Read Buka Helaga (Hiri Motu) 1993 IEREMIA 43 Bible Online

IEREMIA 43 - Buka Helaga (Hiri Motu) 1993 bible

IEREMIA 43

¹Lohiabada, edia Dirava ese lau dekenai ia henia hadibaia hereva ibounai be taunimanima dekenai lau hamaoroa vadaeni.

²Unai neganai Asaria Hosaia bona Iohanana Karea bona mai edia hekokoroku taudia ese Ieremia idia hamaoroa, idia gwau, “Oi be oi koikoi noho. Lohiabada, iseda Dirava ese oi ia siaia lasi, bona ia gwau lasi, ‘Aigupito dekenai do umui lao lasi, unuseni do umui noho lasi.’

³To Baruku Neraia ese oiemu lalona ia hadikaia ai dekenai, oi ese Babulonia taudia edia imadia dekenai ai do oi atoa totona, vadaeni idia ese ai do idia alaia mase, o Babulonia dekenai ai do idia abia lao, unuseni mai guia danu do ai noho.”

⁴Unai dainai Iohanana Karea, bona Iuda tuari biagudia ibounai, bona taunimanima ibounai ese Lohiabada ena hereva, Iuda tano dekenai do idia noho hereva, be idia kamonai henia lasi.

⁵To Iohanana Karea bona Iuda tuari biagudia ibounai ese inai Iuda taudia, do noho taudia ibounai, bese idauidau ibounai edia huanai guna idia luludia lao, bona idia giroa mai, Iuda tano dekenai ma idia noho taudia, be Aigupito dekenai idia hakaudia lao:

⁶Tatau, hahine, memero, kekeni, king ena natuna hahine, bona Nebusaradana, gima taudia edia biaguna, ese Gedalaia Ahikama ena naria henunai ia rakatanidia taudia ibounai, lau, peroveta tauna Ieremia, bona Baruku Neraia danu.

⁷Vadaeni Aigupito tano dekenai ai ginidae, badina be unai Iuda taudia ese Lohiabada ena hereva idia kamonai henia lasi. Tapanese hanua dekenai idia ginidae.

⁸Vadaeni Tapanese dekenai Lohiabada ese lau Ieremia ia hamaoroa, ia gwau,

⁹“Nadi badadia haida oiemu imana dekenai do oi abia, bona Iuda taudia edia vairadia dekenai raro lalonai do oi hunidia, Farao ena ruma raka vareai ariara gabuna dekenai, Tapanese dekenai.

¹⁰Bona Iuda taudia do oi hamaoroa, do oi gwau: ‘Siahu Ibounai Lohiabada, Israela ena Dirava, be inai bamona ia gwau noho: Kamonai, lau ese hereva do lau siaia, egu hesiai tauna, Nebukanesa, Babulonia ena king do lau abia, bona inai lau hunidia nadi edia latanai ia ese iena terona do ia atoa, bona ia ese king ena palai ruma be idia edia ataiai do ia haginia.

¹¹“ ‘Nebukanesa be do ia mai, Aigupito do ia tuari henia, bona do ia halusia. Unai neganai taunimanima haida be lau maka vadaeni, gorere dekenai do idia mase, be mase do idia davaria. Haida be lau maka vadaeni, tano ta dekenai mai guia danu do idia lao, be idia ese mai guia danu tano ta dekenai do idia lao. Ma haida lau maka vadaeni, tuari dekenai do idia mase, be tuari dekenai do idia mase.

¹²Nebukanesa ese Aigupito ena dirava edia dubudia be lahi dekenai do ia gabua, bona ia ese unai dirava haida do ia gabua ore, bona haida do ia abia mauri, do ia abidia lao. Nebukanesa ese Aigupito tano do ia hagoevaia, mamoe naria tauna ese iena dabua ia hagoevaia bamona, utu ia ura hamasea bona kokia neganai. Unai murinai, mai kwalimu bona maino danu Aigupito do ia rakatania.

¹³Aigupito ena hanua badana ta, Heliopolisi, dekenai idia noho nadi du helagadia be do ia hamakohia, bona Aigupito ena dirava edia dubu badadia do ia gabua ore.’ ”