Read Buka Helaga (Hiri Motu) 1993 IEREMIA 23 Bible Online

IEREMIA 23 - Buka Helaga (Hiri Motu) 1993 bible

IEREMIA 23

¹Lohiabada be ia hereva, ia gwau, “Lauegu bese idia gunalaia kerere taudia be davana dikana momokani do idia davaria. Idia be hegeregere mamoe naria taudia dikadia bamona, edia mamoe idia hadikaia, bona idia luludia kava.

²Unai dainai lau Lohiabada, Israela ena Dirava, lau ese umui, egu bese edia gunalaia taudia lau sisiba henia inai: Umui ese egu mamoe umui lulua lao kava, idia heau kava gabu momo dekenai. Umui naridia namonamo lasi. Unai dainai lau Lohiabada ese umui emui dika ena davana do lau henia.

³“Lauegu bese taudia, tano idauidau dekenai lau luludia, idia noho taudia be do lau haboua lou. Bona do lau hakaudia mai, edia gabu korikori dekenai do idia vareai lou. Unuseni natuna momo do idia havaraia, bona bese badana ma do idia lao.

⁴Lau ese gunalaia taudia matamatadia do lau abia hidi, bona idia ese egu mamoe do idia naria namonamo. Lauegu bese be do idia gari lou lasi, bona idia ta be do ia boio lasi. Lau, Lohiabada, lau hereva inai.”

⁵Ma Lohiabada ia gwau, “Kamonai! Nega ia mai noho, lau ese King ta, kara maoromaoro Tauna, do lau abia hidi. Ia be Davida ena tubuna ta. Inai King ese mai aonega, mai kara maoromaoro, bona mai kara namona danu inai tano do ia gunalaia.

⁶Ia be King neganai, Iuda taudia edia noho mauri be namo, bona Israela taudia be mai maino danu do idia noho. Bona idia ese inai King ena ladana do idia atoa, ‘Lohiabada be Iseda Kara Maoromaoro.’ ”

⁷Lohiabada ma ia gwau, “Ma nega ia mai noho, taunimanima be inai bamona do idia hereva lou lasi: ‘Mauri Lohiabada, Aigupito dekena amo Israela taudia ia hakaua Diravana ena ladana dainai lau gwauhamata inai.’

⁸Lasi. To inai bamona do idia hereva, ‘Mauri Lohiabada, mirigini kahana tanona, bona ia luludia lao tanodia ibounai dekena amo Israela taudia ia hakaua lou mai Diravana ena ladana dainai lau gwauhamata inai.’ Unai neganai idia edia tano korikori dekenai do idia noho.”

⁹Ieremia ia gwau, “Lauegu kudouna be egu lalona dekenai ia makohia. Lau heudeheude noho, lau be inua kekero tauna bamona, Lohiabada dainai, bona Lohiabada ena hereva helagadia dainai.

¹⁰Badina be inai tano ena taunimanima ese, Lohiabada idia rakatania vadaeni, bona headava taudia momo ese, heudahanai idia karaia noho. Taunimanima ese unai bamona kara dika idia karaia noho, bona edia goada idia gaukaralaia kerere. Unai dainai Lohiabada ese, iena sisiba hereva ia badinaia, bona ia ese unai tano ia hadikaia. Rei gabudia ibounai be ia ese ia hakaukaua vadaeni.”

¹¹Lohiabada ia hereva, ia gwau, “Peroveta taudia bona hahelagaia taudia ese, Dirava diba lasi taudia edia kara bamona idia karaia noho. Lauegu Dubu Helaga lalonai danu, edia kara dikadia lau itaia vadaeni.

¹²Unai dainai idia edia raka dalana be, moru gabuna bona dibura gabuna do lau halaoa. Vadaeni idia be do idia hekwakwanai, bona do idia moru. Lau ese edia dika davana ena nega lau gwauraia vadaeni, bona lau ese dika bada idia edia latanai do lau atoa.

