Read Buka Helaga (Hiri Motu) 1993 IEREMIA 29 Bible Online

IEREMIA 29 - Buka Helaga (Hiri Motu) 1993 bible

IEREMIA 29

¹Ieremia ese revareva ta Ierusalema dekenai ia torea, ia siaia lao, Babulonia dekenai idia noho Ierusalema taudia, bona hahelagaia taudia, bona peroveta taudia dekenai. Inai taudia be guna Nebukanesa ese ia guia, bona Ierusalema dekena amo ia abidia lao, hesiai mai guia danu gaukara Babulonia dekenai do idia karaia.

²Inai revareva ia siaia dinana be king Iehoiakini mai ena sinana, bona mai ena hesiai taudia, bona Iuda bona Ierusalema lohia taudia, bona imana gaukara diba momo taudia, bona auri gaukaralaia diba taudia ese Ierusalema idia rakatania murinai.

³Inai revareva be Elasa Sapana bona Gemaraia Hilekaia, Iuda king Sedekaia ese Babulonia ena king Nebukanesa dekenai ia siaidia taudia, edia imana dekenai ia siaia lao. Inai revareva be inai bamona ia torea:

⁴Siahu Ibounai Lohiabada, Israela ena Dirava, ese Ierusalema dekena amo ia siaidia lao, bona Babulonia dekenai idia noho taudia dekenai inai bamona ia hamaoroa:

⁵“Ruma do umui haginia, bona idia lalonai do umui noho. Uma do umui karaia, bona edia anina do umui ania.

⁶Hahine do umui adavaia, bona emui natudia, tau bona hahine, do umui havaraia. Hahine haida do umui abia, emui natudia tau edia adavadia totona. Emui natudia hahine danu be edia tau dekenai do umui henia, do idia headava. Vadaeni idia ese natudia tau bona hahine ma do idia havaraia Babulonia dekenai, bona emui bese do ia bada lao noho, do ia maragi lao lasi.

⁷“Unai hanua, lau ese umui lau siaia lao, hesiai gaukara do umui karaia totona hanua, ena namo do umui tahua, bona Lohiabada dekenai do umui guriguri, unai hanua taudia dainai. Badina be bema idia ese namo idia davaria neganai, umui danu ese namo do umui davaria.

⁸Badina be lau, Lohiabada, Israela ena Dirava ese umui lau sisiba henia inai: Emui peroveta taudia bona emui meamea taudia, emui huanai idia noho taudia, idia gwau vaira neganai do idia vara gaudia idia diba, umui naria namonamo, idia ese umui do idia koia garina. Edia nihi edia sivarai do umui kamonai henia lasi.

⁹Idia ese egu ladana dekenai hereva koikoi umui dekenai idia gwauraia noho. Lau ese idia lau siaia lasi. Lau inai Lohiabada, lau hereva vadaeni.

¹⁰“Lau Lohiabada inai bamona ma lau hereva: Lagani 70 be Babulonia dekenai do idia ore, vadaeni lau ese umui do lau laloa lou, bona egu gwauhamata umui dekenai do lau hamomokania. Lau ese umui do lau hakaua mai lou inai gabu dekenai.

¹¹Lau Lohiabada ese egu palani umui totona lau diba. Lau ese umui do lau durua, vadaeni noho namo do umui davaria, dika ta lasi. Bona natuna momo do umui havaraia, emui bese hagoadaia totona.

¹²Bona bema umui ese lau dekenai do umui boiboi, ma lau dekenai do umui guriguri henia neganai, lau ese umui dekenai do lau kamonai henia.

¹³Umui ese lau do umui tahua, bona lau do umui davaria. Badina bema mai emui kudouna ibounai dekenai lau umui tahua neganai, umui ese lau do umui davaria.

¹⁴Momokani umui ese lau do umui davaria, bona lau ese umui dekenai emui tano do lau henia lou. Bona bese ibounai edia huanai dekena amo, bona umui lau lulua lao gabudia ibounai dekena amo, umui do lau haboua lou. Lau Lohiabada lau hereva inai: Inai gabu dekena amo umui lau siaia lao daudau, bona inai gabu dekenai ma umui do lau hakaua mai lou.

¹⁵“Umui gwau Lohiabada ese Babulonia dekenai umui dekenai peroveta taudia ia henia vadaeni.

¹⁶To Davida ena terona latanai ia helai noho king, bona Ierusalema dekenai noho taudia ibounai, emui varavara taudia Babulonia ena hesiai mai guia danu dekenai idia lao lasi taudia be Lohiabada ese ia herevalaia inai bamona:

¹⁷Siahu Ibounai Lohiabada ia gwau, ‘Kamonai, lau ese tuari, bona hitolo, bona hanaia gorere dikadia be edia latanai do lau siaia, bona fig huahua dikadia, dika bada dainai, ania diba lasi gaudia hegeregerena, idia do lau halaoa.

