Read Buka Helaga (Hiri Motu) 1993 LALOHISIHISI 3 Bible Online

LALOHISIHISI 3 - Buka Helaga (Hiri Motu) 1993 bible

LALOHISIHISI 3

¹Lohiabada ese iena badu dainai, taunimanima edia dika davana ia henia, ena mamina be lau diba.

²Ia ese dibura lalonai lau ia lulua vareai, diari lasi gabuna lalonai.

³Momokani, ia ese iena imana ia abia isi, lau hadikaia totona, bona lau ia botaia lou, botaia lou, dina ena hora ibounai.

⁴Egu hidiona bona egu kopina ia haorea vadaeni, bona egu turiana haida ia hamakohia vadaeni.

⁵Ia ese lau ia hagegea, bona lau ia koua vadaeni. Lalohisihisi bona laloa metau momokani ese lau idia abia.

⁶Dirava ese dibura gabuna lalonai, lau ia doria vareai. Lau be idaunegai lau mase tauna bamona.

⁷Ia ese auri seini dekena amo, lau ia guia vadaeni. Lau be magu lalonai, bona lau heau mauri diba lasi.

⁸Lau boiboi noho, lau tai mai boiboi danu, to Lohiabada ese egu noinoi ia kamonai lasi.

⁹Ia ese egu dala ia koua vadaeni, ia utua nadi magudia dekena amo, bona egu raka daladia ia hagagevaia vadaeni.

¹⁰Hunia dekenai lau totona ia naria, bea ena kara bamona, bona laiona bamona, lau ia dogoatao totona ia roho mai.

¹¹Ia ese dala dekena amo lau ia veria lao, vadaeni lau ia darea momokani, bona lau ia rakatania.

¹²Ia ese iena peva ia veria, bona iena diba dekena amo lau ia pidia gwauraia.

¹³Iena diba dekena amo egu kudouna ia gwadaia.

¹⁴Taunimanima ese lau idia kirikirilaia noho. Edia ane dekena amo, lau dekenai idia hevaseha dina ena hora ibounai.

¹⁵Lohiabada ese hisihisi momo lau dekenai ia henia, vadaeni lau hesiku momokani. Inai be, ia ese mamina dika avadia dekena amo, egu bogana ia hahonua bamona.

¹⁶Ia ese nadi maragidia dekena amo, egu isena ia hamakohia, bona tano ena kahu dekenai, lau ia moia diho.

¹⁷Lohiabada ese maino bona noho namo, be lau dekena amo ia kokia vadaeni. Moale ena mamina be lau laloaboio.

¹⁸Unai dainai lau gwau, “Egu hairaina be ia ore vadaeni, bona Lohiabada dekena amo gau namodia lau laloa noho kara, be ia boio vadaeni.”

¹⁹Egu hisihisi, bona mai egu ruma lasi ena nega, be lau laloa noho. Unai be mamina dika poisini bamona lau dekenai.

²⁰Unai lau laloa noho, laloa noho, bona egu laumana be ia laloa metau noho.

²¹To egu lalona ia hanamoa noho gauna tamona be inai:

²²Lohiabada ena noho hanaihanai lalokauna, be do ia ore lasi. Iena bogahisihisi karadia be do idia doko lasi,

²³daba ibounai idia be matamata. Lohiabada e, oiemu hereva oi badinaia kara be bada momokani.

²⁴Lau gwau, “Egu durua tauna be tamona, Lohiabada sibona, unai dainai ia dekenai egu abidadama lau atoa noho.”

²⁵Lohiabada idia abidadama henia taudia, be Lohiabada ese ia hanamodia noho.

²⁶Unai dainai Lohiabada ese ita do ia hamauria totona, do ita naria noho be namo, do ita naria mai abidadama danu be namo.

²⁷Tau ta ese ia eregabe neganai, maduna metau do ia huaia, unai be namo.

²⁸Ia ese sibona do ia helai, regerege lasi, be namo, badina Lohiabada ese unai maduna, be unai mero ena latanai ia atoa vadaeni.

²⁹Ia be Lohiabada ena siahu henunai do ia manau, bona ia ese iena vairana, be tano dekenai do ia atoa, badina gabeai ia ese, namo do ia davaria momokani.

³⁰Iena vairana danu, be do idia botaia taudia dekenai do ia henia be namo, bona edia hereva dika, do ia abia dae danu be namo,

³¹badina be Lohiabada ese iena hesiai taudia do ia negea lasi, ela bona bona hanaihanai.

³²Momokani Lohiabada ese ita dekenai lalohisihisi ia henia noho, to ia ese ita do ia bogahisihisi henia, badina iena lalokau ita dekenai be momokani, bona mai goada danu.