¹³Lau ese Samaria tano ena peroveta taudia, edia kara dika lau itaia vadaeni. Idia ese Bala ena ladana dekenai idia hereva vadaeni, bona lauegu bese taudia idia hakaua kerere vadaeni.

¹⁴To Ierusalema ena peroveta taudia lau itaia danu, idia edia dika ese, Samaria peroveta taudia edia dika ia hanaia. Ierusalema peroveta taudia ese heudahanai idia karaia, bona hereva koikoi idia gwauraia danu. Idia ese kara dika taudia edia kara idia durua noho. Unai dainai taunimanima ibounai ese, edia kara dika idia hadokoa lasi. Lauegu vairana dekenai, idia ibounai edia dika, be Sodoma bona Gomora taudia edia dika hegeregerena.

¹⁵Unai dainai, lau, Siahu Ibounai Lohiabada ese, Ierusalema ena peroveta taudia lau herevalaia inai: ‘Lau ese mamina dika avadia do lau henidia, do idia ania, bona poisini do lau henidia, do idia inua, badina be Dirava negea kara, be idia ese idia habadaia inai tano ibounai dekenai.’ ”

¹⁶Siahu Ibounai Lohiabada ese Ierusalema taudia ia hamaoroa, ia gwau, “Peroveta taudia edia hereva do umui kamonai lasi. Idia be umui dekenai idia hereva koikoi noho, idia gwau umui emui noho be do ia namo. Idia ese sibodia edia laloa sibona idia gwauraia noho. Lau ese inai hereva lau henidia lasi.

¹⁷Idia ese, lau Lohiabada egu hereva idia negea momokani taudia dekenai idia hamaoroa noho, idia gwau, ‘Lohiabada ia gwau: Do umui noho namo herea.’ Bona hekokoroku taudia, sibodia edia laloa dekena amo idia raka noho taudia, dekenai inai peroveta taudia idia gwau: ‘Dika be umui emui latanai do ia kamokau diba lasi.’ ”

¹⁸Ieremia ia hereva, ia gwau, “Inai peroveta taudia edia huanai, daika ese Lohiabada ena hunia laloa ia diba? Idia daika ese Lohiabada ena hereva ia kamonai henia, o Lohiabada ena hereva ena anina ia diba?

¹⁹Kamonai! Lohiabada ena badu be tau dikadia edia latanai do ia diho mai, lai guba bada hegeregerena.

²⁰Lohiabada ena badu do ia ore lasi, ela bona iena laloa gaudia ibounai do ia karaia haorea. Gabeai nega lalonai, iena bese taudia be inai gaudia edia anina do idia diba.”

²¹Lohiabada ia hereva, ia gwau, “Lau ese inai peroveta koikoi taudia lau siaia lasi, to hereva gwauraia totona idia heau lao. Lau ese hereva ta idia dekenai lau henia lasi, to idia ese lauegu ladana dekenai hereva idia gwauraia.

²²Bema nega ta egu hunia laloa idia diba neganai, idia ese lauegu hereva egu bese dekenai idia gwauraia diba. Bona unai neganai, sedira egu bese taudia ese edia dala dikadia bona kara dikadia do idia rakatania. To madi, inai dala ia vara lasi.”

²³Lohiabada ma ia hereva, ia gwau, “Lau be gabu tamona sibona lau noho lasi, to gabu ibounai dekenai lau noho.

²⁴Tau ta ese lau dekena amo ia hunia diba lasi, nega ibounai lau itaia noho. Badina be lau Lohiabada be guba ena kahana ibounai bona tanobada ena kahana ibounai dekenai lau noho.

²⁵Unai peroveta taudia, hari lauegu ladana dekenai idia hereva koikoi noho, edia hereva lau kamonai vadaeni. Idia gwau, ‘Lau nihi vadaeni, bona nihi lalonai Lohiabada ese iena hereva lau dekenai ia henia.’

²⁶Inai peroveta koikoi taudia ese sibodia edia laloa koikoi dekena amo, egu bese taudia do idia koia ela bona edena negai?

