Read Buka Helaga (Hiri Motu) 1993 IEREMIA 25 Bible Online

IEREMIA 25 - Buka Helaga (Hiri Motu) 1993 bible

IEREMIA 25

¹Iehoiakimi, Iuda ena king Iosaia ena natuna, ena lohia lagani namba 4 lalonai, lau Ieremia dekenai Lohiabada ena hereva ia ginidae, Iuda taudia ibounai totona. Inai lagani lalonai Nebukanesa, Babulonia ena king ese iena king dagi ia hamatamaia.

²Vadaeni lau ese Iuda taudia ibounai bona Ierusalema dekenai noho taudia ibounai lau hamaoroa, lau gwau,

³“Lagani 23 lalonai, Iosaia Amona, Iuda ena king, ena lohia lagani namba 13 ia mai bona hari, Lohiabada ese lau dekenai ia hereva vadaeni, bona lau ese unai hereva hegeregerena umui lau sisiba henia vadaeni, to umui be umui kamonai lasi.

⁴“Momokani Lohiabada ese iena peroveta taudia, iena hesiai taudia be umui dekenai ia siaidia lou, siaidia lou.

⁵Idia ese umui idia hamaoroa, emui lalodia do umui giroa, umui ta ta ibounai emui kara dika bona kerere do umui rakatania, unai neganai umui be inai tano dekenai do umui noho diba. Inai tano be Lohiabada ese umui bona emui sene taudia dekenai ia henia vadaeni, ia lalonai do umui noho hanaihanai totona.

⁶Dirava idaudia do umui tomadiho henia lasi, bona edia hesiai gaukara do umui karaia lasi. Bona umui karaia kaivakuku dekena amo Lohiabada do umui habadua lasi. Unai neganai Lohiabada ese umui do ia hadikaia lasi.

⁷“To Lohiabada ese ia hereva noho, ia gwau, ‘Umui ese lau dekenai umui kamonai lasi, bona emui kaivakuku, emui imadia ese idia karaia gaudia dekena amo lau umui habadua vadaeni. Unai dainai, umui dekenai dika ia vara gauna, be umui sibona ese umui mailaia vadaeni.’ ”

⁸Vadaeni Siahu Ibounai Lohiabada be inai bamona ia hereva, ia gwau, “Egu hereva umui kamonai henia lasi dainai,

⁹lau ese mirigini kahana bese taudia ibounai, bona egu hesiai tauna Nebukanesa, Babulonia ena king danu do lau boiria, inai tano, bona ena taudia, bona inai tano idia hagegea basileia ibounai hadikaia totona do lau mailaidia. Lau Lohiabada ese inai Iuda bese, bona iena badibadinai noho basileia ibounai do lau hadikaia ore momokani, hoa mai gari bada hanaihanai gabudia do lau halaodia.

¹⁰“Inai danu, kiri bona moale edia regena be unai gabudia dekena amo do lau hadokoa, bona headava matamata tauna bona hahine edia gadodia danu. Uiti idia moia maragimaragi nadi badadia edia regena do lau haorea, bona lamepa ibounai edia diari danu do lau habodoa unai gabudia dekenai.

¹¹Inai tano ena kahana ibounai be do idia hadikaia ore, hoa bona gari gabuna do ia lao, bona inai tano ena basileia ibounai taudia ese lagani 70 lalonai Babulonia ena king ena hesiai gaukara do idia karaia.

¹²“To unai lagani 70 idia ore murinai, lau Lohiabada ese Babulonia ena king bona iena bese do lau panisia edia kara dika dainai. Bona lau ese Babulonia ena tano do lau hadikaia ore, do ia dika, ia lao bona hanaihanai.

¹³Lau ese Babulonia ena latanai inai buka lalonai lau gwauraia guna dika davana ibounai do lau havaraia, Ieremia ese basileia ibounai edia latanai ia perovetalaia dikadia ibounai.

¹⁴Badina be basileia momo bona king badadia ese Babulonia taudia do idia guia, edia hesiai taudia mai guia danu do idia halaodia. Lau Lohiabada ese edia davana do lau henidia, edia kara dikadia bona edia kerere hegeregerena.”

¹⁵Lohiabada, Israela ena Dirava, ese lau dekenai ma ia hereva, ia gwau, “Inai uaina kapusi be egu badu dekenai ia honu noho. Egu imana dekena amo do oi abia, bona idia dekenai oi do lau siaia lao basileia ibounai dekenai do oi abia lao, do oi henidia, do idia inua totona.

¹⁶Do idia inua neganai do idia mumuta, bona do idia kavakava, badina lau ese idia edia huanai tuari do lau siaia.”

¹⁷Vadaeni lau ese Lohiabada ena imana dekena amo kapusi lau abia, bona ia ese idia dekenai lau ia siaia basileia ibounai dekenai unai kapusi lau henia, lau fosidia, do idia inua totona.

¹⁸Ierusalema bona Iuda hanuadia, bona edia king taudia bona lohia taudia ese inai uaina idia inua, vadaeni ia ese gabu dikana, anina lasi tano, hoa mai gari bada gabuna idia ia halaoa, taunimanima ese do idia kirikirilaia, bona hereva dika henia totona, hari inai dina dekenai idia karaia noho hegeregerena.

