Read Buka Helaga (Hiri Motu) 1993 LALOHISIHISI 5 Bible Online

LALOHISIHISI 5 - Buka Helaga (Hiri Motu) 1993 bible

LALOHISIHISI 5

¹Lohiabada e, ai dekenai idia vara gaudia, mani do oi laloatao. Ai do oi itaia, aiemai hemarai mani do oi itaia.

²Aiemai tano be idau taudia dekenai idia henia vadaeni. Aiemai ruma be idau bese taudia dekenai idia henia vadaeni.

³Aiemai tamadia be tuari taudia ese idia alaia, bona aiemai sinadia be vabu vadaeni.

⁴Aiemai inua ranu be ai hoia noho, bona aiemai lahi audia danu be mai davana.

⁵Ai idia tuari henia taudia ese ai idia lulua lao, bona ai dekenai idia mai kahirakahira noho. Aiemai goada ia ore momokani, to ai laga-ani diba lasi.

⁶Aniani do ai abia totona, ai ese Aigupito bona Asuria dekenai ai noinoi.

⁷Aiemai tamadia idia kara dika, bona idia mase vadaeni, bona hari ai ese edia dika davana ai huaia noho.

⁸Guna aiemai hesiai gaukara idia karaia taudia ese, ai idia biagua noho, bona tau ta ese edia siahu dekena amo ai ia hamauria diba lasi.

⁹Taunimanima alaia taudia be, tano ena kahana ibounai dekenai idia loaloa noho. Unai dainai ai ese, aniani ai tahua noho, mai gari bada danu.

¹⁰Aiemai kopina be mai siahu bada, amu bamona, badina be hitolo ese ai ia hadikaia noho.

¹¹Aiemai adavadia be Siona dekenai, tuari taudia ese idia hadikaia. Aiemai natudia kekeni, be Iuda hanua ibounai lalonai, tuari taudia ese idia hadikaia.

¹²Idia ese aiemai lohia taudia, be edia imadia dekena amo idia taua dae vadaeni, bona idia ese hanua tau badadia idia matauraia lasi.

¹³Aiemai eregabe taudia ese, uiti moia gabudia dekenai idia gaukara auka noho, bona memero be au metaudia henunai, idia hekwakwanai noho.

¹⁴Tau burukadia, be hanua ena magu iduara badinai idia helai lou lasi. Uhau taudia ese, gita gadaralaia kara idia rakatania vadaeni.

¹⁵Aiemai moale ibounai be ia ore vadaeni, bona aiemai mavaru ena gabu dekenai, taitai ia vara noho.

¹⁶Aiemai kwalimu toana, korona, be aiemai kwaradia dekena amo idia moru vadaeni. Madi, ai be dika vadaeni inai, kara dika ai karaia dainai.

¹⁷Inai dainai aiemai kudoudia idia manoka momokani vadaeni, bona aiemai matadia edia ranu dainai, ai itaia namonamo diba lasi.

¹⁸Badina Siona Ororo be anina lasi vadaeni, uda sisia idia loaloa gabuna sibona ia lao vadaeni.

¹⁹To oi, Lohiabada e, oi be king ela bona hanaihanai. Oiemu King siahuna be do ia noho nega ibounai, doko lasi.

²⁰Badina dahaka oi ese nega ibounai ai oi laloaboio noho? Badina dahaka nega daudau ai oi rakatania vadaeni?

²¹Lohiabada e, ai ura oi dekena do ai giroa lou. Mani emu kara, ai do oi abia dae lou. Aiemai mauri do oi hamatamataia lou, dina gunadia hegeregere.

²²O sedira, oi ese ai oi negea momokani vadaeni, a? Oi ese ai oi badu henia momokani, a?