Read Buka Helaga (Hiri Motu) 1993 IEREMIA 37 Bible Online

IEREMIA 37 - Buka Helaga (Hiri Motu) 1993 bible

IEREMIA 37

¹Nebukanesa, Babulonia ena king ese Sedekaia Iosaia ia abia hidi, Iuda tano dekenai do ia king, Iehoiakimi ena natuna Iehoiakini, ena gabu dekenai.

²To Sedekaia bona iena opesa taudia, bona iena taunimanima ese Lohiabada ena hereva, peroveta tauna Ieremia ese ia gwauraia gauna, idia kamonai henia lasi.

³King Sedekaia ese Iehukala Selemaia bona hahelagaia tauna Sepanaia Maseaia ia siaia, lau Ieremia idia nanadaia, idia gwau, “King Sedekaia ia ura oi ese Lohiabada, iseda Dirava do oi noia, iseda tano dainai.”

⁴Unai neganai lau be do taunimanima edia huanai lau raka loaloa noho, dibura ruma lalonai lau idia do koua lasi.

⁵Bona unai neganai danu, Babulonia ena tuari taudia ese Ierusalema idia koua hagegea noho, to hereva idia kamonai, Aigupito tuari taudia ese Aigupito idia rakatania neganai, Babulonia taudia ese Ierusalema idia rakatania.

⁶Vadaeni Lohiabada, Israela ena Dirava, be lau dekenai ia hereva, ia gwau,

⁷“Sedekaia be inai bamona do oi hamaoroa, oi gwau: ‘Aigupito tuari taudia be oi durua totona idia mai noho, to idia ese Aigupito dekenai do idia giroa lou.

⁸Unai neganai Babulonia taudia do idia giroa mai, Ierusalema do idia tuari henia, do idia halusia, bona do idia gabua.

⁹Lau, Lohiabada, oi dekenai lau sisiba henia inai, do umui laloa lasi Babulonia taudia do idia giroa lasi, badina idia be do idia giroa mai momokani.

¹⁰Bema umui ese Babulonia taudia tuari dekenai umui halusia, bona edia palai ruma lalonai bero taudia sibona idia noho, unai neganai unai bero taudia do idia toreisi, inai hanua do idia gabua ore.’ ”

¹¹Aigupito tuari taudia idia mai noho neganai, Babulonia taudia ese Ierusalema idia rakatania.

¹²Unai neganai, lau Ieremia be Ierusalema lau rakatania gwauraia, Beniamina tano dekenai do lau lao, unuseni lauegu tano, egu famili ena ahuna dekena amo, lau abia gwauraia.

¹³To lau be Ierusalema magu ena iduara ladana Beniamina dekenai lau ginidae neganai, tuari taudia edia biaguna, ena ladana Iraia, Selemaia Hananaia ena natuna ese lau ia koua, ia gwau, “Oi be Babulonia taudia dekenai do oi hanaia, a?”

¹⁴Lau haere henia, lau gwau, “Lasi momokani. Lau be Babulonia taudia dekenai do lau hanaia lasi.” To Iraia be lauegu hereva ia kamonai lasi. Ia ese lau ia dogoatao, bona hanua ena tau badadia dekenai lau ia abia lao.

¹⁵Idia be lau dekenai idia dagedage, idia ese lau idia dadabaia, bona toretore tauna, Ionatana ena ruma dekenai lau idia koua. Inai ruma be dibura ruma idia ese idia halaoa vadaeni.

¹⁶Unai ruma be mai ena daiutu ta, tano henunai ia noho. Unai gabu dekenai nega daudau lau idia koua.

¹⁷Unai murinai king Sedekaia ese lau ia boiria, bona hunia dekenai iena ruma dekenai lau ia nanadaia, ia gwau, “Hereva ta be Lohiabada dekena amo ia mai vadaeni, a?” Lau haere ia dekenai, lau gwau, “Oibe, oi be Babulonia ena king ena imana dekenai oi do idia atoa.”

¹⁸Unai neganai lau ese Sedekaia lau nanadaia, lau gwau, “Lauegu kerere be dahaka, vadaeni oi ese dibura ruma lau oi atoa vadaeni? Dahaka kerere oi, o oiemu opesa taudia, o inai bese taudia dekenai lau karaia?

¹⁹Oiemu peroveta taudia idia gwau, ‘Babulonia ena king ese oi bona inai tano do ia tuari henia lasi.’ To harihari inai peroveta taudia be edeseni idia noho?

²⁰To harihari king e, lauegu lohia, mani emu kara egu noinoi do oi kamonai, lau do oi durua. Lau do oi siaia lou lasi Ionatana ena ruma dekenai. Bema inai bamona oi karaia neganai, lau be do lau mase momokani.”

²¹Unai dainai king Sedekaia ese oda ia gwauraia, vadaeni idia ese tuari taudia edia ruma, king ena ariara magu lalonai rumana dekenai lau idia koua. Unuseni lau noho, bona dina ibounai beredi tamona lau dekenai idia henia, ela bona hanua ena beredi ibounai ia ore.