¹⁹Basileia ma haida edia taudia ese inai kapusi idia inua, edia ladadia be inai: Aigupito ena king, Farao, iena lohia taudia bona hesiai taudia, bona iena taunimanima ibounai.

²⁰Aigupito dekenai noho idau bese taudia danu. Usu tano ena king taudia ibounai, bona Pilistia taudia edia tano ena king taudia ibounai, Asakelona, Gasa, Ekarona, bona Asadoda do noho gabuna danu.

²¹Bona Edoma bona Moaba bona Amono bese taudia,

²²Bona Turo ena king ibounai, bona Sidono ena king ibounai, bona davara ena kone, bona motumotu edia king ibounai danu.

²³Bona Dedana, Tema, bona Busu hanuadia, edia huina idia utua kwadogi taudia ibounai.

²⁴Bona Arabia ena king ibounai, bona idia headava hanai besedia, tano kaukau dekenai idia noho, edia king ibounai danu.

²⁵Bona Simiri, Elama bona Media edia king ibounai.

²⁶Bona mirigini kahana tanodia edia king ibounai, gabu daudaudia bona gabu kahirakahiradia danu, bona tanobada basileia ibounai, tano ena kopina kahana ibounai edia latanai danu. Idia edia murinai, Babulonia ena king ese, inai kapusi do ia inua danu.

²⁷Unai neganai Lohiabada ese lau ia hamaoroa, ia gwau, “Taunimanima do oi hamaoroa, lau, Siahu Ibounai Lohiabada, Israela ena Dirava ese inai bamona lau oda henidia inai: ‘Inai kapusi do umui inua, do umui kekero, bona do umui mumuta, do umui moru diho, bona do umui toreisi lou lasi, tuari be umui dekenai do lau siaia dainai.’

²⁸“Bema idia ura lasi oiemu imana dekena amo kapusi do idia abia neganai, do oi hamaorodia, do oi gwau, Siahu Ibounai Lohiabada ese ia oda henia inai, ia gwau, ‘Vadaeni, do umui inua!

²⁹Kamonai! Lau ese egu ladana ia noho hanua lalonai dika bada lau havaraia hamatamaia noho, vadaeni umui laloa egu panisi dekena amo do umui heau diba, a? Lasi, davana abia dekena amo do umui heau mauri diba lasi, badina be lau ese tanobada ena kahana ibounai dekenai tuari do lau siaia lao. Lau inai, Siahu Ibounai Lohiabada lau hereva noho inai.’

³⁰“Ieremia e, oi ese egu hereva ibounai do oi gwauraia. Inai taudia dekenai do oi hereva inai bamona: “ ‘Lohiabada be ataiai dekena amo do ia boiboi, iena noho gabuna helagana dekena amo, iena gadona do ia habadaia. Iena bese taudia dekenai do ia boiboi. Do ia boiboi, vain huahua idia moia palaka noho taudia idia boiboi bamona. Tanobada noho taudia ibounai ese, iena boiboi do idia kamonai.

³¹Inai boiboi ena regena do ia daekau lao, ela bona tanobada ena dokona gabudia ibounai dekenai. Lohiabada ese taunimanima ibounai do ia kota henidia, bona ia ese kara dika taudia do ia alaia mase. Lohiabada ia hereva vadaeni inai.’ ”

³²Siahu Ibounai Lohiabada ma ia gwau, “Kamonai! Dika be basileia ta dekena amo, ela bona ma basileia ta dekenai ia lao noho. Lai guba badana momokani be ia toa hamatamaia noho, tanobada ena dokona gabudia daudaudia dekena amo.”

³³Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho. Tau ta ese idia dainai do ia taitai lasi, bona tau ta ese idia do ia haboua lasi, bona tau ta ese idia do ia guria lasi. Idia be tano ena kopina dekenai do idia noho, boromakau ena kukuri hegeregerena.

³⁴Mamoe naria taudia e, do umui tai, tai mai boiboi danu. Mamoe hakaua taudia e, tano kahu dekenai do umui hekure giroagiroa. Badina be umui do idia hamasea dinana, be ia ginidae vadaeni. Do umui moru diho, mamoe tau idia mase bamona.

³⁵Mamoe naria taudia be mai edia hunia gabuna ta lasi. Mamoe hakaua taudia be mai edia heau mauri gabuna ta lasi.

³⁶Do umui kamonai, mamoe naria taudia idia tai noho. Mamoe hakaua taudia idia tai noho, mai boiboi danu, badina be Lohiabada ese edia rei gabudia ia hadikaia ore noho.

³⁷Bona edia magu, edia maino abia gabudia, be Lohiabada ese ia hadikaia ore noho, iena badu mai siahu danu dainai.

³⁸Lohiabada ese iena bese taudia ia rakatania vadaeni, laiona ese iena nadi kohua ia rakatania bamona. Bona iena bese edia tano do ia dika lao, tuari taudia edia tuari dainai, bona Lohiabada ena badu siahu bada dainai.