Read Buka Helaga (Hiri Motu) 1993 IEREMIA 32 Bible Online

IEREMIA 32 - Buka Helaga (Hiri Motu) 1993 bible

IEREMIA 32

¹Inai hereva be Lohiabada dekena amo Ieremia dekenai ia mai, Sedekaia, Iuda ena king, ena king lagani namba 10 lalonai. Unai be Nebukanesa, Babulonia ena king, ena king lagani namba 18 lalonai.

²Unai neganai Babulonia ena king ena tuari taudia ese Ierusalema idia tuari henia noho, bona lau Ieremia be Iuda ena king ena ruma ena gima taudia edia ariara magu lalonai lau dibura noho.

³Badina be Sedekaia, Iuda ena king ese ariara magu lalonai lau ia koua vadaeni, ia gwau, “Oi ese peroveta hereva oi gwauraia, oi gwau Lohiabada ia gwau: ‘Lau ese inai hanua Ierusalema be Babulonia ena king dekenai do lau henia, ia ese do ia abia,

⁴bona Sedekaia, Iuda ena king be do ia heau mauri lasi, to ia be Babulonia ena king ena siahu henunai do idia atoa. Sedekaia ese Nebukanesa do ia itaia, idia ta ta dekenai edia vairana do idia henia, bona do idia herevahereva.

⁵Sedekaia be Babulonia dekenai do idia abia lao, bona unuseni do ia noho, ela bona kara ta ia dekenai do lau karaia. Sedira ia ese Babulonia taudia do ia tuari henia toho, to do ia kwalimu lasi. Lau inai Lohiabada lau hereva vadaeni.’ ”

⁶Lohiabada ese lau, Ieremia, ia hamaoroa, ia gwau,

⁷“Oiemu tamana maragi Salumu ena natuna tau, Hanamele, be oi dekenai do ia mai, oi do ia nanadaia, iena tano Anatoto dekenai, Beniamina tano lalonai do oi hoia, o lasi. Badina oi be iena varavara korikori, bona sene dala dekenai oi be mai emu siahu do oi hoia.”

⁸Vadaeni egu tadikakana Hanamele be lau dekenai ia mai, gima taudia edia ariara magu dekenai, Lohiabada ena hereva hegeregerena. Lau dekenai ia hereva, ia gwau, “Egu tano Anatoto dekenai Beniamina tano lalonai, mani do oi hoia, badina be oi be mai emu siahu do oi abia.” Unai neganai lau diba unai be Lohiabada ena hereva.

⁹Vadaeni unai tano Anatoto dekenai be egu tadikakana Hanamele dekena amo lau hoia, siliva moni ibounai 17 davana dekenai.

¹⁰Egu ladana be tano biaguna pepa dekenai lau torea, bona hamomokania bona koua totona egu maka aukana lau atoa. Unai neganai danu, egu hoia kara uitnesi taudia ese danu unai pepa idia sainia, bona moni be metau abia sikele dekenai metau lau abia.

¹¹Vadaeni tano biaguna pepa, koua maka lau atoa gauna, bona unai pepa ena kopi ta, mai koua maka lasi gauna, unai pepa, ruaosi lau abia,

¹²bona tau ta ladana Baruku dekenai lau henia. Baruku be Neraia Maseaia ena natuna tau. Ia dekenai unai pepa lau henidia neganai, Hanamele bona pepa idia sainia uitnesi taudia ese idia itaia.

¹³Idia ibounai edia vairana dekenai, lau ese Baruku lau hamaoroa, lau gwau,

¹⁴“Siahu Ibounai Lohiabada, Israela ena Dirava ese oi ia oda henia, inai tano biaguna pepa ruaosi do oi abia, koua gauna, bona koua lasi gauna danu. Oi ese hodu ta lalonai do oi udadia, unuseni do idia noho daudau totona.

¹⁵Badina be Siahu Ibounai Lohiabada, Israela ena Dirava ese ia hereva vadaeni, ruma bona tano bona vain umadia, ma do idia hoia lou inai tano dekenai.”