³³Lohiabada ese, ia ura lasi ita dekenai lalohisihisi o hisihisi do ia havaraia.

³⁴Bema dibura ruma lalonai ita noho neganai, tau haida ese ita idia dagedage henia, bona idia ese ita idia hadikaia neganai, Lohiabada be ia diba.

³⁵Bema Lohiabada ese, ita dekenai gwaumaoro ia henia, kara ta do ita karaia, to tau haida ese unai kara idia koua neganai, Lohiabada be ia diba.

³⁶Bema hereva koikoi dekena amo, kota maoromaoro idia hagagevaia neganai, Lohiabada be ia diba.

³⁷Badina be nega ibounai, Lohiabada ena ura sibona ia vara noho. Bema Lohiabada ese kara ta ia ura lasi neganai, daika ese unai kara ia karaia diba?

³⁸Lohiabada ena oda dekena amo, namo bona dika be idia vara noho, ani?

³⁹Ita mauri noho taunimanima be, Lohiabada ese iseda dika davana ia henia neganai, dahaka dainai do ita hereva badubadu noho?

⁴⁰Namona be iseda dala do ita tohoa, bona iseda kara do ita tahua, bona Lohiabada dekenai do ita giroa lou.

⁴¹Namona be iseda kudoudia do ita kehoa, bona iseda imadia do ita abia isi guba dekenai ia noho Dirava dekenai, bona do ita gwau,

⁴²“Ai be ai kerere vadaeni, bona oiemu taravatu ai utua vadaeni, bona oi ese aiemai dika oi gwauatao lasi.

⁴³Oi ese ai oi lulua lao, bona ai oi alaia mase. Oiemu badu ese oiemu bogahisihisi ia hunia.

⁴⁴Oi ese ori ta dekena amo oi sibona oi koua, unai dainai aiemai guriguri, be oi dekenai idia ginidae lasi.

⁴⁵Oi ese miro bona momoru ai oi halaoa vadaeni, bese idauidau edia huanai.

⁴⁶Ai idia hadikaia gwauraia taudia ibounai ese, ai idia hereva dika henia, bona ai idia kirikirilaia noho.

⁴⁷Gari bada bona hekwakwanai be ai dekenai idia vara, vadaeni idia ese emai tano bona emai taunimanima danu, be idia hadikaia ore vadaeni.”

⁴⁸Egu matana edia ranu ia diho noho, sinavai bamona, egu bese taudia idia hadikaia ore dainai.

⁴⁹Egu matana ena ranu do ia diho noho, doko lasi,

⁵⁰ia lao bona Lohiabada ese, guba dekena amo ai do ia itaia.

⁵¹Egu lalona ia hisihisi bada noho, badina lau itaia, egu hanua dekenai noho kekeni badadia, be madi dika idia davaria momokani vadaeni.

⁵²Nega ta lau hadikaia lasi taudia ese lau idia lulua lao, labana tauna ese manu ta ia tahua noho bamona.

⁵³Idia ese guri badana lalonai lau idia negea diho, bona nadi momo be egu latanai idia negea.

⁵⁴Ranu lalonai lau diho noho, lau gwau, “Lau be lau mase noho inai.”

⁵⁵Lohiabada e, guri dobuna dekena amo, oi dekenai lau boiboi,

⁵⁶bona oi dekenai lau noinoi neganai, egu taitai oi kamonai henia.

⁵⁷Oi ese lau dekenai oi haere, bona oi gwau, “Oi gari lasi.”

⁵⁸Lohiabada e, oi ese lau oi durua, bona oi ese lau oi hamauria vadaeni.

⁵⁹Lohiabada e, oi ese oi itaia vadaeni, unai taudia ese lau dekenai idia kara dika. Kota maoromaoro mani lau dekenai do oi henia.

⁶⁰Unai taudia ese lau idia badu henia noho, bona egu mase dalana idia tahua noho, be oi diba noho.

⁶¹Lohiabada e, edia hereva dika, be oi ese oi kamonai vadaeni, bona lau idia ura hadikaia, inai bamona idia laloa noho gaudia ibounai be oi diba noho.

⁶²Dina ena nega ibounai lalonai, lau idia alaia gwauraia taudia ese lau idia herevalaia noho gaudia, be oi ese oi kamonai noho.

⁶³Daba ia lao bona hanuaboi, be idia ese lau idia hevaseha henia noho.

⁶⁴Lohiabada e, oi ese edia dika davana do oi henia. Edia kara hegeregerena, davana do oi henia.

⁶⁵Oiemu hereva dika idia edia latanai do oi atoa, bona edia kudouna edia laloa do oi koua.

⁶⁶Oiemu badu dekena amo idia do oi lulua lao, bona guba ena henuna dekena amo, idia ibounai do oi haorea.