¹⁸Io, tuari, hitolo, bona hanaia gorere dikadia dekena amo do lau hisihisi henidia noho, bona tanobada gabu idauidau dekenai do lau luludia lao. Inai lau luludia gabudia ibounai dekenai noho taudia ese idia do idia ura henia lasi momokani, do idia hereva dika henidia, bona do idia gari henidia, mai badu danu.

¹⁹Badina be idia ese lau Lohiabada egu hereva idia kamonai henia lasi, bona egu hesiai taudia, peroveta taudia, edia ududia dekena amo lau siaia hereva, be umui Israela taudia umui kamonai henia lasi.

²⁰To hari, umui hesiai mai guia danu taudia, Ierusalema dekena amo Babulonia dekenai lau siaia taudia, be lau Lohia-bada, egu hereva do umui kamonai.’

²¹“Siahu Ibounai Lohiabada, Israela ena Dirava, ese Ahaba Kolaia bona Sedekaia Maseaia, iena ladana dekenai idia peroveta koikoi noho taudia, be inai bamona ia herevalaia noho: Kamonai, lau ese Nebukanesa, Babulonia ena king, ena siahu henunai unai tau dikadia ruaosi do lau atodia, bona ia ese umui emui vairana dekenai do ia aladia mase.

²²Bona unai bamona idia dekenai ia vara dainai, Iuda hesiai mai guia danu taudia, Babulonia dekenai noho taudia ese, tau ta idia hadikaia gwauraia neganai, inai bamona do idia hereva noho, do idia gwau, ‘Lohiabada ese Sedekaia bona Ahaba, Babulonia ena king ese lahi dekenai ia gabua ore taudia, hegeregerena oi do ia halaoa.’

²³Badina be inai taudia ese kara dikadia Israela dekenai idia karaia vadaeni, edia badibadinai taudia edia adavadia danu idia heudahanai, bona egu ladana dekenai hereva koikoi, lau ese lau hamaorodia lasi hereva, idia gwauraia hedinarai vadaeni. Lau Lohiabada ese edia kara lau itaia bona lau diba. Lau Lohiabada ese lau hereva vadaeni.”

²⁴Lohiabada ese lau Ieremia dekenai ia hereva, ia gwau: Semaia, Nehelama hanua tauna do oi hamaoroa, inai bamona:

²⁵“Siahu Ibounai Lohiabada, Israela ena Dirava ese inai bamona ia hereva, ia gwau: Semaia e, oi ese revareva Ierusalema noho taudia dekenai oi siaia lao, Sepanaia Maseaia, hahelagaia tauna, bona hahelagaia taudia ibounai dekenai. Oi ese Sepanaia oi hamaoroa, oi gwau,

²⁶‘Lohiabada ese oi ia abia hidi, hahelagaia tauna Iehoiada ena gabu dekenai, Lohiabada ena Dubu do oi biagua. Inai be oiemu dagi dainai, oi ese kava taudia ibounai, idia peroveta koikoi taudia, edia aedia bona aiodia be koua audia edia lalonai do oi koua, mai loka danu.

²⁷Be, dahaka dainai inai umui ia peroveta henia tauna Ieremia, Anatoto hanua tauna, oi gwau henia lasi?

²⁸Badina be hereva be ai dekenai ia siaia mai vadaeni Babulonia dekenai, ia gwau: Emui hesiai mai guia danu be do ia daudau. Ruma do umui haginia, bona idia lalonai do umui noho. Uma danu do umui karaia, bona edia anina do umui ania.’ ”

²⁹To hahelagaia tauna Sepanaia ese unai revareva be peroveta tauna Ieremia ena vairana dekenai ia duahia.

³⁰Vadaeni Lohiabada ena hereva be Ieremia dekenai ia mai, ia gwau,

³¹“Hereva be Babulonia dekenai noho Iuda taudia do oi siaia lao, do oi gwau, ‘Lohiabada ese Semaia, Nehelama tauna inai bamona ia herevalaia, ia gwau: Semaia ese umui dekenai ia peroveta vadaeni, to lau ese ia lau siaia lao lasi. Ia ese hereva koikoi umui dekenai ia gwauraia, do umui badinaia totona.

³²Unai dainai lau Lohiabada lau hereva inai: Kamonai, Semaia, Nehelama tauna, mai ena bese taudia danu be lau ese edia kerere davana do lau henia. Umui emui huanai, Semaia ena bese tauna ta do ia noho lasi, bona lau ese egu bese taudia do lau hanamoa karadia, be Semaia ese do ia itaia lasi. Badina be ia ese lau do umui kamonai henia lasi karadia ia hadibaia vadaeni. Lau inai Lohiabada, lau hereva vadaeni.’ ”