¹⁶Unai tano biaguna pepa be Baruku Neraia dekenai lau henia murinai, lau ese Lohiabada dekenai lau guriguri, lau gwau,

¹⁷“Lohiabada Dirava e, oi ese guba bona tanobada be oiemu siahu badana bona oiemu goada herea dekena amo oi karaia. Gau ta ia auka lasi oi dekenai.

¹⁸Oi ese taunimanima momo oi lalokau henidia noho, to tamana taudia edia kerere davana be edia natudia dekenai oi henidia noho. Dirava badana, oi be mai emu goada momokani. Oi be Siahu Ibounai Lohiabada.

¹⁹Oi ese mai aonega danu, palani oi karaia noho, bona kara badadia oi karaia noho danu. Oi ese taunimanima edia kara ibounai oi itaia noho, bona idia ta ta edia kara, edia kara hegeregerena edia davana oi henia noho.

²⁰Oi ese toa bona hoa karadia Aigupito tano dekenai oi hedinaraia vadaeni, bona Israela lalonai, bona taunimanima ibounai edia huanai danu. Bona oi ese inai kara oi karadia noho, ia mai bona hari dina danu. Unai dainai hari oiemu ladana badana be gabu ibounai dekenai idia diba.

²¹Oi ese oiemu bese Israela be Aigupito tano dekena amo oi hakaua mai, mai toa bona hoa karadia, bona mai siahu bona goada karadia, gari bada karadia danu.

²²Oi ese inai tano danu oi henidia vadaeni, edia sene taudia oi gwauhamata henidia do oi henidia tano, rata bona hani dekenai ia honu tanona.

²³Vadaeni edia tano dekenai idia raka vareai, idia abia. To idia ese oiemu hereva idia kamonai lasi, bona oiemu taravatu dekenai idia raka lasi. Oi ese oi oda henidia do idia karaia karadia ta idia karaia lasi. Unai dainai, inai dika bada ibounai be idia edia latanai oi atoa vadaeni.

²⁴“Babulonia taudia ese hanua magudia ibounai dekenai tano badana idia haboua vadaeni, hanua do idia tuari henia bona abia totona. Tuari, bona hitolo, bona hanaia gorere dainai, inai hanua be Babulonia taudia edia siahu henunai do ia moru. Oi ese oi gwauraia guna herevadia edia anina idia vara vadaeni, bona oi itaia noho.

²⁵To oi, Lohiabada Dirava e, oi ese lau oi hamaoroa vadaeni, oi gwau, ‘Momokani lau ese inai hanua be Babulonia taudia dekenai do lau henia, to oi ese tano be moni dekena amo do oi hoia, bona inai kara idia uitnesi taudia danu do oi abia.’ ”

²⁶Unai neganai Lohiabada ese lau ia hereva henia, ia gwau,

²⁷“Kamonai, lau be Lohiabada, taunimanima ibounai edia Dirava. Kara ta be auka herea, to lau karaia diba lasi, a?

²⁸Vadaeni, lau Lohiabada inai bamona lau hereva: Lau ese inai hanua be Babulonia taudia dekenai, bona Nebukanesa, Babulonia ena king edia siahu henunai do lau atoa. Idia ese do idia abia.

²⁹Babulonia taudia, hari Ierusalema idia tuari henia noho taudia be do idia mai, lahi dekenai inai hanua do idia gabua. Do idia gabua momokani, bona unai ruma, edia guhi dekenai muramura mai bonana be Bala dirava totona idia gabua, bona inua bouboudia be dirava idaudia totona idia bubua, idia henia, bona unai kara dekena amo lau idia habadua rumadia danu do idia gabua ore.

³⁰Badina be Israela bona Iuda bese taudia ese kara dikadia sibona idia karaia vadaeni, egu vairana dekenai, idia be mero negana dekena amo, ia mai bona hari. Momokani, Israela taudia ese edia imadia idia karaia gaudia ibounai dekena amo lau idia habadua vadaeni. Lau Lohiabada lau hereva noho inai.

