Read Buka Helaga (Hiri Motu) 1993 ESEKIELA 27 Bible Online

ESEKIELA 27 - Buka Helaga (Hiri Motu) 1993 bible

ESEKIELA 27

¹Lohiabada ese lau dekenai ia hereva, ia gwau,

²“Tanobada tauna e, Turo ia mase vadaeni dainai, lalohisihisi ane do oi abia.

³Turo, davara ena iduara dekenai ia noho hanua badana, bona kone tanodia momo taudia edia hoihoi gabuna, do oi hamaoroa, do oi gwau: Lau, Lohiabada Dirava be inai bamona lau hereva noho, lau gwau: “Turo e, guna oi hereva vadaeni, oi gwau, ‘Egu hairaina be bada herea.’

⁴Oiemu noho gabuna be davara dekenai. Oi idia haginia taudia ese, sisima mai hairaina bamona oi idia karaia.

⁵Oiemu audia ibounai be kasuarina audia, Heremona Ororo dekena amo, bona oiemu au tubua be sida auna ta, Lebanona Ororo dekena amo.

⁶Oiemu bara be Basana ena ouki audia dekena amo idia karaia. Oiemu reirei be Kupro ena kasuarina audia dekena amo idia karaia, bona elefante doadia dekena amo idia hagoadaia.

⁷Dabua aukana mai ena turia herahera danu, be Aigupito dekena amo oi abia. Unai dabua auka dekena amo oiemu palai oi karaia, bona oiemu pepe danu. Dabua namona, ena kala bulu bona kakakaka, be Elisa kone tano dekena amo oi abia. Unai be dina ena siahu koua dabua namona totona.

⁸Oiemu bara taudia be Sidono bona Aravada idia mai taudia. Oiemu davara diba momo taudia, Turo taudia ese, oiemu lalona dekenai idia gaukara noho. Idia be oiemu taria taudia.

⁹Gebala ena tau badadia, sisima kamuta gaukara diba momo taudia, ese oiemu reirei idia naria, bona reirei ena matu idia koua namonamo. Davara ena lagatoi bona kada ibounai, be oi dekenai idia kamokau, oiemu hoihoi kohu idia hoihoilaia.

¹⁰“Parasa bona Ludia bona Libia dekena amo taudia be oiemu tuari taudia, oiemu tuari orea lalonai. Idia ese edia kesi bona auri kwara gaudia be oiemu haba edia latanai idia taua dae. Idia dekena amo hairai oi abia.

¹¹Aravada bona Heleke taudia be oiemu magudia edia latanai idia gini, bona Gamada taudia be oiemu kohoro lalonai. Idia ese oiemu magudia ibounai edia latanai edia kesi idia taua dae. Bona unai dekena amo oiemu hairai be bada herea momokani.

¹²“Tarasisi taudia be oiemu taudia danu idia hoihoi karaia, oiemu kohu idauidau be momo herea dainai. Idia ese siliva, bona auri, bona auri haragana, bona auri metauna, oi dekenai idia henia, edia hoihoi gaudia edia davana.

¹³Iavana bona Tubala bona Meseka taudia be umui Turo taudia danu idia hoihoi karaia, idia ese hesiai mai guia taudia, bona auri laboralabora gaudia umui dekenai idia henia, emui hoihoi gaudia edia davana.

¹⁴Bete Togarama taudia ese hosi, bona tuari hosi, bona doniki umui dekenai idia henia, emui hoihoi gaudia edia davana.

¹⁵“Rodo taudia be umui danu idia hoihoi karaia. Kone tanodia momo lalonai, emui hoihoi gabudia idia noho, bona idia ese elefante doadia bona eboni audia idia mailaia, emui hoihoi gaudia edia davana.

¹⁶Edoma taudia be umui danu idia hoihoi karaia, emui kohu be momo herea dainai. Idia ese samarago nadi namodia, bona dabua kakakaka, bona dabua mai ena turia herahera, bona dabua auka namo herea, bona davara nadi namodia, bona kavabukavabu danu umui dekenai idia henia, emui hoihoi gaudia edia davana.

¹⁷“Iuda bona Israela tano taudia be umui danu idia hoihoi karaia. Idia ese uiti, olive dehoro, fig huahuadia matamatadia, hani, bona bonana namo muramura umui dekenai idia henia, emui hoihoi gaudia edia davana.