²⁷Idia laloa edia nihi, taunimanima dekenai idia hamaoroa gaudia ese lauegu bese taudia edia laloa do idia hakererea. Vadaeni unai laloa kerere dainai, lauegu bese taudia ese lau do idia laloaboio, edia tamadia ese lau idia laloaboio hegeregerena, bona Bala dekenai idia giroa lao.

²⁸Lau Lohiabada lau hereva maoromaoro inai: Bema peroveta tauna ta ese ia nihi kava neganai, ia be do ia gwau inai be nihi sibona. To bema peroveta tauna ta ese lauegu hereva ia kamonai neganai, ia ese do ia gwauraia namonamo, mai maoromaoro danu. Lauegu hereva be uiti ena anina momokani bamona, to inai peroveta koikoi taudia edia hereva be uiti ena momoru bamona sibona.

²⁹Lauegu hereva be lahi bamona, ma danu, ia be nadi ia botaia maragimaragi ena hama badana bamona.”

³⁰Lohiabada ia gwau, “Inai pero-veta koikoi taudia lau badu henidia noho. Idia ese idia ta ta dekena amo hereva idia henaoa noho. Bona inai hereva idia gwauraia neganai, idia gwau idia be Lohiabada ena hereva.

³¹Peroveta taudia haida danu ese, edia hereva sibona idia gwauraia, bona idia gwau unai hereva be Lohiabada ena. Unai bamona peroveta taudia be lau ese lau badu henidia noho.

³²Lau, Lohiabada, egu hereva do umui kamonai! Nihi koikoi dekena amo peroveta hereva idia gwauraia taudia, be lau ese lau badu henidia noho. Idia ese unai nihi idia gwauraia noho, bona edia koikoi bona hereva kava dekena amo, egu bese taudia idia hakaua kerere noho. Lau ese idia lau siaia lasi, bona idia dekenai oda ta lau benia lasi. Unai dainai idia ese durua ta inai bese taudia dekenai idia henia lasi, lasi momokani. Lau inai Lohiabada lau hereva vadaeni.”

³³Lohiabada ese lau dekenai ia hereva, ia gwau, “Ieremia e, bema inai taudia ta, o peroveta tauna ta, o hahelagaia tauna ta ese oi dekenai idia nanadaia, ia gwau, ‘Lohiabada ena hereva metauna be dahaka?’ unai neganai do oi haere, oi gwau, ‘Umui be gau metauna Lohiabada ena vairana dekenai, bona Lohiabada ese umui do ia negea ore momokani.’

³⁴Bema egu bese tauna ta, o peroveta tauna ta, o hahelagaia tauna ta ese inai hereva, ‘Lohiabada ena hereva metauna,’ ia gwauraia neganai, lau ese ia bona iena famili taudia do lau panisia.

³⁵To umui be inai bamona do umui hereva namo, umui ta ta dekenai do umui gwau, ‘Lohiabada ena haere be dahaka?’, o ‘Lohiabada be dahaka ia gwau?’

³⁶“Unai dainai idia ese, ‘Lohia-bada ena hereva metauna’ do idia gwauraia lou lasi, badina bema tau ta be unai bamona ia hereva neganai, lau ese metau bada herea iena latanai do lau atoa. Badina be taunimanima ese edia Dirava, Mauri Diravana, Siahu Ibounai Lohiabada ena hereva idia hakererea noho.

³⁷Ieremia e, peroveta taudia do oi nanadaia, do oi gwau, ‘Lohiabada ena haere be dahaka?’ o ‘Lohiabada be dahaka ia gwau?’

³⁸Bona bema lauegu oda idia kamonai henia lasi, bema idia gwau, ‘Lohiabada ena hereva metau’, unai neganai idia do oi hamaoroa,

³⁹lau ese idia do lau abia isi, bona egu vairana dekena amo idia do lau negea daudau herea, idia bona inai hanua badana, idia bona edia sene taudia dekenai lau henia hanua.

⁴⁰Idia edia latanai, hemarai do lau atoa ela bona hanaihanai, ma inai hemarai be do idia laloaboio diba lasi momokani.”