³¹“Inai hanua Ierusalema idia haginia dinana dekena amo ia mai bona hari dina, ena noho taudia ese egu badu bona egu laloa siahu idia havaraia vadaeni. Unai dainai lau ese egu vairana dekena amo inai hanua do lau kokia ore,

³²Israela bona Iuda bese taudia edia kara dika ibounai dainai. Idia ese lau idia habadua karadia idia karaia, edia king bona edia lohia taudia, edia hahelagaia taudia, bona edia peroveta taudia, Iuda bona Ierusalema dekenai noho taudia ese.

³³Idia ese edia doruna be lau dekenai idia henia, edia vairadia be lau dekenai idia henia lasi. Lau ese idia lau hadibaia lou, hadibaia lou, to idia ese hadibaia hereva idia kamonai lasi, bona diba idia davaria lasi.

³⁴Idia ese edia kaivakuku, dika rohoroho gaudia, egu ladana ia noho Dubu ena lalona dekenai idia atoa, bona inai egu Dubu idia hamiroa vadaeni.

³⁵Bala ena ataiai idia noho tomadiho gabudia idia haginia Hinoma ena Koura lalonai, unuseni edia natudia tau bona hahine be boubou gaudia do idia halaoa totona, Moleka dirava ena. To lau ese inai bamona kara do idia karaia totona lau oda henidia lasi, bona lau laloa lasi unai bamona kara dika rohoroho do idia karaia. Badina unai kara dekena amo idia ese Iuda taudia idia hakererea momokani.”

³⁶Lohiabada, Israela ena Dirava be lau dekenai ia hereva, ia gwau, “Ieremia e, hanua taudia ese inai hanua idia herevalaia noho, idia gwau, ‘Tuari, hitolo, bona hanaia gorere dikadia dekena amo Ierusalema be Babulonia ena king ena siahu henunai do ia moru.’ To harihari lau Lohiabada, Israela ena Dirava, be inai bamona lau hereva:

³⁷Lau ese mai badu bona laloa siahu danu egu bese taudia lau luludia vadaeni tano idauidau momo dekenai, to lau ese do lau haboudia lou inai gabu dekenai, bona iniseni be noho namo do lau henidia lou.

³⁸Idia be lauegu bese do idia lao, bona lau be edia Dirava do lau lao.

³⁹Lalona tamona, bona dala tamona idia dekenai do lau henia, bona lau dekenai do idia gari nega ibounai, idia bona edia murinai do idia vara natudia danu ese namo do idia davaria totona.

⁴⁰“Lau ese egu gwauhamata tara-vatuna idia dekenai do lau henia, noho hanaihanai gauna. Lau ese idia hanamoa totona karadia do lau karaia noho, doko lasi, bona ura namodia idia dekenai do lau henia, vadaeni idia ese lau dekenai do idia gari nega ibounai. Unai dainai, idia ese lau dekena amo do idia raka siri lasi.

⁴¹Lau ese idia hanamoa karadia do lau karaia noho, mai egu moale bada danu, bona mai laloa maoromaoro bona momokani danu, egu bese taudia be inai tano dekenai do lau haginidia namonamo.

⁴²“Lau Lohiabada lau hereva inai: Inai dika bada ibounai be inai bese taudia edia latanai lau atoa vadaeni hegeregerena, lau ese danu lau gwauhamata henidia noho kara namodia ibounai, be ma edia latanai do lau atoa.

⁴³Inai tano, umui ese umui herevalaia noho, umui gwau, ‘Ia be anina lasi tanona, taunimanima ta, o ubua gauna ta ia noho lasi, badina Babulonia taudia ese idia abia vadaeni.’ To lau gwau, inai tano lalonai, uma gabudia ma do umui hoia mai lou.

⁴⁴Taunimanima ese uma gabudia be moni dekena amo do idia hoia, bona tano biaguna pepadia dekenai emui ladadia do umui sainia, bona koua totona, emui maka aukana do umui atoa, bona emui hoia kara hamomokania totona uitnesi taudia do umui abia, Beniamina tano lalonai, bona Ierusalema ena hanua maragidia ibounai, bona Iuda tano ena hanua ibounai, bona ororo kahana ena hanua, bona tano palaka hanua, bona diho kahana hanua ibounai dekenai danu. Badina be inai gabudia noho taudia edia noho do lau hanamoa lou. Lau inai Lohiabada, lau hereva vadaeni.”