¹⁸Damaseko taudia be umui dekena amo idia hoihoi, emui kohu be momo herea dainai, bona idia ese Helebono ena uaina, bona Sahara ena mamoe huina kurokurona umui dekenai idia henia, emui hoihoi gaudia edia davana.

¹⁹“Usala dekenai idia noho Dano taudia bona Iavana taudia danu ese oiemu kohu idia hoia. Idia ese auri haragana, kasia aniani ena mamina hanamoa muramurana, bona tohu umui dekenai idia henia, emui kohu edia davana.

²⁰Dedana taudia ese umui dekenai hosi edia doruna dabuadia idia hoia lao, emui kohu do idia abia totona.

²¹Arabia bona Kedara lohia taudia ese umui ura bada gaudia mamoe, mamoe ena natudia, bona nanigosi dekena amo emui kohu idia hoia.

²²“Sieba bona Rama edia hoihoi taudia be umui emui kohu idia abia totona, idia ese aniani ena mamina hanamoa muramura namo herea idauidau, bona herahera nadidia idauidau ibounai, bona golo umui dekenai idia henia.

²³Harana bona Kane bona Eden bona Asuru bona Kilimada taudia danu be umui dekenai hoihoi idia karaia.

²⁴Idia ese dabua namo herea, bona dabua ena kala bulu, bona dabua mai ena turia herahera, bona geda ena dabua, kala idauidau momo, idia lokua namonamo bona varo dekenai idia kwatua gaudia be umui dekenai idia hoihoilaia.

²⁵Tarasisi lagatoi momo be umui ese umui hoia, emui hoihoi gaudia do idia abia lao totona. “Turo e, oi be sisima ta davara ena latanai bamona. Oiemu kohu momo be metau herea.

²⁶Oiemu bara taudia ese oi idia bara lao, davara dobu dekenai. To laurabada ia toa goada herea dainai oi bubua, oi diho davara lalonai.

²⁷Oiemu kohu momo, oiemu hoihoi gaudia, oiemu kuru taudia, bona oiemu taria taudia, oiemu sisima kamuta taudia, bona oiemu hoihoi taudia, oiemu tuari taudia ibounai, bona oiemu lalonai noho taudia ibounai, be davara lalonai idia diho, davara lalonai dika oi davaria dinana dekenai.

²⁸Oiemu kuru taudia edia tai idia kamonai neganai, kone dekenai noho taudia ibounai idia heudeheude.

²⁹“Sisima bona kada ibounai dekena amo, kuru taudia do idia diho kone dekenai. Bara taudia bona taria taudia ibounai be, kone dekenai do idia gini noho.

³⁰Idia ese oi Turo dainai do idia tai noho. Do idia tai dikadika, bona edia kwaradia dekenai kahu do idia negea, bona kahu ena latanai do idia hekure giroagiroa.

³¹Turo e, oi dainai inai sisima bona kada kuru taudia ese, edia kwaradia huina do idia kakasia ore, bona puse dabua do idia karaia. Oi dainai do idia tai, mai edia lalohisihisi momokani. Edia laumadia danu do idia hisihisi.

³²Oi dainai idia taitai noho neganai, idia ese inai lalohisihisi ane do idia abia, do idia gwau, ‘Tanobada lalonai edena hanua be Turo hanua hegeregerena? Madi, ia be hari davara ena lalonai, mai regerege ta lasi ia noho.’

³³Guna, oiemu hoihoi kohudia, be davara kahadia idauidau dekena amo idia mai neganai, bese momo taudia edia lalodia oi hamoalea. Oiemu kohu momo bona emu hoihoi gaudia dekena amo, tanobada ena king taudia dekenai kohu momo oi henia.

³⁴To hari davara ese oi ia hadikaia vadaeni. Oi be davara ena lalonai oi diho dobu herea vadaeni. Oiemu hoihoi kohudia bona emu gaukara taudia ibounai, be oi danu idia diho vadaeni.

³⁵Kone tanodia taudia ibounai, be oi dainai idia hoa bada noho. Edia king taudia idia gari bada noho. Edia vairadia ese edia gari ena toana ia hedinaraia noho.

³⁶Bese idauidau edia hoihoi taudia ese oiemu sivarai, be mai laloa dika bona gari danu idia herevalaia noho. Oiemu dokona be mai gari danu, bona do oi boio momokani, ia lao bona hanaihanai.”