, be unai boubou helaga ia karaia hahelagaia tauna ese do ia abia, iena.

⁹Paraoa bouboudia ibounai, amu dekenai, paraipani dekenai, o auri palaka dekenai ia gabua gaudia ibounai, be Lohiabada dekenai ia henia hahelagaia tauna ena, do ia ania diba.

¹⁰To idia gabua lasi paraoa bouboudia ibounai, mai olive dehoro danu mikisi gaudia, o paraoa kaukau sibona gaudia, be Arona ena natuna tau edia, do idia haria, ta ta ese hegeregere do idia abia.

¹¹Dirava danu maino karaia boubouna, Lohiabada dekenai henia gauna, ena taravatu be inai:

¹²Bema tau ta ese Dirava tanikiu henia totona, maino karaia boubouna ia mailaia neganai, ia alaia boubouna danu be beredi, mai hatubua muramura lasi gauna do ia mailaia. Inai beredi be sisina metau bamona, paraoa bona olive dehoro idia mikisi dekena amo idia karaia gauna, o bisikesi, olive dehoro dekena amo idia dahua gaudia, o keke, paraoa bona olive dehoro idia mikisi dekena amo karaia gaudia.

¹³Ma danu ia ese mai hatubua muramura danu beredi haida do ia henia.

¹⁴Inai paraoa idauidau dekena amo, beredi sisina metauna ta, bisikesi ta, o keke ta, bona mai hatubua muramura beredi ta Lohiabada dekenai do ia henia. Inai boubou be hahelagaia tauna, boubou patana dekenai boubou gauna ena rara ia negea tauna, ena. Do ia ania diba.

¹⁵Inai maino karaia boubou gauna ena vamuna be ia henia dinana dekenai do ia ania, haida do ia noho kava lasi ela bona dabai.

¹⁶To bema tau ta ena boubou be iena gwauhamata ia hamomokania dainai, o sibona ena harihari gauna neganai, hahelagaia tauna ese, Lohiabada dekenai ia henia dinana dekenai, be unai boubou vamuna haida ia ania diba, bona dina iharuana danu haida ia ania diba.

¹⁷To dina ihatoina dekenai bema unai vamu haida ia noho neganai, do idia gabua ore momokani.

¹⁸Bema dina ihatoina dekenai unai vamu idia ania neganai, Dirava ese unai tau ena boubou gauna do ia abia dae lasi. Bona unai boubou ia henia tauna be Lohiabada ese do ia hanamoa lasi. Ia be do ia miro, bona ia ania tauna danu be do ia kerere.

¹⁹Bema Dirava danu maino karaia vamu be gau mirona dekenai ia kamokau neganai, idia ese unai vamu do idia ania lasi, to lahi dekenai do idia gabua ore. Dirava ena Taravatu hegeregerena idia goeva taudia ibounai ese unai maino karaia boubou ena vamu idia ania diba.

²⁰To bema ia goeva lasi tauna ta ese Dirava danu maino karaia boubouna ia ania neganai, ia be Dirava ena bese dekena amo do idia atoa siri.

²¹Bona sedira tau ta ese taunimanima edia gau mirona ta, o mauri gauna ta ena gau mirona ta, o Dirava ena taravatu hegeregerena miro gauna ta, o bodaga gauna ta do ia dogoatao. Bema gabeai unai tau ese Dirava danu maino karaia boubou vamuna do ia ania neganai, ia be Dirava ena bese dekena amo do idia atoa siri.

²²Ma Lohiabada ese inai taravatu Mose dekenai ia henia:

²³Israela taudia ese digara do idia ania lasi, boromakau ena digara, o mamoe ena digara, o nanigosi ena digara.

²⁴Do ia mase kava gauna, o dagedage gauna ta ese ia alaia gauna ta ena digara be edia gaukara idauidau totona idia gaukaralaia diba, to do idia ania lasi.

²⁵Badina be bema tau ta ese digara do ia ania, Lohiabada dekenai gabua ore boubou totona ia henia diba gauna ta ena digara, unai tau be Dirava ena bese dekena amo do idia atoa siri.

²⁶Rara danu do idia ania lasi, manu ta, o mauri gauna ta ena rara. Inai taravatu be do idia badinaia momokani, edia noho gabudia ibounai dekenai.

²⁷Rara do ia ania tauna be Dirava ena bese dekena amo do idia atoa siri.

²⁸Ma Lohiabada ese Mose dekenai inai hadibaia hereva ia henia:

²⁹Israela taudia ese inai boubou taravatu do idia badinaia: Dirava danu maino karaia boubouna ia mailaia tauna ese iena boubou kahana be Dirava dekenai do ia henia.

³⁰Sibona ena imana dekenai unai aniani boubouna Lohiabada dekenai do ia mailaia. Ia ese unai vamu ena digara bona ena kemena Lohiabada dekenai do ia henia.

³¹Hahelagaia tauna ese boubou patana dekenai unai digara do ia gabua ore, to kemena be hahelagaia taudia, Arona ena bese taudia ese do idia ania.

³²Inai boubou ia mailaia tauna ese boubou gauna ena aena, idiba kahana gauna, be hahelagaia tauna dekenai do ia henia.

³³Arona ena natuna, boubou vamuna ena rara bona digara boubou patana dekenai ia atoa tauna, ese unai aena idibana do ia ania.

³⁴Boubou gauna ena kemena be harihari gauna ta, aena idibana danu be henia gauna ta. Idia be Israela taudia edia maino karaia bouboudia dekena amo lau Dirava ese lau abia gaudia. Bona Israela taudia ese inai kemena bona aena be Arona bona iena tubuna taudia dekenai do idia henia ela bona hanaihanai.

³⁵Hahelagaia taudia edia gaukara davana be inai. Edia hahelagaia dinana dekenai, Lohiabada dekenai idia gabua ore vamuna kahana dekena amo idia ania diba aniani gaudia be unai.

³⁶Edia hahelagaia dinana dekenai, Lohiabada ese oda ia gwauraia, ia gwau Israela taudia ese unai kemena bona aena idibana be hahelagaia taudia dekenai do idia henia, edia aniani. Inai be edia gaukara davana, gabua bouboudia ibounai dekena amo, ela bona hanaihanai.

³⁷Gabua ore bouboudia, bona paraoa bouboudia, bona kara dika totona bouboudia, bona kerere totona bouboudia, bona hahelagaia totona bouboudia, bona Dirava danu maino karaia bouboudia edia taravatu be unai.

³⁸Unuseni, Sinai Ororo dekenai Lohiabada ese inai boubou edia taravatu be Mose dekenai ia henia. Dinana be unai, Lohiabada ese Israela taudia ia oda henidia edia boubou gaudia ia dekenai do idia mailaia, Sinai, taunimanima idia noho lasi gabuna dekenai.