Read Buka Helaga (Hiri Motu) 1993 IEREMIA 42 Bible Online

IEREMIA 42 - Buka Helaga (Hiri Motu) 1993 bible

IEREMIA 42

¹Iuda tuari biagudia ibounai, bona Iohanana Karea bona Asaria Hosaia, bona taunimanima ibounai, dagi lasi taudia, bona dagi bada taudia be lau Ieremia dekenai idia mai,

²idia gwau, “Mani emu kara aiemai noinoi do oi karaia! Lohiabada oiemu Dirava do oi guriguri henia, ai totona. Ai do mauri noho taudia totona Lohiabada do oi noia. Badina guna ai be orea badana, to oi itaia, hari ai be tamona, tamona sibona.

³Lohiabada oiemu Dirava do oi noia, ia ese do ai raka dalana, bona do ai karaia karana ai dekenai do ia hadibaia.”

⁴Lau ese idia lau haere henia, lau gwau, “Emui hereva lau kamonai vadaeni, lau ese Lohiabada emui Dirava do lau guriguri henia, emui noinoi hegeregerena, bona edena bamona Lohiabada do ia haere, be lau ese umui do lau hamaoroa. Gau ta umui dekena amo do lau hunia lasi.”

⁵Vadaeni idia ese lau idia hamaoroa, idia gwau, “Bema Lohiabada, oiemu Dirava, ese oi dekenai oda ta ai totona do ia henia, bona bema ai ese iena oda ibounai ai kamonai henia lasi neganai, Lohiabada ese ai do ia samania, mai maoromaoro bona mai momokani danu be namo.

⁶Bema iena oda hereva ai ura, o ai ura lasi, to ai ese Lohiabada, iseda Dirava do ai kamonai henia. Ai ese oi ai noia, oi ese ai totona do oi guriguri, badina aiemai noho dohore ia namo, bema ai ese Lohiabada ai kamonai henia neganai.”

⁷Dina 10 idia ore neganai, Lohiabada ese lau dekenai ia hereva.

⁸Vadaeni lau ese Iohanana Karea bona Iuda tuari biagudia ibounai, bona idia danu noho taudia, mai dagi bona mai dagi lasi taudia, lau boiridia hebou, lau hereva henidia,

⁹lau gwau, “Umui ese Lohiabada, Israela ena Dirava, dekenai lau umui siaia, umui dainai lau ese do lau noia totona. Bona Dirava ese inai bamona ia hereva vadaeni:

¹⁰Bema inai tano dekenai umui noho, lau ese umui do lau haginia, umui do lau veria diho lasi. Lau ese umui do lau hadoa, umui do lau kokia lasi, badina be lau ese umui lau hadikaia vadaeni dainai, lauegu lalona ia hisihisi noho.

¹¹Babulonia ena king, umui gari henia noho tauna, be ia dekenai do umui gari lou lasi. Lau Lohiabada lau gwau: Unai king do umui gari henia lasi, badina lau be umui dekenai lau noho, bona Nebukanesa ena siahu dekena amo lau ese umui do lau hamauria.

¹²Badina lau ese umui do lau bogahisihisi henia, unai dainai Nebukanesa ese danu umui do ia bogahisihisi henia, bona emui tano korikori be umui dekenai do ia henia lou. Lau Lohiabada inai, lau hereva vadaeni.

¹³“To bema umui gwau, ‘Ai ese inai tano dekenai do ai noho lasi,’ bona unai dekena amo lau Lohiabada, emui Dirava, umui kamonai henia lasi,

¹⁴bona bema umui gwau, ‘Lasi, ai be Aigupito dekenai do ai lao, unuseni tuari do ai itaia lasi, bona tuari kibi ena regena do ai kamonai lasi, bona do ai hitolo lasi, vadaeni unuseni do ai noho.’

¹⁵Bema inai bamona umui hereva neganai, umui Iuda do mauri noho taudia e, lau, Siahu Ibounai Lohiabada, Israela ena Dirava, egu hereva do umui kamonai, lau gwau: ‘Bema umui emui lalodia umui ha-aukaia, Aigupito dekenai do umui lao, bona unuseni do umui noho neganai,

¹⁶umui gari henia noho tuari be unuseni, Aigupito tano dekenai, bona unai tuari be umui dekenai do ia vara, bona umui gari henia noho hitolo ese umui do ia lulua lao, bona Aigupito dekenai do umui mase.

¹⁷Edia lalodia idia ha-aukaia, Aigupito do idia lao, bona do idia noho taudia ibounai be tuari, o hitolo, o hanaia gorere dikana dekena amo do idia mase. Idia ta ese do ia heau mauri lasi. Momokani, lau ese idia edia latanai do lau atoa dika dekena amo idia ta be do ia mauri diba lasi.’ ”

¹⁸Lau Lohiabada, Israela ena Dirava, be inai bamona lau hereva, lau gwau, “Egu badu bona egu laloa siahu be Ierusalema dekenai noho taudia edia latanai lau bubua diho hegeregerena, egu badu siahu bada be umui emui latanai danu do lau bubua diho. Bema Aigupito dekenai umui lao neganai, umui emui toadia be dika dainai, taunimanima ese umui do idia itaia, mai gari bona mai badu danu, idia ese umui do idia ura lasi momokani, bona emui ladana be edia hereva dika gauna ta do idia halaoa. Umui ese inai gabu be do umui itaia lou lasi.”

¹⁹Lau Ieremia be ma lau hereva, lau gwau, “Lohiabada ese umui Iuda dekenai do noho taudia ia hamaoroa vadaeni, Aigupito dekenai do umui lao lasi. Unai dainai umui lau sisiba henia goada inai:

²⁰Lohiabada dekena amo umui raka siri ena davana be emui mauri. Badina be umui ese lau oi siaia, Lohiabada, emui Dirava dekenai, umui gwau, ‘Lohiabada iseda Dirava, dekenai do oi guriguri ai dainai, bona Lohiabada iseda Dirava edena bamona do ia gwau, be ai dekenai do oi hamaoroa, vadaeni ai ese do ai karaia.’

²¹Vadaeni hari dina Lohiabada ena hereva umui dekenai lau hamaoroa vadaeni, to umui ese lau dekena amo Lohiabada iseda Dirava ia siaia hereva ibounai umui kamonai henia noho lasi.

²²Unai dainai, do umui diba momokani, umui ura lao bona noho gabuna dekenai be tuari, hitolo, o hanaia gorere dekena amo do umui mase.”