Read Buka Helaga (Hiri Motu) 1993 IEREMIA 18 Bible Online

IEREMIA 18 - Buka Helaga (Hiri Motu) 1993 bible

IEREMIA 18

¹Lohiabada ese lau dekenai ia hereva, ia gwau,

²“Ieremia e, uro karaia tauna ena ruma dekenai do oi lao, unuseni lau ese hereva ta oi dekenai do lau gwauraia.”

³Vadaeni unai gabu dekenai lau lao, bona uro karaia tauna lau itaia, ia be uro giroagiroa patana dekenai ia gaukara noho.

⁴Ia karaia noho urona be uro karaia tauna ena imana dekenai ia dika, vadaeni ia ese unai raro ia haboua lou, bona uro idauna ta ia karaia, ia sibona ena laloa hegeregerena.

⁵Vadaeni Lohiabada ena hereva be lau dekenai ia mai, ia gwau,

⁶“Israela besena e, inai uro karaia tauna ia karaia hegeregerena, be lau ese do lau karaia diba lasi, a? Umui be lauegu imana dekenai umui noho, raro be uro karaia tauna ena imana dekenai ia noho hegeregerena.

⁷Sedira nega ta lau ese bese ta, o basileia ta lau herevalaia, lau gwau do lau kokia, do lau makohia maragimaragi, o do lau hadikaia ore.

⁸To sedira unai lau herevalaia besena ese iena kara dika do ia rakatania, vadaeni unai neganai, lau ese ia do lau hadikaia kara, lau herevalaia gauna, be do lau karaia lasi.

⁹“To sedira nega ta lau ese bese ta, o basileia ta lau herevalaia, lau gwau do lau hadoa o haginia.

¹⁰To sedira unai bese ese lau do ia kamonai henia lasi, bona kara dika do ia karaia. Vadaeni unai neganai lau ese ia haginia kara, lau herevalaia gauna, be do lau karaia lasi.

¹¹Unai dainai, harihari Iuda taudia bona Ierusalema noho taudia be do oi hamaoroa, oi gwau: Lohiabada be inai bamona ia hereva, ia gwau, ‘Kamonai! Lau ese umui hadikaia dalana lau karaia hegaegae noho. Umui ibounai ese emui dala dikadia do umui hadokoa, bona emui dala bona kara ibounai do umui hagoevaia.’

¹²Idia ese oi dekenai do idia haere, do idia gwau, ‘Lasi, ai be unai bamona do ai karaia lasi, aiemai ura bona aiemai laloa hegeregerena do ai karaia. Ai ta ta be aiemai kudouna dikadia hegeregerena do ai karaia, mai emai laloa auka danu!’ ”

¹³Unai dainai Lohiabada be inai bamona ia hereva, ia gwau, “Bese idauidau ibounai taudia edia huana dekenai, do oi henanadaia, do oi gwau: Nega ta inai bamona kara ia vara vadaeni, a? Kekeni, tau ia do diba lasi kekeni, ena ladana be Israela, ese kara dika bada herea momokani ia karaia vadaeni.

¹⁴Lebanona ena ororo ataiai gabudia, be nega ta sinou ia rakatanidia, a? Ororo dekena amo idia diho mai ranu guri ena ranu, be nega ta ia doko diba, a?

¹⁵To lauegu bese taudia ese, lau idia laloaboio vadaeni. Mai bonana muramura be dirava koikoidia edia vairanai, idia gabua noho. Idia edia dala dekenai idia hekwakwanai, bona idia moru, bona lauegu dala gunana, laolao dalana korikori dekenai idia raka lasi. Idia be uda daladia sibona dekenai idia raka.

¹⁶Idia ese edia tano idia hadikaia vadaeni, bona taunimanima hagaria gabuna idia halaoa vadaeni. Taunimanima idia ura lasi hanaihanai gabuna, be idia ese idia halaoa vadaeni. Idia raka hanaia taudia ibounai ese, inai tano idia itaia neganai, do idia gari bada herea. Mai hoa danu edia kwaradia do idia giroagiroa.

¹⁷Lau Lohiabada ese lauegu bese do lau lulua lao, idia dekenai idia tuari taudia edia vairana dekena amo, dina ia daekau kahana ena lai ese kahu ia hodaia lao bamona. Lau be idia dekena amo do lau raka siri, bona dika be idia dekenai ia ginidae neganai, lau ese idia do lau durua lasi.”

¹⁸Taunimanima be idia hereva hebou, idia gwau, “Umui mai, Ieremia hadikaia dalana do ita laloa. Badina be nega ibounai hahelagaia taudia be ita dekenai idia noho, aonega taudia danu ita danu idia noho, ita idia sisiba henia totona. Peroveta taudia danu be idia noho, Dirava ena hereva ita dekenai do idia mailaia. Namona be Ieremia do ita samania, bona iena hereva do ita kamonai henia lou lasi.”

¹⁹Vadaeni, lau Ieremia be lau guriguri, lau gwau, “Lohiabada e, lau dekenai do oi kamonai, bona lau dekenai idia dagedage noho taudia edia samani hereva lau totona do oi kamonai.

²⁰Bema tau ta ese kara namona ia karaia neganai, davana dikana do idia henia, a? Lasi momokani! Lauegu kara mani do oi laloa, idia dekenai oi badu neganai, lau ese oi lau noia, oiemu badu do lau hakerua totona. To harihari, mai dagedage danu, guri ta idia geia, lau do idia hadikaia totona.

²¹Unai dainai, Lohiabada e, lau ura oi ese edia natudia dekenai hitolo bada do oi henia, vadaeni do idia mase. Bona tuari do oi siaia, idia momo do idia mase totona. Bona gorere do oi siaia, idia momo do ia hamasea. Bona edia uhau do oi alaia mase tuari lalonai. Unai dainai edia hahine taudia be mai adavana lasi, bona mai edia natuna lasi.

²²Dagedage taudia do oi siaia, vadaeni karaharaga edia ruma do idia vareai kava, edia kohu do idia henaoa ore. Do oi hagaridia dikadika, vadaeni do idia boiboi mai hoa dika danu. Badina be guri ta idia geia vadaeni, lau do idia hadikaia totona, bona tarapu idia atoa, lau do idia abia totona.

²³Lohiabada e, edia kara ibounai oi diba noho. Idia laloa hebou noho, lau do idia alaia mase totona. Edia dika do oi gwauatao lasi, bona edia kerere do oi laloaboio lasi. Idia dekenai do oi badu henia, bona idau bese tuari taudia dekena amo, idia do oi halusia momokani.”